ಚಿಕ್ಕಬಳ್ಳಾಪುರ: ಸಾಯೋ ವಯಸ್ಸು ಬಂದು ಬಿಟ್ಟಿದೆ. ಇಂತಹ ಸ್ಥಿತಿಯಲ್ಲೂ ಕಚೇರಿಗಳಿಗೆ ಅಲೆ ಅಲೆದು ಸುಸ್ತಾಗಿದ್ದೇನೆ, ಕೆಲಸ ಆಗುತ್ತದೆ ಎಂದರೆ ಹೇಳಿ, ಇಲ್ಲದಿದ್ದಲ್ಲಿ ಆಗಲ್ಲ ಎಂದಾದರೂ ಸರಿ, ಒಂದಂತೂ ಈಗಲೇ ಸ್ಪಷ್ಟಪಡಿಸಿ.
ಇವು ಚಿಕ್ಕಬಳ್ಳಾಪುರ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ ಮಂಚೇನಹಳ್ಳಿ ಭಾಗದಲ್ಲಿ ಶಾಸಕ ಪ್ರದಿಪ್ ಈಶ್ವರ್ ನೇತೃತ್ವದಲ್ಲಿ ಕೈಗೊಂಡಿದ್ದ ಗ್ರಾಮ ಸಂಚಾರ ಹಾಗೂ ಸಾರ್ವಜನಿಕ ಅಹವಾಲು ಸ್ವೀಕಾರ ಸಭೆಯಲ್ಲಿ ವೃದ್ಧ ಖಡಾ ಖಂಡಿತವಾಗಿ ಹೇಳಿದ ಮಾತು. ಇದಕ್ಕೆ ಸ್ಥಳದಲ್ಲಿದ್ದ ಅಧಿಕಾರಿಗಳು ಹಾಗೂ ಮುಖಂಡರು ಒಂದು ಕ್ಷಣ ಅವಕ್ಕಾದರು. ವೃದ್ಧನ ನೋವಿಗೆ ಧ್ವನಿಗೂಡಿಸಿದ ಶಾಸಕರು ಸಹ ಅಧಿಕಾರಿಗಳ ಕಾರ್ಯ ವೈಖರಿಗೆ ಅಸಮಾಧಾನ ವ್ಯಕ್ತಪಡಿಸಿ, ನಿಗದಿತ ಅವಧಿಯಲ್ಲಿ ಕೆಲಸ ಮುಗಿಸಲು ಖಡಕ್ ಸೂಚನೆ ನೀಡಿದರು.
8 ವರ್ಷಗಳಿಂದಲೂ ಕಚೇರಿಗೆ ಅಲೆಯಲಾಗುತ್ತಿದೆ. ಅರ್ಜಿ ಹಿಡಿದುಕೊಂಡು ಬಂದು ಹೇಳಿ ಹೇಳಿ ಸಾಕಾಗಿದೆ. ಯಾರೂ ಆಲಿಸುತ್ತಿಲ್ಲ. ಕೇವಲ ಸುಳ್ಳು ಭರವಸೆ ನೀಡಿ ವಾಪಸ್ ಕಳುಹಿಸುತ್ತಿದ್ದಾರೆ. ಇದರಿಂದ ರೋಸಿ ಹೋಗಿದ್ದೇನೆ. ಈಗಲಾದರೂ ಕೆಲಸ ಮುಗಿಸಿಕೊಡಲು ಆಗುತ್ತಾ ಇಲ್ಲವೇ ಆಗುವುದಿಲ್ಲವೇ? ಎನ್ನುವುದನ್ನು ಸ್ಪಷ್ಟಪಡಿಸಲಿ, ಉತ್ತರ ಕೇಳಿಕೊಂಡು ಸುಮ್ಮನಾಗುವೆ ಎಂದು ವೃದ್ಧ ಆಕ್ರೋಶದಲ್ಲಿ ಅಸಮಾಧಾನ ವ್ಯಕ್ತಪಡಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಶಾಸಕರು, ಜನರು ವರ್ಷಾನುಗಟ್ಟಲೇ ಕಚೇರಿಗೆ ಅಲೆದಾಡಿಸುವುದು ಸರಿಯಲ್ಲ. ಅರ್ಜಿಯನ್ನು ಪರಿಶೀಲಿಸಿ, ನಿಯಮಾನುಸಾರ ಕೆಲಸ ಮಾಡಿಕೊಡಬೇಕು ಎಂದು ಸೂಚಿಸಿದರು.
