ಮಾರುಕಟ್ಟೆಯಲ್ಲಿ ಬಾಳೆ ಹಣ್ಣು ಖರೀದಿಸಲು ದಲ್ಲಾಳಿಗಳು ಇಲ್ಲದ ಕಾರಣ ಬಾಳೆ ಬೆಳೆಗಾರರ ಗೋಳು ಹೇಳತೀರದಂತಾಗಿದೆ. ಬೇಡಿಕೆ ಇಲ್ಲದ್ದರಿಂದ ಬಾಳೆ ಹೊಲದಲ್ಲಿಯೇ ಕೊಳೆಯುತ್ತಿದೆ. ಇದರ ಕಟಾವಿಗೂ ರೈತರು ಮುಂದಾಗುತ್ತಿಲ್ಲ. ಅಥಣಿ ತಾಲೂಕಿನ ಬಳವಾಡ ಗ್ರಾಮದ ರೈತ ಲಕ್ಷ್ಮಣ ಕಾಂಬಳೆ ತಮ್ಮ 4 ಎಕರೆ ತೋಟದಲ್ಲಿ ಜಿ-9 ಜಲಗಾಂವ ತಳಿಯ ಸುಮಾರು 10 ಸಾವಿರ ಬಾಳೆ ಗಿಡಗಳನ್ನು ಬೆಳೆದಿದ್ದಾರೆ. ಉತ್ತಮ ಆದಾಯದ ನಿರೀಕ್ಷೆಯಲ್ಲಿದ್ದ ಅವರಿಗೆ ಕರೊನಾ ಸಮಸ್ಯೆ ತಂದೊಡ್ಡಿದೆ. ಕಟಾವಿಗೆ ಬಂದಿದ್ದ 6 ಸಾವಿರ ಗಿಡಗಳು ಗೊನೆ ಸಹಿತ ಹೊಲದಲ್ಲೇ ಬಿದ್ದು ಕೊಳೆಯುತ್ತಿವೆ. ಬಾಕಿ 4 ಸಾವಿರ ಗಿಡಗಳು ಬರುವ 10-15 ದಿನಗಳಲ್ಲಿ ಕಟಾವಿಗೆ ಬರುವ ಸಾಧ್ಯತೆಯಿದೆ. ಆದರೆ ಬೆಳೆ ರಪ್ತು ಮಾಡಲು ಸಾಧ್ಯವಾಗದಿರುವುದರಿಂದ ರೈತನ ಚಿಂತೆ ಹೆಚ್ಚುವಂತೆ ಮಾಡಿದೆ.
