ಜಡ್ಕಲ್ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ನೀರೆತ್ತುವ ಹೆಚ್ಚು ಶಕ್ತಿಯ ಪಂಪ್ಗಳ ಬಳಕೆಯಿಂದ ಸಮಸ್ಯೆಯಾಗಿದೆ. ಕೃಷಿಗೆ ವಿದ್ಯುತ್ ಉಚಿತ ಸಂಪರ್ಕ ದುರುಪಯೋಗವಾಗುತ್ತಿದೆ ಎಂಬ ಆರೋಪವೂ ಇದೆ. ಜಡ್ಕಲ್, ಮುದೂರು, ಹಾಲ್ಕಲ್ ಪ್ರದೇಶದಲ್ಲಿ ಅಡಕೆ, ತೆಂಗು, ತರಕಾರಿ ಬೆಳೆಗೆ ಹಿಂದೆ ನೀರುಣಿಸುತ್ತಿದ್ದರೆ, ಪ್ರಸಕ್ತ ಗೇರು, ರಬ್ಬರ್ ಗಿಡಗಳಿಗೂ ನೀರು ಹಾಯಿಸಿ ಹೊಳೆ ಹರಿವನ್ನೇ ಬತ್ತಿಸಲಾಗುತ್ತಿದೆ. ಹೊಳೆಗಳ ನೀರು ಖಾಲಿ ಮಾಡುವ ಮೂಲಕ ಕಾಡುಪ್ರಾಣಿ, ಸಾಕುಪ್ರಾಣಿಗಳಿಗೂ ನೀರಿನ ಸಮಸ್ಯೆ ಎದುರಾಗುತ್ತಿದೆ. ಹೊಳೆ ಇನ್ನಿತರ ನೀರಿನ ಮೂಲದಿಂದ ನೀರೆತ್ತಲು ನೀರಾವರಿ ಇಲಾಖೆ ಪರವಾನಗಿ ಪಡೆಯಬೇಕೆಂಬುದು ಕಡ್ಡಾಯ ನಿಯಮ. ಆದರೆ ಅದ್ಯಾವುದೂ ಅನ್ವಯವಾಗದೆ ನೀರೆತ್ತಲಾಗುತ್ತದೆ.
