ವರದಿಯಲ್ಲಿ ಏನಿದೆ : 2024 -25ನೇ ಸಾಲಿನಲ್ಲಿ ಜಿಪಂ ನಿಧಿಯಡಿ ನಿಗದಿತ ಕಾರ್ಯ ವಿಧಾನ ಅನುಸರಿಸದೆ ಔಷಧಿ ಮತ್ತು ಸಲಕರಣೆ ಖರೀದಿಸಲು ಟೆಂಡರ್ ಕರೆಯಲಾಗಿದೆ. ಇಂಡೆಟ್ ಪಡೆಯದೆ ಖರೀದಿ ನಡೆದಿದೆ. ಖರೀದಿಗೆ ಹಣ ಪಾವತಿಸಲು ವೈದ್ಯರು ನೇರವಾಗಿ ಖಜಾನೆಗೆ ಬಿಲ್ ಸಲ್ಲಿಸಿದ್ದಾರೆ. ಅವರಿಗೆ ಐದು ಲಕ್ಷ ರೂ. ಮಾತ್ರ ಈ ರೀತಿ ಮಾಡಬಹುದು. ಆದರೆ, ಹೊಸಪೇಟೆಯ ಡಾ.ಗುರುದೇವ ವಾಸುದೇವ್ ರೆಡ್ಡಿ 39 ಲಕ್ಷ ರೂ. ಗಳವರೆಗೆ ಖರೀದಿ ಮಾಡಿದ್ದಾರೆ. ಅಗತ್ಯವಿಲ್ಲದ ಮತ್ತು ಅಗತ್ಯಕ್ಕಿಂತ ಹೆಚ್ಚು ಖರೀದಿ ಮಾಡಲಾಗಿದೆ. ಸ್ಕೀಂ ಚೇಂಬರ್, ಅಲ್ಮೇರ, ಪೀಠೋಪಕರಣ ಖರೀದಿಸಿ ಬಳಸಿಲ್ಲ. ಔಷಧಿಯನ್ನು ಮಾರುಕಟ್ಟೆ ದರಕ್ಕಿಂತ ಹೆಚ್ಚು ನೀಡಿ ಖರೀದಿಸಿದೆ. ತನಿಖೆ ವೇಳೆ ಸ್ಟಾಕ್ ಬುಕ್, ಇ ವೇ ಬಿಲ್ ನೀಡಿಲ್ಲ , ಸಾಮಗ್ರಿ ಸ್ವೀಕರಿಸಿದೆ ಹಣ ಪಾವತಿ ಮಾಡಿದೆ. ಆಯುಷ್ ಅಧಿಕಾರಿ ಅವರು 2024 -25ನೇ ಅವಧಿಯಲ್ಲಿ ಮೂರು ಕೋಟಿ ರೂ. ವೆಚ್ಚದಲ್ಲಿ ಪೀಠೋಪಕರಣ ಮತ್ತು ಸಾಮಗ್ರಿಗಳನ್ನು ಖರೀದಿ ಮಾಡಿದ್ದಾರೆ. 2023 -24ನೇ ಸಾಲಿನಲ್ಲಿ ಇದೇ ರೀತಿ ಭ್ರಷ್ಟಾಚಾರ ನಡೆದಿರುವ ಸಾಧ್ಯತೆಯಿದೆ. ಒಟ್ಟಾರೆ ಹಣಕಾಸಿನ ದುರುಪಯೋಗ, ಖರೀದಿ ಮಾನದಂಡಗಳ ಉಲ್ಲಂಘನೆ ವಂಚನೆ ಕಂಡು ಬಂದಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
