ಕಾರವಾರ: ಕೈಗಾರಿಕಾ ವಸಾಹತು ನಿರ್ಮಾಣಕ್ಕೆ ಮುಡಗೇರಿ ಗ್ರಾಮದ ಭೂ ಮಾಲೀಕರಿಂದ ಸ್ವಾಧೀನಪಡಿಸಿಕೊಂಡ ಭೂಮಿಗೆ ಪರಿಹಾರ ಲೆಕ್ಕ ಹಾಕುವಲ್ಲಿ ವ್ಯತ್ಯಾಸವಾಗಿದ್ದು, ರೈತರಿಗೆ ಅನ್ಯಾಯವಾಗುತ್ತಿದೆ ಎಂದು ಶಾಸಕ ಸತೀಶ ಸೈಲ್ ಹೇಳಿದರು.
ಸುದ್ದಿಗೋಷ್ಠಿಯಲ್ಲಿ ಶುಕ್ರವಾರ ಮಾತನಾಡಿದ ಅವರು, 2013 ರ ಭೂಸ್ವಾಧೀನ ಕಾಯ್ದೆಯಂತೆ ಲೆಕ್ಕ ಹಾಕಿದಲ್ಲಿ ರೈತರಿಗೆ ಪ್ರತಿ ಎಕರೆಗೆ 77 ಲಕ್ಷ ರೂ. ಪರಿಹಾರ ಸಿಗಬೇಕಿತ್ತು.ಈಗ 50 ಲಕ್ಷ ರೂ. ನೀಡಿ ರೈತರಿಂದ ನೇರ ಖರೀದಿಯ ಒಪ್ಪಿಗೆ ಪತ್ರ ಪಡೆಯಲಾಗುತ್ತಿದೆ. ಪ್ರತಿ ಎಕರೆಗೆ ಸುಮಾರು 31.65 ಲಕ್ಷ ರೂ. ನಷ್ಟವಾಗುತ್ತಿದೆ. ಹಿಂದಿನ ಶಾಸಕಿ ಅವರಿಂದಲೇ ಪರಿಹಾರ ಬಂತು ಎಂದು ಅವರಿಗೆ ಸನ್ಮಾನ ಮಾಡಿದವರು ಈಗ ಆಗುತ್ತಿರುವ ಅನ್ಯಾಯಕ್ಕೆ ಉತ್ತರ ನೀಡಬೇಕು ಎಂದರು.
ಪರಿಹಾರ ಲೆಕ್ಕ ಹಾಕುವಲ್ಲಿ ತಪ್ಪಿ, ರೈತರಿಗೆ ಮೋಸ ಮಾಡಿದ ಬಗ್ಗೆ ಜಿಲ್ಲಾ ಉಸ್ತುವಾರಿ ಸಚಿವರು, ಕೈಗಾರಿಕಾ ಸಚಿವರು, ಮುಖ್ಯಮಂತ್ರಿಗಳ ಗಮನಕ್ಕೆ ತರುತ್ತೇನೆ. ಇದುವರೆಗೆ ಪರಿಹಾರ ನೀಡುವ ಪ್ರಕ್ರಿಯೆ ಚಾಲ್ತಿಯಲ್ಲಿದೆ. ಆದರೆ, ಯಾರಿಗೂ ಪರಿಹಾರ ವಿತರಣೆಯಾಗದ ಕಾರಣ ಜಿಲ್ಲಾಧಿಕಾರಿ ಆದೇಶದ ವಿರುದ್ಧ ನ್ಯಾಯಾಲಯಕ್ಕೆ ಹೋಗಿ ಹೋರಾಟ ಮಾಡುವ ಅವಕಾಶವಿದೆ. ನನ್ನ ಗಮನಕ್ಕೆ ಈಗ ಬಂದ ವಿಚಾರವನ್ನು ರೈತರ ಮುಂದಿಡುತ್ತಿದ್ದೇನೆ. ರೈತರು ಬಯಸಿದರೆ, ಕಾನೂನು ಹೋರಾಟಕ್ಕೆ, ಹೆಚ್ಚಿನ ಪರಿಹಾರ ಕೊಡಿಸಲು ಬದ್ಧ ಎಂದರು.
ಹೇಗೆ ಅನ್ಯಾಯ..?
1997 ರಲ್ಲಿ ಮುಡಗೇರಿಯ 73 ಎಕರೆಯನ್ನು ವಶಪಡಿಸಿಕೊಳ್ಳಲು ಕೆಐಎಡಿಬಿ ಅಂತಿಮ ಅಧಿಸೂಚನೆ ಹೊರಡಿಸಿತ್ತು. ಆದರೆ, ಮಾಲೀಕರಿಗೆ ಪರಿಹಾರ ನೀಡಿರಲಿಲ್ಲ. ಈಗ 2022 ರ ಡಿಸೆಂಬರ್ನಲ್ಲಿ ಆದ ಸಭೆಯಲ್ಲಿ ಪ್ರಸ್ತುತ ಮಾರುಕಟ್ಟೆ ಬೆಲೆಯಂತೆ ಪ್ರತಿ ಎಕರೆಗೆ 11.33 ಲಕ್ಷ ರೂ. ಬೆಲೆ ನಿಗದಿ ಮಾಡಲಾಗಿದೆ. ನಗರದಿಂದ 5 ಕಿಮೀ ವ್ಯಾಪ್ತಿಯ ಹೊರಗಿರುವ ಕಾರಣ ಮೂಲ ಪರಿಹಾರ ಧನದ ದುಪ್ಪಟ್ಟು ಎಂದರೆ 22.67 ಲಕ್ಷ ರೂ. ಅದಕ್ಕೆ ಶೇ.100 ರಷ್ಟು ಸೊಲೇಶಿಯಂ(ನಷ್ಟ ಭರ್ತಿ)ಸೇರಿಸಿ ಪ್ರತಿ ಎಕರೆಗೆ ಒಟ್ಟಾರೆ 45.34 ಲಕ್ಷ ರೂ.ಪರಿಹಾರವಾಗಲಿದೆ. ಜಿಲ್ಲಾಧಿಕಾರಿ ತಮ್ಮ ಅಧಿಕಾರ ಬಳಸಿ 4.65 ಲಕ್ಷ ರೂ.ಗಳನ್ನು ಹೆಚ್ಚುವರಿಯಾಗಿ ನಿಗದಿಪಡಿಸಿದ್ದಾರೆ. ಒಟ್ಟಾರೆ ಪ್ರತಿ ಎಕರೆಗೆ 50 ಲಕ್ಷ ರೂ. ನೀಡಲಾಗುತ್ತಿದೆ.
