ಕೃಷ್ಣ ಮನುಷ್ಯನಲ್ಲ ಸ್ವಯಂ ಭಗವಂತ...

ಸುಗುಣೇಂದ್ರ ತೀರ್ಥ ಶ್ರೀಪಾದರ ಆಶೀರ್ವಚನ

ಚಾಂದ್ರ ಜನ್ಮಾಷ್ಟಮಿ ನಿಮಿತ್ತ ಸುವರ್ಣ ಪಥ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಶ್ರೀಕೃಷ್ಣ ದೇವರಲ್ಲ, ಆತ ಮನುಷ್ಯ ಎಂದು ಅನೇಕರು ಆಕ್ಷೇಪ ಮಾಡುತ್ತಾರೆ. ಆದರೆ, ಶ್ರೀಕೃಷ್ಣನ ಜನನ ಮನುಷ್ಯರಂತೆ ಆಗಿಲ್ಲ. ಯಾವ ಶಿಶುವೂ ಸಹ ಜನಿಸುವಾಗ ಆಭರಣ ಧರಿಸಿರುವುದಿಲ್ಲ, ಚತುರ್ಭುಜನಾಗಿ ಶಂಖ-ಚಕ್ರ-ಗಧೆಯಂತಹ ಆಯುಧ ಧರಿಸಿಯೇ ಯಾರೂ ಸಹ ಜಗತ್ತಿನಲ್ಲಿ ಈವರೆಗೆ ಜನಿಸಿಲ್ಲ. ಬಾಯಲ್ಲಿ ಯಾರೂ ಬ್ರಹ್ಮಾಂಡವನ್ನೂ ತೋರಿಸಿಲ್ಲ. ಕಂಸರಾದಿಯಾಗಿ ದುಷ್ಟ ರಕ್ಕಸರ ಸಂಹಾರಕ್ಕಾಗಿ ಹಾಗೂ ಸಮಸ್ತ ಮನುಕುಲದ ಉದ್ಧಾರಕ್ಕಾಗಿಯೇ ಭಗವಾನ್​ ವಿಷ್ಣುವೇ ಸ್ವಯಂ ಕೃಷ್ಣನಾಗಿ ಜನಿಸಿದ್ದಾನೆ ಎಂದು ಪರ್ಯಾಯ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

 ಭಕ್ತಿಯೇ ಜೀವನದ ಮೂಲ

ಸುವರ್ಣ ಪಥ ಉದ್ಘಾಟಿಸಿದ ಅಯೋಧ್ಯಾ ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್​ನ ಕೋಶಾಧ್ಯಕ್ಷ ಹಾಗೂ ಮಥುರಾ ಶ್ರೀಕೃಷ್ಣ ಜನ್ಮಭೂಮಿ ಟ್ರಸ್ಟ್​ನ ಉಪಾಧ್ಯಕ್ಷ ಸ್ವಾಮಿ ಗೋವಿಂದ ಗಿರಿ ಮಹಾರಾಜ್​ ಮಾತಾನಾಡಿ, ಅಹಂಕಾರಿಗಳಿಗೆ ಎಂದಿಗೂ ದೇವರ ಒಲುಮೆ ಲಭಿಸದು. ಕಾಮ, ಕ್ರೋಧ, ಮೋಹ, ಲೋಭ, ಮದ-ಮತ್ಸರಗಳೆಂಬ ದುಷ್ಟಕೂಟಗಳಿಗೆ ಅಂಹಕಾರವೇ ಸೇನಾಧಿಪತಿ. ಅಹಂಕಾರ ಕರಗಬೇಕೆಂದರೆ ನಿರಾಕಾರನಾದ ಭಗವಂತನ ಮೊರೆ ಹೋಗಬೇಕು. ಭಕ್ತಿಯಿಲ್ಲದ ಜೀವನ ನಶ್ವರ. ಭಕ್ತಿಯೇ ಜೀವನದ ಮೂಲ ಎಂದರು.

ಪ್ರಶಸ್ತಿ ಪ್ರದಾನ

ಸ್ವಾಮಿ ಗೋವಿಂದ ಗಿರಿ ಅವರಿಗೆ ರಾಮಕೃಷ್ಣ ಮಂದಿರ ಧುರಂಧರ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಸುಶ್ರೀಂದ್ರ ಶ್ರೀ ಸಾನ್ನಿಧ್ಯ ವಹಿಸಿದ್ದರು. ವಿದ್ವಾನ್​ ಷಣ್ಮುಖ ಆಚಾರ್ಯ ಪ್ರಶಸ್ತಿ ವಾಚಿಸಿದರು.

ರಥಬೀದಿಯಲ್ಲಿ ಶೋಭಾಯಾತ್ರೆ

ಕಾರ್ಯಕ್ರಮಕ್ಕೂ ಮೊದಲು ನೌಕಾದಳದ ನಿವೃತ್ತ ಯೋಧರು, ಎನ್​ಸಿಸಿ ಹಾಗೂ ಸ್ಕೌಟ್ಸ್​ ಆ್ಯಂಡ್​ ಗೈಡ್ಸ್​ ವಿದ್ಯಾರ್ಥಿಗಳು ಹಾಗೂ ಮಠದ ಭಕ್ತರು ಜನ್ಮಾಷ್ಟಮಿಯ ನಿಮಿತ್ತ ರಥಬೀದಿಯಲ್ಲಿ ಶೋಭಾಯಾತ್ರೆ ನಡೆಸಿದರು. ಕೃಷ್ಣ ಗೀತಾ ವೃಂದದಿಂದ ಭಗವದ್ಗೀತೆಯ ಆಯ್ದ ಶ್ಲೋಕಗಳ ಗಾಯನ ನಡೆಯಿತು. ಕೃಷ್ಣ ಪ್ರೀತ್ಯರ್ಥವಾಗಿ ಮಕ್ಕಳಿಂದ ಕೋಲಾಟ ನೃತ್ಯ ನಡೆಯಿತು.

ವಿದುಷಿ ಉಷಾ ಹೆಬ್ಬಾರ್​ ಪ್ರಾರ್ಥಿಸಿದರು. ಪ್ರತಿಮಾ ಜಯಪ್ರಕಾಶ ಆಚಾರ್ಯ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಠದ ವಿದ್ವಾಂಸ ಡಾ. ಬಿ.ಗೋಪಾಲ ಆಚಾರ್ಯ ಕಾರ್ಯಕ್ರಮ ನಿರೂಪಿಸಿದರು.

ಧ್ವಜಾರೋಹಣ, ಶ್ರೀಕೃಷ್ಣ ಮಂತ್ರ ಜಪ