ಶಿಕ್ಷಣದಿಂದ ಪ್ರತಿ ಮಕ್ಕಳೂ ನಾಡಿನ ಅಗ್ನಿದಿವ್ಯವಾಗಲಿ

ಜಿ.ಯು. ಭಟ್ ಆಶಯ | ಹಟ್ಟಿಯಂಗಡಿ ಶಾಲೆಯಲ್ಲಿ ವಿದ್ಯಾರ್ಥಿ ಸಂಸತ್ ಪದಗ್ರಹಣ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಶಾಲೆಯಲ್ಲಿ ಕಲಿಯುವ ಮಕ್ಕಳು ಶಾಶ್ವತವಾದ ಅಗ್ನಿ(ಬೆಳಕು)ಯನ್ನು ಗಳಿಸಿಕೊಳ್ಳುತ್ತಾರೆ. ಆತ್ಮ ಸಾಕ್ಷಿಯ ಅಗ್ನಿ, ವಿನಯದ ಅಗ್ನಿ, ಒಡಲಾಗ್ನಿ ಎಲ್ಲವೂ ಸಹ ಲೋಕೋದ್ಧಾರಕ್ಕಾಗಿ ಶಾಲೆಗಳು ಮಕ್ಕಳನ್ನು ತರಬೇತುಗೊಳಿಸುತ್ತವೆ. ಜ್ಞಾನವಂತರಾದರೆ ಜಗತ್ತನ್ನು ಜಯಿಸಬಹುದು. ಹೀಗಾಗಿ ಪ್ರತಿ ಮಕ್ಕಳೂ ಸಂಹ ನಾಡಿನ ಅಗ್ನಿದಿವ್ಯವಾಗಬೇಕು ಎಂದು ಹಿರಿಯ ಪತ್ರಕರ್ತ ಜಿ.ಯು. ಭಟ್ ಹೊನ್ನಾವರ ಆಶಯ ವ್ಯಕ್ತ ಪಡಿಸಿದರು.

ಕುಂದಾಪುರ ತಾಲೂಕಿನ ಹಟ್ಟಿಯಂಗಡಿಯ ಶ್ರೀ ಸಿದ್ಧಿವಿನಾಯಕ ವಸತಿ ಶಾಲೆಯಲ್ಲಿ ಬುಧವಾರ ಆಯೋಜಿಸಿದ್ದ ವಿದ್ಯಾರ್ಥಿ ಸಂಸತ್ ಪದಗ್ರಹಣ ಮತ್ತು ಕವಿ ಮುದ್ದಣ ಕಲೆ ಮತ್ತು ಸಾಹಿತ್ಯ ಘಟಕ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದರು.

ದೇಶದ ಹೆಸರು ಪ್ರಜ್ವಲಿಸಿ

ಭಾರತೀಯತೆಯ ಶಿಕ್ಷಣ ವ್ಯವಸ್ಥೆಯೇ ಸಂಪೂರ್ಣ ನಾಶವಾಗಿದೆ. ಆ ಪದ್ಧತಿಯ ಶಿಕ್ಷಣ ನೀಡುವ ಶಿಕ್ಷಣ ಸಂಸ್ಥೆಗಳೂ ಕಡಿಮೆಯಾಗುತ್ತಿದೆ. ಇಂತಹ ಸಂದರ್ಭದಲ್ಲಿ ಹಟ್ಟಿಯಂಗಡಿಯಲ್ಲಿ ಜ್ಞಾನದಾಯಕನಾದ ಸಿದ್ಧಿವಿನಾಯಕನ ಸನ್ನಿಧಿಯಲ್ಲಿ ದೇವಾಲಯದ ರೀತಿಯಲ್ಲಿ ಶಾಲೆ ಮುನ್ನಡೆಸಲಾಗುತ್ತಿದೆ. ಇಲ್ಲಿ ನಮ್ಮತನ ಕಲಿತ ಮಕ್ಕಳ ಭವಿಷ್ಯ ದೇಶವನ್ನು ಬೆಳಗುವಂತೆ ಪ್ರಜ್ವಲಿಸಲಿ ಎಂದರು.

ನಾಲ್ಕು ಆಧಾರಸ್ತಂಭ

ಸಮಾರಂಭ ಉದ್ಘಾಟಿಸಿದ ವಿಜ್ಞಾನಿ ಡಾ. ಸುರೇಂದ್ರ ಕುಲಕರ್ಣಿ ಮಾತನಾಡಿ, ಕಲಿತ ಶಿಕ್ಷಣವು ಸಮಾಜ ಮತ್ತು ದೇಶವನ್ನು ಬೆಳೆಸುವಂತೆ ಇರಬೇಕು. ಆತ್ಮವಿಶ್ವಾಸ, ಸ್ವಯಂ ಗೌರವ, ಶಿಸ್ತು ಮತ್ತು ಸಮಗ್ರತೆ ಇವು ವಿದ್ಯಾರ್ಥಿಗಳ ಭವಿಷ್ಯ ನಿರ್ಮಿಸುವ 4 ಆಧಾರ ಸ್ತಂಭಗಳು. ಅಂಧಶೃದ್ಧೆಗಳನ್ನು ಬಿಟ್ಟು ವೈಜ್ಞಾವಿಕವಾಗಿ ಕಲಿತು ಮುಂದೆ ಬರಬೇಕು. ವಿಜ್ಞಾನ ಮತ್ತು ಗಣಿತ ವಿಷಯ ಕಠಿಣವಲ್ಲ. ಅವುಗಳನ್ನು ಕಲಿತರೆ ಬದುಕು ಬಂಗಾರವಾಗುತ್ತದೆ ಎಂದರು.

ಬ್ಯಾಚ್ ವಿತರಣೆ

ಶಾಲೆಯ ವಿದ್ಯಾರ್ಥಿ ನಾಯಕ ಹಾಗೂ ನಾಯಕಿಗೆ ಅಧ್ಯಕ್ಷತೆ ವಹಿಸಿದ್ದ ಪ್ರಾಂಶುಪಾಲ ಶರಣಕುಮಾರ್ ಅವರು ಬ್ಯಾಚ್ ವಿತರಿಸಿದರು. ಭಟ್ಕಳದ ಹಿರಿಯ ಪತ್ರಕರ್ತ ರಾಧಾಕೃಷ್ಣ ಭಟ್, ಶಾಲೆಯ ಆಡಳಿತಾಧಿಕಾರಿ ವೀಣಾರಶ್ಮಿ ಎಂ., ವಿವಿಧ ಘಟಕಗಳ ವಿದ್ಯಾರ್ಥಿ ನಾಯಕ, ನಾಯಕಿಯರು ಉಪಸ್ಥಿತರಿದ್ದರು.

ಶಿಕ್ಷಕಿ ಅಶ್ವಿನಿ ವಿದ್ಯಾರ್ಥಿ ಸಂಸತ್ ಪದಾಧಿಕಾರಿಗಳ ಹಾಗೂ ವಿವಿಧ ಘಟಕಗಳ ನಾಯಕ- ನಾಯಕಿಯರ ಹೆಸರು ವಾಚಿಸಿದರು. ಶಿಕ್ಷಕಿ ಪ್ರತೀಕ್ಷಾ ಪ್ರತಿಜ್ಞಾ ವಿಧಿ ಬೋಧಿಸಿದರು.

ಐಶ್ವರ್ಯಾ ಸಂಗಡಿಗರು ಪ್ರಾರ್ಥಿಸಿದರು. ಪೂರ್ವಿ ಜಗನ್ನಾಥ ಸ್ವಾಗತಿಸಿದರು. ಕೃಪಾಲಿ ವಂದಿಸಿದರು. ಹರ್ಷಿತಾ ಕಾರ್ಯಕ್ರಮ ನಿರೂಪಿಸಿದರು.