ಕೊಡಗು ಪ್ರವಾಸಿಗರ ಅಚ್ಚುಮೆಚ್ಚಿನ ತಾಣವಾಗಿದ್ದು, ರಾಜ್ಯ ಮಾತ್ರವಲ್ಲದೆ ಹೊರ ರಾಜ್ಯ, ವಿದೇಶಗಳಿಂದಲೂ ಇಲ್ಲಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಬರುತ್ತಾರೆ. ಇಲ್ಲಿಯ ಹವಾಮಾನ, ಸಂಸ್ಕೃತಿ, ಆಹಾರ ಪದ್ಧತಿಗಳು ಮದ್ಯ ಸೇವಿಸಲು ಪೂರಕವಾಗಿರುವುದರಿಂದ ಇಲ್ಲಿಯ ಮುಕ್ತ ವಾತಾವರಣದಲ್ಲಿ ಮದ್ಯಪಾನ ಮಾಡಿ ಎಂಜಾಯ್ ಮಾಡಲೆಂದೇ ಬಹುತೇಕ ಪ್ರವಾಸಿಗರು ಜಿಲ್ಲೆಯ ಪ್ರವಾಸ ಪ್ಲ್ಯಾನ್ ಮಾಡಿಕೊಳ್ಳುತ್ತಾರೆ. ಕಾರ್ಪೋರೇಟ್ ಮೀಟಿಂಗ್ಗಳು, ಕಂಪೆನಿಗಳ ಸಂಭ್ರಮಾಚರಣೆಗಳು, ವ್ಯಾವಹಾರಿಕ ಸಭೆಗಳೂ ಇಲ್ಲಿನ ರೆಸಾರ್ಟ್, ಹೋಮ್ ಸ್ಟೇಗಳಲ್ಲಿ ಸಾಮಾನ್ಯವಾಗಿ ನಡೆಯುತ್ತಿರುತ್ತದೆ. ಇಲ್ಲಿಯೂ ಮದ್ಯ ಬಳಕೆ ಯಥೇಚ್ಛವಾಗಿ ನಡೆಯುತ್ತದೆ.
ಬೇಸಿಗೆ ಅವಧಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಮದ್ಯ ಮಾರಾಟ ದಾಖಲಾಗುತ್ತದೆ. ನಿಶ್ಚಿತಾರ್ಥ, ಮದುವೆ, ನಾಮಕರಣದಂತಹ ಸಮಾರಂಭಗಳು ಈ ಅವಧಿಯಲ್ಲಿ ಹೆಚ್ಚು ಇರುವುದರಿಂದ ಮದ್ಯ ಬಳಕೆಯೂ ಜಾಸ್ತಿ ಆಗಿರುತ್ತದೆ. ಇದಲ್ಲದೆ ಮಾರ್ಚ್ನಿಂದ ಜೂನ್ ತನಕ ಪ್ರವಾಸಿ ಸೀಸನ್ ಕೂಡ ಆಗಿರುವುದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಜಿಲ್ಲೆಗೆ ಆಗಮಿಸುತ್ತಾರೆ. ಇದರಿಂದಾಗಿಯೂ ಸಹಜವಾಗಿ ಮದ್ಯ ಮಾರಾಟದಲ್ಲಿ ಹೆಚ್ಚಳ ಕಾಣಬಹುದಾಗಿದೆ. ಕೊರೊನಾ ಸಂಕಷ್ಟದ ಅವಧಿಯಲ್ಲಿ ಅಬಕಾರಿ ಇಲಾಖೆಯ ಗುರಿಗಿಂತ ಕಡಿಮೆ ಪ್ರಮಾಣದಲ್ಲಿ ಜಿಲ್ಲೆಯಲ್ಲಿ ಮದ್ಯ ಮಾರಾಟ ನಡೆದಿತ್ತು. ಆದರೆ ಈಗ ಮದ್ಯ ಮಾರಾಟದ ಪ್ರಮಾಣ ಚೇತರಿಕೆಯ ಹಾದಿಯಲ್ಲಿದ್ದು, ವರ್ಷದಿಂದ ವರ್ಷಕ್ಕೆ ಜಾಸ್ತಿ ಆಗುತ್ತಿದೆ. ನಕಲಿ ಮದ್ಯ, ಕಳ್ಳಬಟ್ಟಿ, ಅಕ್ರಮ ಸೇಂದಿ ವ್ಯಾಪಾರಕ್ಕೆ ಅಬಕಾರಿ ಇಲಾಖೆ ಮೂಲಕ ಕಡಿವಾಣ ಹಾಕಿದ್ದರಿಂದಲೂ ಮದ್ಯ ಮಾರಾಟದಲ್ಲಿ ಹೆಚ್ಚಳ ಕಾಣುವಂತಾಗಿದೆ.
