ಹಾನಗಲ್ಲನಲ್ಲಿ ಜಾನುವಾರುಗಳ ಅಕ್ರಮ ವಧೆ ಅವ್ಯಾಹತ

ಹಾನಗಲ್ಲ: ಪಟ್ಟಣದ ಹೊರಭಾಗದಲ್ಲಿ ಅಧಿಕೃತ ಪರವಾನಗಿ ಹೊಂದಿರುವ ಜಾನುವಾರುಗಳ ವಧಾಲಯವಿದೆ. ಆದರೂ, ಜಾನುವಾರುಗಳನ್ನು ಎಲ್ಲೆಂದರಲ್ಲಿ ರಾತ್ರೋರಾತ್ರಿ ಕಡಿದು ಗೋವಾ, ಕಾರವಾರ, ಮುಂಡಗೋಡ ಸೇರಿದಂತೆ ಬೇರೆಡೆ ಮಾಂಸ ಸಾಗಿಸುವ ಜಾಲ ಪಟ್ಟಣದಲ್ಲಿ ಕಾರ್ಯಪ್ರವೃತ್ತವಾಗಿದೆ.

ಪಟ್ಟಣದ ಬೈಚವಳ್ಳಿ ರಸ್ತೆಯಲ್ಲಿ ಪರವಾನಗಿ ಹೊಂದಿರುವ ಅಧಿಕೃತ ಹಾಗೂ ಸುಸಜ್ಜಿತ ವಧಾಲಯ ಆರಂಭಿಸಲಾಗಿದೆ. ಆದರೆ, ಅಲ್ಲಿ ಜಾನುವಾರುಗಳನ್ನು ವಧಿಸಲು ಜಾನುವಾರು ಖರೀದಿಸಿದ ಬಗ್ಗೆ ರಸೀದಿ ಹೊಂದಿರಬೇಕು. ಇದಕ್ಕೆ ಹಣ ಪಾವತಿಸಬೇಕು. ವಧೆ ನಂತರ ಜಾನುವಾರುಗಳ ಚರ್ಮ, ಮೂಳೆಗಳು, ಕೊಂಬುಗಳನ್ನು ಅಲ್ಲಿಯೇ ಬಿಡಬೇಕಾಗುತ್ತದೆ. ಸಿಸಿ ಕ್ಯಾಮರಾದಲ್ಲಿ ಜಾನುವಾರುಗಳ ಚಿತ್ರ ದಾಖಲಾಗುತ್ತದೆ. ಹೀಗಾಗಿ ಅಧಿಕೃತ ವಧಾಲಯಕ್ಕೆ ತೆರಳದೇ, ಗುಪ್ತ ಜಾಗದಲ್ಲಿ ವಧೆ ಮಾಡಿ ಪ್ಲಾಸ್ಟಿಕ್ ಚೀಲಗಳಲ್ಲಿ ತುಂಬಿ ಬೇರೆಡೆ ಸಾಗಿಸುವ ದಂಧೆ ಜೋರಾಗಿದೆ.

ಅನಧಿಕೃತ ವಧೆ:

ಪಟ್ಟಣದ ರಾಜೀವ ನಗರ, ಕಂಬಳಗೇರಿ, ದರ್ಗಾ ಪ್ರದೇಶ, ಇಂದಿರಾನಗರ ಸೇರಿದಂತೆ ವಿವಿಧೆಡೆ ಜಾನುವಾರುಗಳನ್ನು ಅನಧಿಕೃತವಾಗಿ ವಧೆ ಮಾಡಲಾಗುತ್ತಿದೆ ಎಂಬ ಗಂಭೀರ ಆರೋಪಗಳಿವೆ. ಪಟ್ಟಣ ಸೇರಿದಂತೆ ಹೊರಭಾಗದ ಹೊಲಗಳು, ಫಾಮರ್್​ಹೌಸ್​ಗಳಲ್ಲಿ ಅನಧಿಕೃತ ಕಸಾಯಿಖಾನೆಗಳು ಚಾಲ್ತಿಯಲ್ಲಿವೆ. ನಿತ್ಯವೂ ನೂರಾರು ಆಕಳುಗಳನ್ನು ವಧಿಸಲಾಗುತ್ತಿದೆ. ಬಿಡಾಡಿ ದನಗಳು ಹಾಗೂ ಹಳ್ಳಿಗಳಲ್ಲಿ ರಾತ್ರಿ ಸಮಯದಲ್ಲಿ ಕಳವು ಮಾಡಿ ತಂದ ಜಾನುವಾರುಗಳನ್ನು ಯಾರಿಗೂ ಗೊತ್ತಾಗದಂತೆ ಕಡಿದು ಮಾಂಸ ಸಾಗಿಸಲಾಗುತ್ತಿದೆ. ಸ್ಥಳೀಯವಾಗಿ ಪುರಸಭೆಯಿಂದ ಮಾಂಸ ಮಾರಾಟಕ್ಕಾಗಿ ಮಳಿಗೆ ನೀಡಿರುವುದು ಅನಧಿಕೃತ ಮಾರಾಟಗಾರರಿಗೆ ಪರೋಕ್ಷವಾಗಿ ನೆರವಾದಂತಿದೆ.

ಗೋ-ಹತ್ಯೆ ನಿಷೇಧ ಕಾನೂನು ಜಾರಿಯಲ್ಲಿದ್ದರೂ, ಪುರಸಭೆ ದನದ ಮಾಂಸ ಮಾರಾಟಕ್ಕೆ ಮಳಿಗೆ ನೀಡಿರುವುದು ಸಾರ್ವಜನಿಕರಿಗೆ ಅಚ್ಚರಿಯನ್ನುಂಟು ಮಾಡಿದೆ. ಜಾನುವಾರು ವಧೆಯ ನಂತರ ತ್ಯಾಜ್ಯವನ್ನು ಪಟ್ಟಣದ ಹೊರವಲಯದಲ್ಲಿ ರಸ್ತೆಗಳ ಬದಿಯ ಪೊದೆಗಳಲ್ಲಿ ಎಸೆಯಲಾಗುತ್ತಿದೆ. ಇದರಿಂದ ಹೊರಸೂಸುವ ದುರ್ವಾಸನೆಯಿಂದ ಸಾರ್ವಜನಿಕರಿಗೆ ಕಿರಿಕಿರಿ ಆಗುತ್ತಿದೆ. ಇಷ್ಟೆಲ್ಲ ನಡೆಯುತ್ತಿದ್ದರೂ, ಅಕ್ರಮ ದಂಧೆ ತಡೆಯುವಲ್ಲಿ ಸಂಬಂಧಪಟ್ಟ ಇಲಾಖೆ, ಅಧಿಕಾರಿಗಳು ಮುಂದಾಗದಿರುವುದು ಹಿಂದುಪರ ಸಂಘಟನೆಗಳ ಆಕ್ರೋಶಕ್ಕೆ ಕಾರಣವಾಗಿದೆ.

ಗೋಹತ್ಯೆ ನಿಷೇಧ ಕಾನೂನು ಜಾರಿಯಲ್ಲಿದೆ. 1964ರ ಗೋ ಹತ್ಯಾ ನಿಷೇಧ ಕಾನೂನಿಗೆ 2021ರಲ್ಲಿ ತಿದ್ದುಪಡಿ ಮಾಡಿ ಜಾನುವಾರುಗಳ ವಧೆ, ಮಾಂಸ ಮಾರಾಟ ಮಾಡಲು ಕಠಿಣ ನಿಯಮ ಜಾರಿಗೊಳಿಸಲಾಗಿದೆ. ಇದಕ್ಕೆ ತಪ್ಪಿದರೆ ಜಾಮೀನು ರಹಿತ ಬಂಧನ, ಮೂರರಿಂದ ಏಳು ವರ್ಷದವರೆಗೆ ಜೈಲು ಶಿಕ್ಷೆ ವಿಧಿಸಬಹುದಾಗಿದೆ.