ಮೇಳದಲ್ಲಿ, ಕೆಂಪು, ಹಳದಿ ಮತ್ತು ಬಿಳಿ ಹಲಸಿನ ತಳಿ ಹಣ್ಣುಗಳನ್ನು ಪ್ರದರ್ಶನ ಮತ್ತು ಮಾರಾಟಕ್ಕೆ ಇಡಲಾಗಿದೆ. ಜತೆಗೆ ಹಲಸಿನ ಐಸ್ಕ್ರೀಂ, ಚಿಪ್ಸ್, ಚಾಕಲೇಟ್, ಹಪ್ಪಳ, ಹಲ್ವಾ, ಕಬಾಬ್, ಹೋಳಿಗೆ, ವಡೆ, ದೋಸೆ, ಪಲ್ಯ, ಬಿರಿಯಾನಿ, ಹಲಸಿನ ಪಾಯಸದ ಹತ್ತಾರು ಮಳಿಗಗಳು ಆಹಾರ ಪ್ರಿಯರಿಂದ ತುಂಬಿ ಹೋಗಿದ್ದವು. ಹಾಗೆಯೇ ಮೇಳದಲ್ಲಿ ಹಲಸಿನ ಮೌಲ್ಯವರ್ಧಿತ ಪದಾರ್ಥಗಳು ಮತ್ತು ಹಲಸು ಹಚ್ಚುವ ಯಂತ್ರವೂ ನೋಡುಗರ ಗಮನ ಸೆಳೆಯಿತು.
ಹಬ್ಬದಲ್ಲಿ ಹೆಗ್ಗಡದೇವನಕೋಟೆೆ, ಕೊಳ್ಳೇಗಾಲ, ಪಿರಿಯಾಪಟ್ಟಣ, ಕೆ.ಆರ್.ಪೇಟೆ, ತುಮಕೂರು, ಹಾವೇರಿ ಮತ್ತು ಶಿವಮೊಗ್ಗ ಭಾಗದ ಹಲಸಿನ ಬೆಳೆಗಾರರು ಗುಣಮಟ್ಟದ ಹಲಸಿನ ಹಣ್ಣುಗಳನ್ನು ತಂದಿದ್ದರು. ಚೇಳೂರಿನ ಕೆಂಪು ಹಲಸು, ನಾಗರಹೊಳೆ ಕಾಡಿನ ಬಿಳಿ ಹಲಸು, ಕೊಡಗಿನ ರುದ್ರಾಕ್ಷಿ ಹಲಸು ಹೆಚ್ಚು ಮಾರಾಟವಾಯಿತು.
ಕರ್ನಾಟಕ, ಕೇರಳ, ಮಲೇಶಿಯ, ವಿಯೆಟ್ನಾಂ, ಥೈಲೆಂಡಿನ ಹಲಸಿನ ಕಾಯಿ ಮತ್ತು ಹಣ್ಣು ಪ್ರದರ್ಶನದಲ್ಲಿ ಪ್ರಮುಖ ಆಕರ್ಷಣೆಯಾಗಿತ್ತು. ಡೆಂಗ್ ಸೂರ್ಯ, ರುದ್ರಾಕ್ಷಿ ಬಕ್ಕೆ, ತೂಬಗೆರೆ, ಬೈರಸಂದ್ರ, ಸರ್ವಋತು, ಲಾಲ್ಬಾಗ್ ಮಧುರ, ಥಾಯ್ರೆಡ್, ವಿಯೆಟ್ನಾಂ ಸೂಪರ್ ಹರ್ಲಿ, ಗಮ್ಲೆಸ್, ನಾಗಚಂದ್ರ, ರಾಮಚಂದ್ರ ಮೊದಲಾದ 25ಕ್ಕೂ ಹೆಚ್ಚಿನ ಜನಪ್ರಿಯ ಹಲಸಿನ ತಳಿಯ ಗಿಡಗಳು ಮಾರಾಟಕ್ಕಿಡಲಾಗಿತ್ತು. ಈ ಮೂಲಕ ಸ್ಥಳೀಯ ರೈತರು ಹೊಸ ತಳಿಯ ಹಲಸು ಬೆಳೆಯಲು ಅವಕಾಶ ಕಲ್ಪಿಸಿದಂತಾಗಿತ್ತು.
