ಎಚ್​ಪಿಎಲ್​ಗೆ ಹಣ ಸಂಗ್ರಹಿಸಿದ್ದು ನಮ್ಮ ನಿರ್ಧಾರ

ವಿಜಯವಾಣಿ ಸುದ್ದಿಜಾಲ ಹುಬ್ಬಳ್ಳಿ: ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ (ಕೆಎಸ್​ಸಿಎ)ಯಿಂದ ಅನುಮತಿ ಪಡೆದುಕೊಂಡು 2015ರಿಂದ ಫ್ರಾಂಚೈಸಿ ಆಧಾರಿತ ಹುಬ್ಬಳ್ಳಿ ಪ್ರೀಮಿಯರ್ ಲೀಗ್ (ಎಚ್​ಪಿಎಲ್) ಕ್ರಿಕೆಟ್ ಟೂರ್ನಾಮೆಂಟ್ ಆಯೋಜಿಸಿಕೊಂಡು ಬಂದಿದ್ದೇವೆ. ಇದಕ್ಕೆ ಪ್ರತಿ ಆಟಗಾರರಿಂದ ಹಾಗೂ ತಂಡದ ಮಾಲೀಕರಿಂದ ಹಣ ಸಂಗ್ರಹಿಸಿದ್ದು ನಮ್ಮ ನಿರ್ಧಾರವಾಗಿದೆ ಎಂದು ಟೂರ್ನಾಮೆಂಟ್ ಆಯೋಜಕರಾದ ಬಿಡಿಕೆ ಸ್ಪೋರ್ಟ್ಸ್ ಫೌಂಡೇಷನ್​ನ ಟ್ರಸ್ಟಿ ಬಾಬಾ ಭೂಸದ ತಿಳಿಸಿದ್ದಾರೆ.

ಹುಬ್ಬಳ್ಳಿಯಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಎಚ್​ಪಿಎಲ್​ನ ಆಯೋಜಕರು ನಾವು. ಅದರ ನಿರ್ವಹಣೆಗೆ ಹಣ ಸಂಗ್ರಹಣೆ ವಿಷಯದಲ್ಲಿ ಕೆಎಸ್​ಸಿಎ ಪಾತ್ರವಿಲ್ಲ. ಈ ವರ್ಷ ಏಪ್ರಿಲ್-ಮೇ ತಿಂಗಳಲ್ಲಿ ನಡೆದ ಎಚ್​ಪಿಎಲ್​ನಲ್ಲಿ ಪ್ರತಿ ಆಟಗಾರರಿಂದ 800 ರೂ. ಹಾಗೂ ಪ್ರತಿ ತಂಡದಿಂದ 55 ಸಾವಿರ ರೂ. (ಒಟ್ಟು 6 ತಂಡಗಳು) ಹಣ ಸಂಗ್ರಹಿಸಿದ್ದೇವೆ. ಆಟಗಾರರ ಹರಾಜು ಪ್ರಕ್ರಿಯೆ, ಮೈದಾನದ ಶುಲ್ಕ, ಪಂದ್ಯದ ಅಧಿಕಾರಿಗಳ ಡ್ರೆಸ್, ಇತರರ ಖರ್ಚು-ವೆಚ್ಚಗಳಿಗೆ ಹಣದ ಅಗತ್ಯವಿರುತ್ತದೆ ಎಂದು ಹೇಳಿದರು.

ಎಚ್​ಪಿಎಲ್ ಆಯೋಜನೆ ಪೂರ್ವ ಕೆಎಸ್​ಸಿಎ ಜತೆ ಸಂಲಗ್ನತೆ ಹೊಂದಿರುವ ಕ್ಲಬ್​ಗಳಿಗೆ ಆಟಗಾರರ ಪಟ್ಟಿ ಕಳುಹಿಸಲು ಹೇಳಲಾಗುತ್ತದೆ. ಅವರು ಕೊಟ್ಟ ಪಟ್ಟಿ ಪ್ರಕಾರ ಆಟಗಾರರರನ್ನು ಹರಾಜು ಪ್ರಕ್ರಿಯೆಗೆ ಒಳಪಡಿಸಲಾಗುತ್ತದೆ. ಆಯ್ಕೆಯಾಗದ ಪ್ರತಿ ಆಟಗಾರರಿಗೆ 400 ರೂ. ವಾಪಸ್ ಕೊಟ್ಟಿದ್ದೇವೆ ಎಂದು ತಿಳಿಸಿದರು.

ಈ ಬಾರಿ ಎಚ್​ಪಿಎಲ್ ಆಯೋಜನೆಗಾಗಿ ಮೈದಾನದ ಶುಲ್ಕವಾಗಿ ಕೆಎಸ್​ಸಿಎಗೆ ಆಗಸ್ಟ್​ನಲ್ಲಿ 40 ಸಾವಿರ ರೂ. ಪಾವತಿಸಿದ್ದೇವೆ. ಮುಂಗಡವಾಗಿ ಶುಲ್ಕ ಪಾವತಿಸಲು ಕೆಎಸ್​ಸಿಎನವರು ಹೇಳಿರಲಿಲ್ಲ. ಆಗಸ್ಟ್​ನಲ್ಲಿ ಕೇಳಿದ್ದರು, ಕೆಲ ದಿನಗಳಲ್ಲಿ ನೇರವಾಗಿ ಅವರ ಖಾತೆಗೆ ಹಣ ಜಮಾ ಮಾಡಿದ್ದೇವೆ. ಈ ವಿಷಯದಲ್ಲಿ ಲೋಪವಾಗಿದ್ದರೆ ನಮ್ಮ ಕ್ಲಬ್ (ಬಿಡಿಕೆ ಸ್ಪೋರ್ಟ್ಸ್ ಫೌಂಡೇಷನ್) ಕೆಎಸ್​ಸಿಎ ನಿಂದ ಮಾನ್ಯತೆ ಕಳೆದುಕೊಳ್ಳಬೇಕಾಗುತ್ತದೆ ಎಂದರು.