ಕೃಷಿ ಇಲಾಖೆಯ ಅಂದಾಜಿನಂತೆ ಎರಡೂವರೆ ಸಾವಿರದಿಂದ ಮೂರು ಸಾವಿರ ಎಕರೆ ಗದ್ದೆಗಳಲ್ಲಿ ಬದ್ರಾ ಅಥವಾ ಪಾಂಡ್ಯ, ಜಯಾ, ಕಗ್ಗ ಮತ್ತು ಹೈಬ್ರೀಡ್ ತಳಿ ಭತ್ತ ಬೆಳೆಯಲಾಗುತ್ತದೆ. ಈ ಪೈಕಿ ಬದ್ರಾ ಅಥವಾ ಪಾಂಡ್ಯ ತಳಿಯ ಭತ್ತದ ಸಸಿಗಳು ಕೀಟದ ದಾಳಿಗೆ ತುತ್ತಾಗಿ ವಿನಾಶದ ಅಂಚಿನಲ್ಲಿವೆ. ಇಲ್ಲಿನ 21 ಹಳ್ಳಿಗಳ ಪೈಕಿ 1500ದಿಂದ 2000 ಎಕರೆಗೂ ಹೆಚ್ಚಿನ ಗದ್ದೆಗಳಲ್ಲಿ ರೈತರು ಜಯಾ ತಳಿಯನ್ನು ಬಿತ್ತುತ್ತಾರೆ. ಪಾಂಡ್ಯದ ತಳಿಯನ್ನು ಹಾಳು ಮಾಡಿದ ಕೀಟಗಳು ಈಗ ಜಯಾ ತಳಿಯ ಸಸಿಗಳ ಮೇಲೂ ಆಕ್ರಮಣ ಆರಂಭಿಸಿವೆ. ತಾರಮಕ್ಕಿ, ದಂಡೆಭಾಗ, ಬೇಲೆಹಿತ್ತಲಿನ ಗದ್ದೆಗಳ ನಂತರ ಹತ್ತಿರದ ಬಾವಿಕೊಡ್ಲ, ಹೊಸ್ಕೇರಿ ಮುಂತಾದೆಡೆ ಜಯಾ ತಳಿಗಳ ಮೇಲೂ ಕೀಟ ಬಾಧೆ ಆವರಿಸಿದೆ.
