ನರೇಗಾ ಅಕ್ರಮ, 43 ನೌಕರರಿಗೆ ಶಿಕ್ಷೆ ಖಾತ್ರಿ: 18 ಸಿಬ್ಬಂದಿ ವಜಾ, 9 ಪಿಡಿಒಗಳ ಸಸ್ಪೆಂಡ್

ದಾವಣಗೆರೆ: ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿ ಹಣ ದುರುಪಯೋಗ, ನಕಲಿ ಜಾಬ್ ಕಾರ್ಡ್ ಸೃಷ್ಟಿ ಸೇರಿದಂತೆ ನಿಯಮಾವಳಿ ಉಲ್ಲಂಘಿಸಿದ ಜಗಳೂರು ತಾಲೂಕಿನ 22 ಗ್ರಾ.ಪಂ.ಗಳ 43 ನೌಕರರ ವಿರುದ್ಧ ದಾವಣಗೆರೆ ಜಿಲ್ಲಾ ಪಂಚಾಯಿತಿ ಶಿಸ್ತು ಕ್ರಮ ಕೈಗೊಳ್ಳುವ ಮೂಲಕ ರಾಜ್ಯಕ್ಕೆ ಮಾದರಿಯಾಗಿದೆ.

ಪಿಡಿಒ, ಡಿಇಒ, ತಾಂತ್ರಿಕ ಸಹಾಯಕರು ಸೇರಿದಂತೆ 18 ಜನರನ್ನು ಸೇವೆಯಿಂದ ವಜಾ ಮಾಡಿ ಆದೇಶ ಹೊರಡಿಸಲಾಗಿದ್ದರೆ, 9 ಪಿಡಿಒಗಳನ್ನು ಅಮಾನತು ಪಡಿಸಲಾಗಿದೆ. 16 ನೌಕರರಿಗೆ ಎಚ್ಚರಿಕೆ ನೋಟಿಸ್ ಜಾರಿ ಮಾಡಲಾಗಿದೆ. ಸರ್ಕಾರಕ್ಕೆ ನಷ್ಟ ಮಾಡಿದ ಹಿನ್ನೆಲೆಯಲ್ಲಿ 19 ನೌಕರರಿಗೆ 5.66ಲಕ್ಷ ರೂ.ದಂಡ ವಿಧಿಸಿದ್ದು ವಾರದೊಳಗೆ ಪಾವತಿಸಲು ಸೂಚಿಸಲಾಗಿದೆ. ವಜಾ ಆದವರ ಪೈಕಿ ನಾಲ್ವರು ಇಂಜಿನಿಯರ್, ಏಳು ಜನ ಡೇಟಾ ಆಪರೇಟರ್ಸ್ ಹೊರಗುತ್ತಿಗೆಯಡಿ ಕೆಲಸ ಮಾಡುತ್ತಿದ್ದರು.

ಮೈಸೂರು , ಬೀದರ್, ಶಿವಮೊಗ್ಗ, ರಾಮನಗರ ಜಿಪಂ ಉಪ ಕಾರ್ಯದರ್ಶಿಗಳ ನೇತೃತ್ವದ ರಾಜ್ಯ ಮಟ್ಟದ ತನಿಖಾ ತಂಡದ ವರದಿ ಆಧರಿಸಿ ಕ್ರಮ ಕೈಗೊಳ್ಳಲಾಗಿದೆ ಎಂದು ದಾವಣಗೆರೆ ಜಿಪಂ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಪದ್ಮಾ ಬಸವಂತಪ್ಪ ಗುರುವಾರ ತಿಳಿಸಿದ್ದಾರೆ. 2017-18, 2018-19ನೇ ಸಾಲಿನ ಕಾಮಗಾರಿಗಳ ಬಗ್ಗೆ ದೂರು ಕೇಳಿ ಬಂದ ಹಿನ್ನೆಲೆಯಲ್ಲಿ ರಾಜ್ಯ ಗ್ರಾಮೀಣಾಭಿವೃದ್ಧಿ ಆಯುಕ್ತರು ತನಿಖೆಗೆ ಆದೇಶಿಸಿದ್ದರು.

ಜಿಪಂ ಇತಿಹಾಸದಲ್ಲೇ ಮೊದಲು

ದಾವಣಗೆರೆ ಜಿಪಂ ಇತಿಹಾಸದಲ್ಲಿ ಇಷ್ಟೊಂದು ದೊಡ್ಡ ಸಂಖ್ಯೆಯ ನೌಕರರ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುತ್ತಿರುವುದು ಇದೇ ಮೊದಲು. ಅಕ್ರಮಕ್ಕೆ ಪ್ರಚೋದನೆ ನೀಡಿದ ಪ್ರಭಾವಿಗಳು ಬಚಾವಾಗಿದ್ದು, ಅವರ ವಿರುದ್ಧವೂ ಕ್ರಮ ಕೈಗೊಳ್ಳಬೇಕು ಎಂದು ಸಿಇಒ ಹಾಗೂ ಸದಸ್ಯರು ಕೋರಿದರು.

ತನಿಖಾ ತಂಡ ಗುರುತಿಸಿದ ಲೋಪ

• ವಿವಿಧ ಪಂಚಾಯಿತಿಗಳಲ್ಲಿ ನಕಲಿ ಜಾಬ್ ಕಾರ್ಡ್ ಗಳ ಸೃಷ್ಟಿ
• ಕೂಲಿಕಾರರು-ಯಂತ್ರ ಬಳಕೆಯಲ್ಲಿ ಶೇ. 60: 40ರ ಅನುಪಾತ ನಿರ್ವಹಿಸದಿರುವುದು
• ಕೆರೆ ಹೂಳೆತ್ತುವಾಗ ಷರತ್ತು ಮೀರಿ ಒಂದೇ ಕೆರೆಯನ್ನು ವಿವಿಧ ಭಾಗವಾಗಿ ವಿಂಗಡಣೆ
• ಪಲ್ಲಾಗಟ್ಟೆಯಲ್ಲಿ ಏಳು ಅನರ್ಹ ಕಟ್ಟಡಗಳಿಗೆ ಕಾಂಪೌಂಡ್ ನಿರ್ಮಾಣ
• ಕಬ್ಬಿಣ ಖರೀದಿ ಲೆಕ್ಕವನ್ನು ಅಳತೆ ಪುಸ್ತಕದಲ್ಲಿ ನಮೂದಿಸಿ ವೋಚರ್​ನಲ್ಲಿ ಕೈ ಬಿಟ್ಟಿರುವುದು
• ಪಲ್ಲಾಗಟ್ಟೆಯಲ್ಲಿ ನಿಯಮಬಾಹಿರವಾಗಿ 321 ಜಾಬ್ ಕಾರ್ಡ್​ಗಳ ರದ್ದು ್ಝ ಬಿಳಿಚೋಡಿನಲ್ಲಿ ತೋಟಗಾರಿಕೆ ಇಲಾಖೆಗೆ ಸಂಬಂಧಿಸಿದ ಕಾಮಗಾರಿ ಗ್ರಾಪಂನಿಂದ ಅನುಷ್ಠಾನ
• ಬಿಳಿಚೋಡು ಪೊಲೀಸ್ ಠಾಣೆ, ಆಸ್ಪತ್ರೆ ಉದ್ಯಾನದ ಒಂದೇ ಕಾಮಗಾರಿ 2 ಭಾಗವಾಗಿ ವಿಂಗಡಣೆ
• ಬಿಸ್ತುವಳ್ಳಿಯಲ್ಲಿ 282 ಜನರಿಗೆ ಕೂಲಿ ಪಾವತಿ ಬಳಿಕ ಜಾಬ್​ಕಾರ್ಡ್ ರದ್ದುಪಡಿಸಿ ಹಣ ದುರ್ಬಳಕೆ
• ಚೆಕ್ ಡ್ಯಾಂ, ಫೀಡರ್ ನಾಲೆ ನಿರ್ವಣಕ್ಕೆ ಅಂದಾಜು ವೆಚ್ಚಕ್ಕಿಂತ ಹೆಚ್ಚು ಮೊತ್ತ ಪಾವತಿ

https://www.vijayavani.net/states-are-responsible-for-migrant-workers-supreme-court/