ಹುಬ್ಬಳ್ಳಿ: ತಾರಿಹಾಳದ ಕೈಗಾರಿಕಾ ಪ್ರದೇಶದ ಫ್ಯಾಕ್ಟರಿಯಲ್ಲಿ ಲಕ್ಷಾಂತರ ರೂಪಾಯಿ ಮೌಲ್ಯದ ತಾಮ್ರದ ತಂತಿ ಕದ್ದು ಪರಾರಿಯಾಗಿದ್ದ ಅಂತಾರಾಜ್ಯ ಖದೀಮನನ್ನ ವಿಜಯಪುರದಿಂದ ಹಿಡಿದು ತರುವಲ್ಲಿ ಹುಬ್ಬಳ್ಳಿ ಗ್ರಾಮೀಣ ಠಾಣೆ ಪೊಲೀಸರ ತಂಡ ಯಶಸ್ವಿಯಾಗಿದೆ.
ಮಹಾರಾಷ್ಟ್ರ ಕೊಲ್ಹಾಪುರ ಮೂಲದ ಅವಿನಾಶ ಮಚಲಿ (25) ಬಂಧಿತ. ಕುಟುಂಬದೊಂದಿಗೆ ವಿಜಯಪುರದಲ್ಲಿ ಇದ್ದಾನೆ ಎಂಬ ಮಾಹಿತಿ ಆಧರಿಸಿ ಪೊಲೀಸ್ ಇನ್ಸ್ಪೆಕ್ಟರ್ ಮುರುಗೇಶ ಚನ್ನಣ್ಣವರ ಸೂಚನೆಯಂದೆ ಎಎಸ್ಐ ಹೊನ್ನಪ್ಪನವರ ತಂಡ ಶುಕ್ರವಾರ ತೆರಳಿತ್ತು. ಅವಿನಾಶ ಇದ್ದ ಸ್ಥಳಕ್ಕೆ ಹಿಡಿಯಲು ಹೋದಾಗ ಕುಟುಂಬದ ಮಹಿಳೆಯರು ಹೈಡ್ರಾಮ ನಡೆಸಿದರು. ಮಫ್ತಿಯಲ್ಲಿದ್ದ ಪೊಲೀಸರ ಮೇಲೆ ಹಲ್ಲೆ ಯತ್ನ ಹಾಗೂ ಗಲಾಟೆ ಮಾಡಿದ್ದಾರೆ. ಪಿಸ್ತೂಲ್ ತೋರಿಸಿ ಸಿನಿಮಿಯಾ ರೀತಿಯಲ್ಲಿ ಅವಿನಾಶ್ನನ್ನು ಹಿಡಿದು ಹುಬ್ಬಳ್ಳಿಗೆ ಕರೆತರಲಾಗಿದೆ. ಶನಿವಾರ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ತಾಮ್ರ ತಂತಿ ಕಳವು ಪ್ರಕರಣದಲ್ಲಿ ಇನ್ನೂ ಐವರ ಹುಡುಕಾಟ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
