ಸಾಹಿತ್ಯವು ಸಂಸ್ಕೃತಿ. ಸಾಹಿತ್ಯವು ಜನಜೀವನದ ಕೈಗನ್ನಡಿ. ಸಾಹಿತ್ಯ ಸಾಮಾಜಿಕ ಬದುಕನ್ನು ನೇರ್ಪುಗೊಳಿಸಬಲ್ಲ, ಜನಜೀವನಕ್ಕೆ ಉತ್ತಮ ಪ್ರೇರಣೆ ಕೊಡುವ ಪ್ರಧಾನ ಸಲಕರಣೆ. ಸಮಗ್ರ ಸಾಮಾಜಿಕ ಹಿತದ ಕೃತಿಗಳೆಲ್ಲವೂ ಸಾಹಿತ್ಯವೇ. ಸಾಮಾಜಿಕ-ಸಾಂಸ್ಕೃತಿಕ ಹಿತವನ್ನು ಸಾಧಿಸಬಹುದಾದ ಬರಹಗಳು ನಿರ್ವಿವಾದವಾಗಿ ಸಾಹಿತ್ಯವೇ ಆಗಿವೆ. ಕಾವ್ಯ, ನಾಟಕ, ಕತೆ-ಕವಿತೆ, ನೀಳ್ಗತೆ-ಕಾದಂಬರಿಗಳು ಜನಪದದ ಜತೆಗೆ ಚಿತ್ರ, ವ್ಯಂಗ್ಯಚಿತ್ರ, ಸಂಗೀತ, ಸುಗಮ ಸಂಗೀತ, ನೃತ್ಯ, ಹರಿಕೀರ್ತನೆ, ಗಮಕ ವಾಚನ, ಶಿಲ್ಪಕಲೆ, ವರ್ಣಚಿತ್ರಗಳಂತಹ ಬಹುತೇಕ ಪ್ರಕಾರಗಳು ಸಂಸ್ಕೃತಿಯ ವೈಭವವನ್ನು ಪ್ರತಿಫಲಿಸುತ್ತವೆ. ಪತ್ರಿಕಾ ಮಾಧ್ಯಮವೂ ಸಾಹಿತ್ಯ ಸಂಸ್ಕೃತಿಯ ಉಜ್ಜೀವನಕ್ಕೆ ಚೇತೋಹಾರಿಯಾಗಿ ಕೊಡುಗೆ ನೀಡಿರುವುದು ವಸ್ತುಸ್ಥಿತಿ ಎಂದು ಸಮ್ಮೇಳನಾಧ್ಯಕ್ಷ ಮುಳಿಯ ಶಂಕರಭಟ್ಟ ತಿಳಿಸಿದರು.
