ಸಾಧಕ ಶರಣಪ್ಪ 1 ರಿಂದ 7ನೇ ತರಗತಿ ಪ್ರಾಥಮಿಕ ಶಿಕ್ಷಣವನ್ನು ತಮ್ಮ ತಂದೆ ಸೇವೆ ಸಲ್ಲಿಸುತ್ತಿದ್ದ ಜಗಾಪೂರದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಪೂರೈಸಿದರು. ನರಗುಂದ ಲಯನ್ಸ್ ಕನ್ನಡ ಮಾಧ್ಯಮ ಪ್ರೌಢ ಶಾಲೆಯಲ್ಲಿ 8ರಿಂದ 10ನೇ ತರಗತಿ ಕಲಿತು ಶೇ. 92 ಅಂಕಗಳೊಂದಿಗೆ ಶಾಲೆಗೆ ಪ್ರಥಮ ಸ್ಥಾನ ಪಡೆದಿದ್ದರು. ಹುಬ್ಬಳ್ಳಿಯ ಚೇತನ ಕಾಲೇಜ್ನಲ್ಲಿ ಶೇ. 91.68 ಅಂಕ ಪಡೆದರು. ತದನಂತರ 2017ರಲ್ಲಿ ನಡೆದ ನೀಟ್-ಯುಜಿ ಪ್ರವೇಶ ಪರೀಕ್ಷೆಯಲ್ಲಿ ಉತ್ತಮ ಅಂಕಗಳೊಂದಿಗೆ ಚೇತನ್ ಕಾಲೇಜ್ಗೆ ಪ್ರಥಮ ಸ್ಥಾನ ಪಡೆದಿದ್ದರು. ಬೆಳಗಾವಿ ವೈದ್ಯಕೀಯ ವಿಜ್ಞಾನಗಳ ಸಂಸ್ಥೆ (ಬಿಮ್್ಸ) ನಲ್ಲಿ ಎಂಬಿಬಿಎಸ್ ಸರ್ಕಾರಿ ಪ್ರವೇಶಾತಿ ಪಡೆದು 2022ರಲ್ಲಿ ವಿದ್ಯಾಭ್ಯಾಸ ಪೂರ್ಣಗೊಳಿಸಿದರು. 2023ರ ಏಪ್ರಿಲ್ನಲ್ಲಿ ಇಂಟರ್ನ್ಶಿಫ್ ಪೂರ್ಣಗೊಳಿಸಿದ್ದರು. ಆದರೀಗ ನಿರಂತರ ಅಧ್ಯಯನ, ಸತತ ಪ್ರಯತ್ನದ ಫಲವಾಗಿ 2024ರ ಆಗಸ್ಟ್ 11ರಂದು ನಡೆದ ನೀಟ್-ಪಿಜಿ ಪರೀಕ್ಷೆಯಲ್ಲಿ ದೇಶಕ್ಕೆ 9ನೇ ರ್ಯಾಂಕ್ ಪಡೆದು ನರಗುಂದದ ಕೀರ್ತಿ ಪತಾಕೆ ಎಲ್ಲೆಡೆ ರಾರಾಜಿಸುವಂತೆ ಮಾಡಿದ್ದಾರೆ. ಮುಂದಿನ ದಿನಗಳಲ್ಲಿ ಎಂಡಿ ಜನರಲ್ ಮೆಡಿಸನ್ ಅಥವಾ ಎಂಡಿ ರೇಡಿಯಾಲಜಿ ಕ್ಷೇತ್ರದಲ್ಲಿ ವಿಶೇಷ ಅಧ್ಯಯನಗೈಯುವ ಬಯಕೆ ಹೊಂದಿದ್ದಾರೆ.
