ಮೆಟ್ರೋ ನಿಲ್ದಾಣ ಆತ್ಮಹತ್ಯೆ ಸ್ಪಾಟ್​? ಆರು ತಿಂಗಳಲ್ಲಿ ಮೂವರಿಂದ ಯತ್ನ, ಒಬ್ಬ ಸಾವು

ರಾಮ ಕಿಶನ್​ ಕೆ.ವಿ. ಬೆಂಗಳೂರು

ನಮ್ಮ ಮೆಟ್ರೋ ನಿಲ್ದಾಣಗಳು ಆತ್ಮಹತ್ಯೆ ತಾಣಗಳಾಗಿ ಬದಲಾಗುತ್ತಿವೆಯೇ ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕ ವಲಯದಲ್ಲಿ ಚರ್ಚೆಯಾಗುತ್ತಿದೆ. ಕಳೆದ 6 ತಿಂಗಳ ಅವಧಿಯಲ್ಲಿ ವಿವಿಧ ನಿಲ್ದಾಣಗಳಲ್ಲಿ ಆತ್ಮಹತ್ಯೆ ಯತ್ನಗಳು ನಡೆದಿದ್ದು, ಭದ್ರತಾ ಸಿಬ್ಬಂದಿಗಳಿಗೆ ಪ್ರಯಾಣಿಕರ ಚಲನವಲನ ಗಮನಿಸುವುದೇ ದೊಡ್ಡ ಸವಾಲಾಗಿದೆ. ಇದಕ್ಕೆ ಪರಿಹಾರೋಪಾಯವಾಗಿ ಸ್ವಯಂಚಾಲಿತ ಪ್ರವೇಶ ದ್ವಾರವನ್ನು (ಸ್ಕ್ರೀನ್​ಡೋರ್​) ಎಲ್ಲೆಡೆ ಅಳವಡಿಸಲು ಬಿಎಂಆರ್​ಸಿಎಲ್​ ಯೋಜನೆ ರೂಪಿಸಬೇಕಿದೆ ಎಂಬ ಆಗ್ರಹ ಸಾರ್ವಜನಿಕರಿಂದ ವ್ಯಕ್ತವಾಗಿದೆ.

ಹೊಸಹಳ್ಳಿ ನಿಲ್ದಾಣದಲ್ಲಿ ಸೋಮವಾರ ಯುವಕನೊಬ್ಬ ಪ್ಲಾಟ್​ಫಾರ್ಮ್​​ಗೆ ಹಾರಿ ಆತ್ಮಹತ್ಯೆಗೆ ಯತ್ನಿಸಿರುವುದು 'ನಮ್ಮ ಮೆಟ್ರೋ'ದಲ್ಲಿನ ಭದ್ರತಾ ಲೋಪದೋಷಗಳ ಮೇಲೆ ಮತ್ತೆ ಬೊಟ್ಟು ಮಾಡಲು ಮಾಡುವಂತಾಗಿದೆ.

ಈಗಾಗಲೇ ದೆಹಲಿ, ಚೆನ್ನೈ ಮೆಟ್ರೋ ನಿಲ್ದಾಣದ ಪ್ಲಾಟ್​ಫಾರ್ಮ್​ನಲ್ಲಿ ಪಿಎಸ್​ಡಿ (ಪ್ಲಾಟ್​ಫಾರ್ಮ್​ ಸ್ಕ್ರೀನ್​ಡೋರ್​) ಅಳವಡಿಕೆ ಮಾಡಲಾಗಿದೆ. ಆದರೆ, ನಮ್ಮ ಮೆಟ್ರೋ ಆರಂಭವಾಗಿ 13 ವರ್ಷಗಳು ಕಳೆದಿದ್ದರೂ ಪ್ಲಾಟ್​ಫಾರ್ಮ್​ನಲ್ಲಿ ಆ ತರನಾದ ಭದ್ರತಾ ಕ್ರಮಗಳನ್ನು ಅನುಷ್ಠಾನ ಮಾಡಿಲ್ಲ. ಸದ್ಯ ಇಂಟರ್​ಚೇಂಜ್​ ನಿಲ್ದಾಣವಾದ ನಾಡಪ್ರಭು ಕೆಂಪೇಗೌಡ ನಿಲ್ದಾಣದಲ್ಲಿ (ಮೆಜೆಸ್ಟಿಕ್​) ನೇರಳೆ ಮಾರ್ಗ ಹಾದುಹೋಗುವ ಪ್ಲಾಟ್​ಫಾರ್ಮ್​ನಲ್ಲಿ ಸ್ಟೀಲ್​ ರೇಲಿಂಗ್ಸ್​ಗಳನ್ನು ಅಳವಡಿಸಲಾಗಿದೆ. ಇದೇ ಕ್ರಮವನ್ನು ಎಲ್ಲೆಡೆ ಅನುಸರಿಸಬೇಕು ಎಂದು ಜನರು ಸಲಹೆ ನೀಡುತ್ತಿದ್ದಾರೆ.

ಪಿಎಸ್​ಡಿ ಕಾರ್ಯನಿರ್ವಹಣೆ ಹೇಗೆ?

ರೈಲು ಬರುವವರೆಗೆ ಪ್ಲಾಟ್​ಫಾರ್ಮ್​ನಲ್ಲಿರುವ 'ಸ್ಕ್ರೀನ್​ ಡೋರ್​' ಮುಚ್ಚಿಕೊಂಡಿರುತ್ತದೆ. ಆ ವೇಳೆ ಯಾರೂ ಹಳಿಯತ್ತ ಸಾಗಲು ಸಾಧ್ಯವಿಲ್ಲ. ರೈಲು ಆಗಮನವಾದಾಗ ಸ್ಕ್ರೀನ್​ ಡೋರ್​ ಸ್ವಯಂಚಾಲಿತವಾಗಿ ತೆರೆದುಕೊಳ್ಳುತ್ತದೆ. ಪ್ರಯಾಣಿಕರು ಒಳಪ್ರವೇಶಿಸಿ, ರೈಲು ತೆರಳಿದ ಬಳಿಕ ಸ್ಕ್ರೀನ್​ ಡೋರ್​ ಮತ್ತೆ ಮುಚ್ಚಿಕೊಳ್ಳುತ್ತದೆ.

ಇತರ ನಿಲ್ದಾಣಗಳಲ್ಲೂ ಅಳವಡಿಕೆ

ಪ್ರಯಾಣಿಕರ ಸುರಕ್ಷತೆಯನ್ನು ಹೆಚ್ಚಿಸಲು 5 ವರ್ಷದ ನಿರ್ವಹಣೆ ಸೇರಿ ಸಿಗ್ನಲಿಂಗ್​, ನಿಯಂತ್ರಣ, ಕಂಟ್ರೋಲಿಂಗ್​ ಮತ್ತು ಪ್ಲಾಟ್​ಫಾರ್ಮ್​ನಲ್ಲಿ ಸ್ಕ್ರೀನ್​ಡೋರ್​ ವಿನ್ಯಾಸ ನಿರ್ಮಾಣಕ್ಕಾಗಿ ಬಿಎಂಆರ್​ಸಿಎಲ್​ ಈಗಾಗಲೇ ಟೆಂಡರ್​ ಆಹ್ವಾನಿಸಿದೆ. ಇದನ್ನು ನೇರಳೆ ಮಾರ್ಗ ಹಂತ&2, 2ಎ ಮತ್ತು 2ಬಿ ಯೋಜನೆಯಲ್ಲಿ ಬರುವ ನಿಲ್ದಾಣ, ಗೊಟ್ಟಿಗೆರೆ&ನಾಗವಾರ (ಗುಲಾಬಿ ಮಾರ್ಗ) ಮಾರ್ಗಗಳಲ್ಲಿ ಅಳವಡಿಸಲಾಗುತ್ತದೆ. ಜತೆಗೆ ಇನ್ಫೋಸಿಸ್​ ಸಹಯೋಗದಲ್ಲಿ ನಿರ್ಮಾಣವಾಗುತ್ತಿರುವ ಎಲೆಕ್ಟ್ರಾನಿಕ್ಸ್​ ಸಿಟಿ ಕೋನಪ್ಪನ ಅಗ್ರಹಾರ ನಿಲ್ದಾಣದಲ್ಲೂ ಪಿಎಸ್​ಡಿ ಅಳವಡಿಸಲಾಗುತ್ತದೆ.

ಕೃತ್ಯಕ್ಕೆ ಆಹ್ವಾನ ನೀಡುವ ಪ್ಲಾಟ್​ಫಾರ್ಮ್

ಆತ್ಮಹತ್ಯೆ ಮಾಡಿಕೊಳ್ಳುವವರಿಗೆ ನಮ್ಮ ಮೆಟ್ರೋ ರೈಲು ನಿಲ್ದಾಣಗಳ ಪ್ಲಾಟ್​ಫಾರ್ಮ್​ಗಳು ಕೃತ್ಯಕ್ಕೆ ಆಹ್ವಾನ ನೀಡುವಂತಿವೆ. 2012ರ ಮಾರ್ಚ್​ನಲ್ಲಿ ಎಂ.ಜಿ. ರಸ್ತೆ ನಿಲ್ದಾಣದಲ್ಲಿ ಸೇಂಟ್​ ಜೋಸೆಫ್​ ಪಿಯು ಕಾಲೇಜಿನ ವಿದ್ಯಾರ್ಥಿಯೊಬ್ಬ ಆತ್ಮಹತ್ಯೆಗೆ ಶರಣಾಗಿದ್ದ. ಬಳಿಕ ಕಳೆದ ಮಾ.21ರಂದು ಅತ್ತಿಗುಪ್ಪೆ ನಿಲ್ದಾಣದಲ್ಲಿ ಮಹಾರಾಷ್ಟ್ರ ಮೂಲದ ಧ್ರುವ್​ ಠಕ್ಕರ್​ ಬದುಕನ್ನು ಕೊನೆಗೊಳಿಸಿಕೊಂಡಿದ್ದ. ಇದಲ್ಲದೆ ರೈಲು ಬರುವಾಗ ಸೆಲ್ಫಿ&ರೀಲ್ಸ್​ ಹುಚ್ಚು ಕೂಡ ಅನಾಹುತಗಳಿಗೆ ಎಡೆಮಾಡಿಕೊಡುತ್ತಿದೆ.

ಪ್ರಸಕ್ತ ವರ್ಷದಲ್ಲಿನ ಘಟನೆಗಳು

• ಇಂದಿರಾನಗರ ನಿಲ್ದಾಣದಲ್ಲಿ ಈ ವರ್ಷದ ಜ.1ರಂದು ಮಹಿಳೆಯೊಬ್ಬರು ಕೈಜಾರಿ ಬಿದ್ದ ಮೊಬೈಲ್​ ಹೆಕ್ಕಿಕೊಳ್ಳಲು ಹಳಿಗೆ ಇಳಿದಿದ್ದು, ಸಮಯ ಪ್ರಜ್ಞೆಯಿಂದ ಜೀವಹಾನಿ ಆಗಲಿಲ್ಲ.
• ಜಾಲಹಳ್ಳಿ ನಿಲ್ದಾಣದಲ್ಲಿ ಜ.5 ರಂದು ಯುವಕನೊಬ್ಬ ಆತ್ಮಹತ್ಯೆಗೆ ಯತ್ನಿಸಿ ಗಾಯಗೊಂಡಿದ್ದ.
• ಅಪರಿಚಿತ ವ್ಯಕ್ತಿಯೊಬ್ಬ ಮಾ.12ರಂದು ಜ್ಞಾನಭಾರತಿ ನಿಲ್ದಾಣ ವ್ಯಾಪ್ತಿಯ ಮೆಟ್ರೋ ವಯಡಕ್ಟ್​ನಲ್ಲಿ ಓಡಾಡಿದ್ದ!
• ಅತ್ತಿಗುಪ್ಪೆ ನಿಲ್ದಾಣದಲ್ಲಿ ಮಾ.21ರಂದು ಮಹಾರಾಷ್ಟ್ರ ಮೂಲದ ವಿದ್ಯಾರ್ಥಿ ರೈಲು ಬರುತ್ತಿದ್ದಾಗಲೇ ಹಳಿಗೆ ಹಾರಿ ಆತ್ಮಹತ್ಯೆ.