ಹಾವೇರಿಯಲ್ಲಿ ಪೌರ ಕಾರ್ವಿುಕರು, ಟಿಪ್ಪರ್ ಕೊರತೆ, ಹೆಚ್ಚುತ್ತಲೇ ಇದೆ ಕಸದ ಸಮಸ್ಯೆ

ಕೇಶವಮೂರ್ತಿ ವಿ.ಬಿ. ಹಾವೇರಿ

ಜಿಲ್ಲಾ ಕೇಂದ್ರವಾದ ಹಾವೇರಿ ನಗರಕ್ಕೆ ಕಸದ ಸಮಸ್ಯೆ ಕಾಡುತ್ತಿದೆ. ನಗರಸಭೆ ವ್ಯಾಪ್ತಿಯಲ್ಲಿ ಪೌರ ಕಾರ್ವಿುಕರು ಹಾಗೂ ಕಸದ ಟಿಪ್ಪರ್​ಗಳ ಕೊರತೆಯಿಂದ ಇದೀಗ ಸಮಸ್ಯೆ ಮತ್ತಷ್ಟು ಉಲ್ಬಣವಾಗಿದೆ.

ನಗರಸಭೆಯಲ್ಲಿ ಸದ್ಯಕ್ಕೆ 119 ಪೌರ ಕಾರ್ವಿುಕರಿದ್ದಾರೆ. ಇದರಲ್ಲಿ 32 ಕಾಯಂ, 45 ನೇರ ಪಾವತಿ, 20 ಹೊರಗುತ್ತಿಗೆ, 16 ಲೋಡರ್ಸ್, 6 ಕ್ಲೀನರ್ಸ್ ಸೇರಿದ್ದಾರೆ. ಮಂಜೂರಾದ 6 ಆರೋಗ್ಯ ನಿರೀಕ್ಷಕರ ಪೈಕಿ ನಾಲ್ವರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇದು 2010ರಲ್ಲಿ ಹಾವೇರಿ ನಗರಸಭೆಗೆ ಮಂಜೂರಾದ ಹುದ್ದೆಗಳ ಸಂಖ್ಯೆ. ನಂತರ ಈ ಹುದ್ದೆಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗಿಲ್ಲ. ಹೆಚ್ಚುತ್ತಿರುವ ನಗರದ ಜನಸಂಖ್ಯೆ, ಬೆಳವಣಿಗೆಗೆ ಅನುಗುಣವಾಗಿ ಪೌರ ಕಾರ್ವಿುಕರು ಹಾಗೂ ಇತರ ಸಿಬ್ಬಂದಿ ಸಂಖ್ಯೆ ಹೆಚ್ಚಿಸಿ, ಭರ್ತಿ ಮಾಡುವ ಅನಿವಾರ್ಯತೆ ಇದೆ.

ನಗರಸಭೆ ವ್ಯಾಪ್ತಿಯಲ್ಲಿ ಒಟ್ಟು 31 ವಾರ್ಡ್​ಗಳಿದ್ದು, ಸದ್ಯಕ್ಕೆ ಕೇವಲ 16 ಕಸದ ಟಿಪ್ಪರ್​ಗಳಿವೆ. ವಾರ್ಡ್​ಗೆ ಒಂದರಂತೆಯೂ ವಾಹನ ಸೌಲಭ್ಯವಿಲ್ಲ. ಇನ್ನು ಹೆಚ್ಚುವರಿಯಾಗಿ 30 ಪೌರ ಕಾರ್ವಿುಕರು ಹಾಗೂ 8 ವಾಹನಗಳ ಅವಶ್ಯಕತೆ ಇದೆ. ಖಾಲಿ ನಿವೇಶನಗಳಲ್ಲಿ ಕಸ ಎಸೆಯುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಹೀಗಾಗಿ ಸ್ವಚ್ಛತೆ ಜತೆಗೆ ಕಸದ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸಬೇಕು ಎಂಬುದು ನಗರದ ಜನತೆಯ ಆಶಯವಾಗಿದೆ.

ಚರಂಡಿ ದುರಸ್ತಿಪಡಿಸಿ

ನಗರಸಭೆ ಸಿವಿಲ್ ವಿಭಾಗದ ಕಳಪೆ ನಿರ್ವಹಣೆಯಿಂದಾಗಿ ನಗರದ ಬಹುತೇಕ ಚರಂಡಿಗಳು ಹಾಳಾಗಿವೆ. ಸರಿಯಾಗಿ ನೀರು ಹರಿಯುವುದಿಲ್ಲ. ಸ್ವಚ್ಛಗೊಳಿಸಿದ ಎರಡೇ ದಿನಕ್ಕೆ ಮತ್ತೆ ಕಸ, ಕಳೆ ಕಟ್ಟುತ್ತದೆ. ಹಾಗಾಗಿ, ಪೌರ ಕಾರ್ವಿುಕರು ಹೈರಾಣಾಗಿದ್ದಾರೆ. ನಗರದ ಎಲ್ಲ ಚರಂಡಿಗಳನ್ನು ದುರಸ್ತಿಪಡಿಸಿ, ಸರಾಗವಾಗಿ ನೀರು ಹರಿಯುವಂತೆ ಮಾಡಬೇಕಿದೆ.

ಎರಡು ದಿನಕ್ಕೊಮ್ಮೆ ಕಸ ಸಂಗ್ರಹ

ಪೌರ ಕಾರ್ವಿುಕರು ಮತ್ತು ಟಿಪ್ಪರ್​ಗಳ ಕೊರತೆಯಿಂದಾಗಿ ನಗರದ ಹಲವೆಡೆ ಎರಡು ದಿನಕ್ಕೊಮ್ಮೆ ಕಸ ಸಂಗ್ರಹಿಸಲಾಗುತ್ತಿದೆ. ಇರುವ ಸಿಬ್ಬಂದಿಗೆ ಒತ್ತಡ ಹೆಚ್ಚಾಗಿದೆ. ನಿತ್ಯವೂ ಒಂದೇ ಸಮಯಕ್ಕೆ ಸರಿಯಾಗಿ ಮನೆ ಮನೆಗೆ ತೆರಳಿ ಕಸ ಸಂಗ್ರಹಿಸಲು ಸಾಧ್ಯವಾಗದ ಕಾರಣ ಕೆಲ ಜನ ಖಾಲಿ ನಿವೇಶನ, ಚರಂಡಿಗಳಲ್ಲಿ ಕಸ ಎಸೆಯುತ್ತಿದ್ದಾರೆ. ಈ ಸಮಸ್ಯೆಯನ್ನು ನಗರಸಭೆ ಗಂಭೀರವಾಗಿ ಪರಿಗಣಿಸಬೇಕಿದೆ.