ವಿಜಯವಾಣಿ ಸುದ್ದಿಜಾಲ ಧಾರವಾಡ
ಗ್ರಾಮೀಣ ಜನರ ಅಭಿವೃದ್ಧಿಗೆ ಸರ್ಕಾರಗಳು ಸಾಕಷ್ಟು ಯೋಜನೆಗಳನ್ನು ಜಾರಿಗೆ ತಂದಿದೆ. ಆದರೆ ಆ ಯೋಜನೆಗಳ ಲಾಭ ಪಡೆಯಲು ಬ್ಯಾಂಕ್ ವ್ಯವಸ್ಥೆಯೇ ಇಲ್ಲದ ಕಾರಣ ಗ್ರಾಮಸ್ಥರು ಮತ್ತೊಂದು ಗ್ರಾಮ ನೆಚ್ಚಿಕೊಳ್ಳುವಂತಾಗಿದೆ.
ಇತ್ತೀಚಿನ ದಿನಗಳಲ್ಲಿ ಬ್ಯಾಂಕ್ ಸೌಲಭ್ಯ ಅತ್ಯಂತ ಅಗತ್ಯವಾಗಿದೆ. ಆದರೆ ತಾಲೂಕಿನ ರಾಮಾಪುರ ಗ್ರಾಮದಲ್ಲಿ ಈ ಸೌಲಭ್ಯದಿಂದ ವಂಚಿತರಾಗಿದ್ದಾರೆ. ಸುಮಾರು ದಿನಗಳಿಂದ ಬ್ಯಾಂಕ್ ಸ್ಥಾಪನೆಗೆ ಬೇಡಿಕೆ ಇಟ್ಟಿದ್ದರೂ ಅಧಿಕಾರಿಗಳು ಸ್ಪಂದಿಸುತ್ತಿಲ್ಲ. ಹೀಗಾಗಿ ಧಾರವಾಡದಿಂದ 18 ಕಿ.ಮೀ ದೂರದಲ್ಲಿರುವ ರಾಮಾಪುರ ಗ್ರಾಮಸ್ಥರು ಬ್ಯಾಂಕ್ ವಹಿವಾಟಿಗೆ ಮುಗದ, ಕೋಟೂರ, ತೇಗೂರ ಇಲ್ಲವೇ ಧಾರವಾಡ ನೆಚ್ಚಿಕೊಳ್ಳುವಂತಾಗಿದೆ.
ಸಾಮಾಜಿಕ ಭದ್ರತಾ ಯೋಜನೆ ಅಡಿ ಅಂಗವಿಕಲರು, ವೃದ್ಧಾಪ್ಯ, ವಿಧವಾ ವೇತನ, ಸೇರಿ ವಿವಿಧ ಪಿಂಚಣಿಗಳು, ಗೃಹ ಲಕ್ಷ್ಮೀ ಯೋಜನೆಯನ್ನು ಸರ್ಕಾರ ಜಾರಿ ಮಾಡಿದೆ. ಈ ಪಿಂಚಣಿ ಹಣಕ್ಕಾಗಿ ಗ್ರಾಮಸ್ಥರು 8-15 ಕಿ.ಮೀ ಪ್ರಯಾಣ ಮಾಡಬೇಕು. ರಾಮಾಪುರದಿಂದ ಸುಮಾರು 15 ಕಿ.ಮೀ ದೂರದ ಕೋಟೂರ, 12 ಕಿ.ಮೀ ದೂರದ ಮುಗದ, 8 ಕಿ.ಮೀ ದೂರದ ತೇಗೂರ ಇಲ್ಲವೇ ಧಾರವಾಡಕ್ಕೆ ಆಗಮಿಸಬೇಕು.
ರಾಮಾಪುರ ಗ್ರಾಪಂ ವ್ಯಾಪ್ತಿಯಲ್ಲಿನ ವೀರಾಪುರ, ಕಲ್ಲಾಪುರ, ಹೊಸವಾಳ, ಸಿದ್ದಾಪುರ ಸೇರಿ ಸುತ್ತಲಿನ ಎಲ್ಲ ಗ್ರಾಮಗಳ ಜನರು ಕೃಷಿಯನ್ನೇ ಅವಲಂಬಿಸಿದ್ದಾರೆ. ಕೃಷಿ ಸಾಲ, ಯಂತ್ರೋಪಕರಣ ಸಾಲ ಸೇರಿ ಪ್ರತಿಯೊಂದಕ್ಕೂ ಬ್ಯಾಂಕ್ ಅವಲಂಬಿಸಬೇಕಿದೆ. ಹೀಗಾಗಿ ಬ್ಯಾಂಕ್ ಸ್ಥಾಪನೆಗೆ ಅದರಲ್ಲೂ ಸರ್ಕಾರಿ ಸ್ವಾಮಿತ್ವದ (ಕೆವಿಜಿ, ಬ್ಯಾಂಕ್ ಆಫ್ ಬರೋಡಾ, ಎಸ್ಬಿಐ, ಇತರೆ) ಬ್ಯಾಂಕ್ಗಳ ಸ್ಥಾಪನೆಗೆ ಒತ್ತಾಯಿಸುತ್ತಿದ್ದಾರೆ. ಆದರೆ ಲೀಡ್ ಬ್ಯಾಂಕ್ ಅಧಿಕಾರಿಗಳು ಮಾತ್ರ ಹಲವು ಕಾರಣ ಹೇಳಿ ಮುಂದೂಡುತ್ತಿದ್ದಾರೆ.
ಕಳೆದ ತಿಂಗಳಷ್ಟೇ ಗ್ರಾಮಸ್ಥರು ಜಿಲ್ಲಾಧಿಕಾರಿ ಭೇಟಿ ಮಾಡಿ ಮನವಿ ಸಲ್ಲಿಸಿದ್ದಲ್ಲದೆ, ಲೀಡ್ ಬ್ಯಾಂಕ್ ಅಧಿಕಾರಿಗಳಿಗೆ ನಿರ್ದೇಶನ ನೀಡುವಂತೆಯೂ ಒತ್ತಾಯಿಸಿದ್ದಾರೆ. ಇನ್ನಾದರೂ ಜಿಲ್ಲಾಡಳಿತ ಗ್ರಾಮಸ್ಥರ ಮನವಿಗೆ ಸ್ಪಂದಿಸಿ ಬ್ಯಾಂಕ್ ಸ್ಥಾಪನೆಗೆ ಮುಂದಾಗುವರೇ ಎಂಬುದನ್ನು ಕಾದು ನೋಡಬೇಕಿದೆ.
