ಬೆಂಗಳೂರು ಗ್ರಾಮಾಂತರ: ದಾಖಲೆಗಳು ಸರಿಯಾಗಿಲ್ಲ ಎಂಬ ನೆಪ ಹೇಳಿ ವಾಹನ ಸಮೇತ, ಮೆಣಸಿನಕಾಯಿ ಚೀಲಗಳನ್ನು ಜಪ್ತಿ ಮಾಡಿರುವ ವಾಣಿಜ್ಯ ತೆರಿಗೆ ಇಲಾಖೆ ಅಧಿಕಾರಿಗಳು ಮೂರು ದಿನವಾದರೂ ಕಚೇರಿಗೆ ಬಾರದಿರುವುದರಿಂದ ರೈತರು ಕಣ್ಣೀರು ಹಾಕುತ್ತಿದ್ದಾರೆ.
ಆಂಧ್ರದ ಮಂತ್ರಾಲಯ ತಾಲೂಕಿನ ಕೌತಳಂ ಗ್ರಾಮದ ರೈತರು ಬ್ಯಾಡಗಿ, ಕಲಬುರಗಿ, ಯಾದಗಿರಿಯಲ್ಲಿ ಶೀತಲೀಕರಣ ಘಟಕಗಳು ಭರ್ತಿಯಾಗಿದ್ದರಿಂದ ತಮಿಳುನಾಡಿನ ಧರ್ಮಪುರಿಯಲ್ಲಿರುವ ಶೀತಲೀಕರಣ ಘಟಕಕ್ಕೆ 302 ಚೀಲ ಬ್ಯಾಡಗಿ ಮೆಣಸಿನಕಾಯಿ ತುಂಬಿಕೊಂಡು ಏ.2ರಂದು ಬೆಳಗಿನ ಜಾವ ಸಾಗಿಸುತ್ತಿದ್ದಾಗ ದೇವನಹಳ್ಳಿ ಬಳಿ ಅಧಿಕಾರಿಗಳು ದಾಖಲೆಗಳು ಸರಿಯಿಲ್ಲ ಎಂಬ ನೆಪ ಹೇಳಿ ಮೆಣಸಿನಕಾಯಿ ಸಮೇತ ವಾಹನ ಜಪ್ತಿ ಮಾಡಿದ್ದಾರೆ. ಜಮೀನು ಪತ್ರ, ಅಲ್ಲಿನ ಗ್ರಾಮ ಲೆಕ್ಕಾಧಿಕಾರಿ ನೀಡಿರುವ ಮನವಿ ಪತ್ರ ನೀಡಿದರೂ, ಅದನ್ನು ಪರಿಗಣಿಸಿಲ್ಲ. ಊಟ, ನೀರು ಬಿಟ್ಟು ರೈತರು ವಾಣಿಜ್ಯ ತೆರಿಗೆ ಇಲಾಖೆ ಆವರಣದಲ್ಲಿಯೇ ರಾತ್ರಿ ಕಳೆಯುತ್ತಿದ್ದಾರೆೆ. ಬಿಸಿಲಿಗೆ ಮೆಣಸಿನಕಾಯಿ ಕಪ್ಪು ಬಣ್ಣಕ್ಕೆ ತಿರುಗಿ ಹಾಳಾಗುತ್ತಿರುವುದು ರೈತರನ್ನು ಕಂಗಾಲಾಗಿಸಿದೆ. ಸ್ಥಳೀಯರ ಕಾಲುಗಳನ್ನು ಹಿಡಿದು ಮೆಣಸಿನಕಾಯಿ ಬಿಡಿಸಿಕೊಡಿ ಎಂದು ಅಂಗಲಾಚುತ್ತಿದ್ದಾರೆ.
