ಹಳ್ಳಿ ಬೋಗಾದಿ ಬಡಾವಣೆಯಲ್ಲಿ ರಸ್ತೆಗಳ ಅಧ್ವಾನ

ಮೈಸೂರು: ನಗರದ ಕೆಲವು ಪ್ರಮುಖ ರಸ್ತೆಗಳು ಡಾಂಬರೀಕರಣದಿಂದ ಕಂಗೊಳಿಸುತ್ತಿದ್ದರೆ, ಕೆಲ ಬಡಾವಣೆಗಳ ರಸ್ತೆಗಳು ಮಾತ್ರ ಹೊಂಡ, ಗುಂಡಿಗಳಾಗಿ ಸಂಚರಿಸಲೂ ಆಗದ ದುಸ್ಥಿತಿಯಲ್ಲಿವೆ.

ಅಂತಹ ರಸ್ತೆಗಳಲ್ಲಿ ಹಳ್ಳಿ ಬೋಗಾದಿಯ ಸಿದ್ಧರಾಮೇಶ್ವರ ಕಲ್ಯಾಣ ಮಂಟಪದ ರಸ್ತೆ ( ಸಾಯಿ ಸರಸ್ವತಿ ಶಾಲೆಯ ಹಿಂದಿನ 30 ಅಡಿ ಅಗಲದ 300 ಅಡಿ ಉದ್ದದ ರಸ್ತೆ) ಅದರಲ್ಲಿ ಒಂದು.

ಈ ರಸ್ತೆಯಲ್ಲಿ ಗುಂಡಿಗಳದ್ದೇ ಸಾಮ್ರಾಜ್ಯ. ಇಕ್ಕಟ್ಟಾದ ಕಿರಿದಾದ ಈ ರಸ್ತೆಯಲ್ಲಿ ಗುಂಡಿ ತಪ್ಪಿಸಿ ಸಂಚರಿಸುವುದು ಕಷ್ಟಕರ. ಬೇಸಿಗೆ ಕಾಲದಲ್ಲಿ ಧೂಳುಮಯವಾಗುವ ಈ ರಸ್ತೆ, ಮಳೆಗಾಲದಲ್ಲಿ ಕೆಸರುಮಯವಾಗುತ್ತದೆ.

ತಾಲೂಕು ಆಡಳಿತಕ್ಕೆ ಒಳಪಡುವ ಈ ಚಿಕ್ಕ ರಸ್ತೆ ಈವರೆಗೆ ಡಾಂಬರ್ ಭಾಗ್ಯವನ್ನೇ ಕಂಡಿಲ್ಲ. ಸುತ್ತಮುತ್ತಲ ಪ್ರಮುಖ ರಸ್ತೆಗಳು, ಅಡ್ಡ ರಸ್ತೆಗಳಿಗೆ ಡಾಂಬರ್ ಹಾಕಿದ್ದು, ಈ ರಸ್ತೆ ಡಾಂಬರ್ ಹಾಕುವುದನ್ನು ಮರೆತಂತಿದೆ. ಜನ ವಸತಿ ಪ್ರದೇಶವಲ್ಲದೆ, ಸಿದ್ಧರಾಮೇಶ್ವರ ಕಲ್ಯಾಣ ಮಂಟಪ ಇರುವುದರಿಂದ ಇಲ್ಲಿ ನಿತ್ಯವೂ ಜನ, ವಾಹನಗಳ ಸಂಚಾರ ಹೆಚ್ಚಾಗಿಯೇ ಇರುತ್ತದೆ. ಸಂಬಂಧಿಸಿದವರು ಈ ರಸ್ತೆಯ ಗುಂಡಿ, ಹೊಂಡಗಳನ್ನು ಮುಚ್ಚಿ ಡಾಂಬರ್ ಹಾಕಿ ಸಂಚಾರಕ್ಕೆ ಯೋಗ್ಯ ರಸ್ತೆಯನ್ನಾಗಿ ಮಾಡಬೇಕಿದೆ.

ಮನೆ ನಿರ್ಮಿಸುತ್ತಿರುವ ಬಡಾವಣೆಯ ಕೆಲವರು ರಸ್ತೆಯಲ್ಲೇ ಜಲ್ಲಿ, ಸಿಮೆಂಟ್ ಹಾಕಿಕೊಂಡಿರುವುದರಿಂದ ವಾಹನಗಳ ಸಂಚಾರಕ್ಕೆ ಮತ್ತಷ್ಟು ತೊಂದರೆಯಾಗಿದೆ.

ಅನುದಾನ ಬಂದರೆ ದುರಸ್ತಿ:

ರಸ್ತೆ ಹದಗೆಟ್ಟಿರುವ ವಿಷಯ ನಮ್ಮ ಗಮನಕ್ಕೆ ಬಂದಿದೆ. ಸದ್ಯದಲ್ಲಿಯೇ ಅನುದಾನ ಬಂದರೆ ದುರಸ್ತಿ ಮಾಡುವುದಾಗಿ ಬೋಗಾದಿ ಗ್ರಾಮ ಪಂಚಾಯಿತಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.