ವಿಜಯಪುರ : ಖಾಕಿ ಪಡೆಯ ಮಿಂಚಿನ ಕಾರ್ಯಾಚರಣೆ ಫಲವಾಗಿ ಮಿಸ್ ಆಗಿದ್ದ ಬೆಲೆ ಬಾಳುವ ಚಿನ್ನಾಭರಣ ಕೆಲವೇ ಗಂಟೆಗಳಲ್ಲಿ ವಾರಸುದಾರರ ಕೈ ಸೇರಿದೆ.
ವಿಜಯಪುರದ ರೈಲ್ವೆ ನಿಲ್ದಾಣದಿಂದ ಆಟೋ ಹತ್ತಿ ಬಸ್ ನಿಲ್ದಾಣಕ್ಕೆ ಬಂದಿಳಿದಿದ್ದ ದಂಪತಿ ಚಿನ್ನ ಹಾಗೂ ಬೆಳ್ಳಿ ಆಭರಣ ಇರುವ ಬ್ಯಾಗನ್ನು ಆಟೋದಲ್ಲಿಯೇ ಬಿಟ್ಟು ಹೋಗಿದ್ದರು. ಬಳಿಕ ಅರಿವಾಗಿ ಕಣ್ಣೀರು ಸುರಿಸಿದ್ದರು. ಆದರೆ, ಸಿಪಿಐ ಮಹಾಂತೇಶ ದ್ಯಾಮಣ್ಣವರ ನೇತೃತ್ವದ ತಂಡ ಮಿಂಚಿನ ಕಾರ್ಯಾಚರಣೆ ನಡೆಸಿ, ಚಿನ್ನಾಭರಣ ಪತ್ತೆ ಹಚ್ಚಿ ದಂಪತಿಗೆ ಹಿಂತಿರುಗಿಸಿದ್ದು, ಆ ದಂಪತಿ ತುಂಬು ಹೃದಯದಿಂದ ಕೃತತೆ ಸಲ್ಲಿಸಿದ್ದಾರೆ.
ಟನೆ ವಿವರ: ಜೈನಾಪುರ ಗ್ರಾಮದ ಸಂಗೀತಾ ರವೀಂದ್ರ ಯರನಾಳ ಎಂಬುವವರೇ ಚಿನ್ನಾಭರಣದ ವಾರಸುದಾರರು. ಗುರುವಾರ ರೈಲ್ವೆ ನಿಲ್ದಾಣದಿಂದ ಆಟೋದಲ್ಲಿ ಬರಬೇಕಾದರೆ ಬಸ್ ನಿಲ್ದಾಣದಲ್ಲಿ ಇಳಿಯುವಾಗ ಬ್ಯಾಗ್ ಆಟೋದಲ್ಲಿಯೇ ಬಿಟ್ಟಿದ್ದಾರೆ. ಬಳಿಕ ಆಟೋ ಚಾಲಕ ಮನೆಗೆ ಹೋಗಿದ್ದಾನೆ.
ಗಾಂಧಿ ಚೌಕ್ ಠಾಣೆಗೆ ಬಂದು ಅಳಲು ತೋಡಿಕೊಂಡ ದಂಪತಿ ಸ್ಥಿತಿಗೆ ಮರುಗಿದ ಪೊಲೀಸರು ಸಿಸಿ ಟಿವಿ ದೃಶ್ಯಾವಳಿ ಆಧರಿಸಿ, ಆಟೋ ನಂಬರ್ ಪಡೆದು, ಅದರ ವಿವರ ಕಲೆ ಹಾಕಿ, ಆಟೋ ಚಾಲಕ ಮನೆಗೆ ಹೋಗಿ ಬ್ಯಾಗ್ ಪಡೆದಿದ್ದಾರೆ.
ಆಟೋ ಚಾಲಕ ರಫೀಕ್ ಸಿರಾಜ್ ಗೆಣ್ಣೂರ್ ಯಥಾವತ್ತಾಗಿ ಆ ಬ್ಯಾಗ್ ಕಾಯ್ದಿರಿಸಿ ಪ್ರಾಮಾಣಿಕತೆ ಮೆರೆದಿದ್ದಾನೆ. ಹೀಗಾಗಿ ಚಿನ್ನಾಭರಣ ದಂಪತಿಗೆ ಒಪ್ಪಿಸುವ ಸಂದರ್ಭದಲ್ಲಿಯೇ ಆಟೋ ಚಾಲಕನನ್ನು ಪೊಲೀಸರು ಸನ್ಮಾನಿಸಿದ್ದಾರೆ.
ಅಪರಾಧ ವಿಭಾಗದ ಸಿಬ್ಬಂದಿಗಳಾದ ಅನಿಲ್ ದೊಡ್ಡಮನಿ, ರಾಜು ನಾಯಕ, ರಾಮನಗೌಡ ಬಿರಾದಾರ, ಬಾಬು ಗುಡಿಮಣಿ ಹಾಗೂ ಸಿದ್ದು ಬಿರಾದಾರ ಮತ್ತು ಸಿಸಿಟಿವಿ ಕಮಾಂಡ್ ಸೆಂರ್ಟನ್ ಸಿಬ್ಬಂದಿ ಗಿರೀಶ್ ಬ್ಯಾಕೋಡ ಕಾರ್ಯಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.
