ತಹಸೀಲ್ದಾರ್​ ಕುರ್ಚಿಗಾಗಿ ಹೈಡ್ರಾಮಾ!

ಬಂಗಾರಪೇಟೆ: ತಾಲೂಕು ಕಚೇರಿಯಲ್ಲಿ ಇಬ್ಬರು ತಹಸೀಲ್ದಾರ್​ಗಳ ಮಧ್ಯೆ ಕುರ್ಚಿಗಾಗಿ ಶನಿವಾರ ಹೈಡ್ರಾಮಾವೇ ನಡೆದಿದೆ. ತಾಲೂಕಿನಿಂದ ವರ್ಗಾವಣೆಯಾಗಿದ್ದ ಎಸ್​.ವೆಂಕಟೇಶಪ್ಪ ನ್ಯಾಯಾಲಯದಿಂದ ತಡೆಯಾಜ್ಞೆ ತಂದಿದ್ದು, ಈ ಮಧ್ಯೆ ನೇಮಕವಾದ ನೂತನ ತಹಸೀಲ್ದಾರ್​ ಸುಜಾತಾ ಮಧ್ಯೆ ಕುರ್ಚಿ ಫೈಟ್​ ಏರ್ಪಟ್ಟಿದೆ. ಸದ್ಯ ಕುರ್ಚಿ, ಕಾರ್​ ದುರುಪಯೋಗ ಪೊಲೀಸ್​ ಠಾಣೆ ಮೆಟ್ಟಿಲೇರಿದೆ.

ಡಿ.31ರಂದು ಬಂಗಾರಪೇಟೆ ತಹಸೀಲ್ದಾರ್​ ಎಸ್​.ವೆಂಕಟೇಶಪ್ಪ ಅವರನ್ನು ಜಿಲ್ಲಾಧಿಕಾರಿ ಕಚೇರಿಯ ಪುರಸಭಾ ತಹಸೀಲ್ದಾರ್​ ಹುದ್ದೆಗೆ ವರ್ಗಾಯಿಸಿ ಸರ್ಕಾರ ಆದೇಶ ಹೊರಡಿಸಿತ್ತು. ತೆರವಾದ ಸ್ಥಾನಕ್ಕೆ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಮುಜರಾಯಿ ತಹಸೀಲ್ದಾರರಾಗಿದ್ದ ಕೆ.ಎನ್​ ಸುಜಾತಾ ಅವರನ್ನು ನೇಮಕ ಮಾಡಿ ಎಂದು ಸರ್ಕಾರದ ಕಂದಾಯ ಇಲಾಖೆಯ ಅಧೀನ ಕಾರ್ಯದರ್ಶಿ ಮುಕ್ತಾರ್​ಪಾಷಾ ಆದೇಶ ಹೊರಡಿಸಿದ್ದರು. ಆದರೆ, ವರ್ಗಾವಣೆಯನ್ನು ಪ್ರಶ್ನಿಸಿ ಕೆಎಟಿಗೆ ತರಳಿದ್ದ ವೆಂಕಟೇಶಪ್ಪಗೆ ಶುಕ್ರವಾರ ತಡೆಯಾಜ್ಞೆ ಸಿಕ್ಕಿದೆ. ಹಾಗಾಗಿ ತಡೆಯಾಜ್ಞೆ ಆದೇಶ ಪ್ರತಿಯೊಂದಿಗೆ ಬಂಗಾರಪೇಟೆ ತಾಲೂಕು ಕಚೇರಿಗೆ ಶನಿವಾರ ಹಾಜರಾದರು. ಆದರೆ ತಾಲೂಕು ಕಚೇರಿಯ ತಹಸೀಲ್ದಾರ್​ ಕೊಠಡಿ ಮತ್ತು ಸಭಾಂಗಣಕ್ಕೆ ಬೀಗ ಜಡಿಯಲಾಗಿತ್ತು. ಇದರಿಂದ ವಿಚಲಿತರಾದ ವೆಂಕಟೇಶಪ್ಪ ಬೇರೊಂದು ಕೊಠಡಿಯಲ್ಲಿ ಕೂತರು. ನೂತನ ತಹಸೀಲ್ದಾರ್​ ಸುಜಾತಾ ತಾಲೂಕು ಕಚೇರಿಗೆ ಆಗಮಿಸಿ ಕಚೇರಿಯ ಬೀಗ ತೆರೆದು ಆಸನದಲ್ಲಿ ಕೂತರು.

ತಹಸೀಲ್ದಾರ್​ಗಳ ಮಧ್ಯೆ ಜಗಳ: ಈ ಮಧ್ಯೆ, ವೆಂಕಟೇಶಪ್ಪ ಹಾಗೂ ತಹಸೀಲ್ದಾರ್​ ಸುಜಾತಾ ನಡುವೆ ತಹಸೀಲ್ದಾರ್​ ಕೊಠಡಿಯ ಕುರ್ಚಿಗಾಗಿ ಜಗಳವೇ ನಡೆಯಿತು. ಕೆಲಕಾಲ ಕಚೇರಿಯಲ್ಲಿ ಹೈಡ್ರಾಮವೂ ನಡೆಯಿತು.

ಹೊಂದಾಣಿಕೆ ಕೊರತೆ: 5 ತಿಂಗಳ ಹಿಂದೆಯಷ್ಟೇ ತಹಸೀಲ್ದಾರ್​ ಎಸ್​.ವೆಂಕಟೇಶಪ್ಪ ಅವರನ್ನು ತಾಲೂಕಿಗೆ ಶಾಸಕ ಎಸ್​.ಎನ್​ ನಾರಾಯಣಸ್ವಾಮಿ ಹಾಕಿಸಿಕೊಂಡು ಬಂದಿದ್ದರು. ಆರಂಭದಲ್ಲಿ ಇಬ್ಬರೂ ಚೆನ್ನಾಗಿದ್ದರಾದರೂ ನಂತರದ ದಿನಗಳಲ್ಲಿ ಶಾಸಕ ಹಾಗೂ ತಹಸೀಲ್ದಾರರ ನಡುವೆ ಹೊಂದಾಣಿಕೆ ಕೊರತೆ ಉಂಟಾಗಿತ್ತು.

ಕಾರು ಕಳವು ಪ್ರಕರಣ: ಜಿಲ್ಲಾಧಿಕಾರಿಗಳಿಂದ ವರ್ಗಾವಣೆ ಹಾಗೂ ರಿಲೀವಿಂಗ್​ ಲೆಟರ್​ ನೀಡಿದರೆ ನಾನು ವಾಪಸ್​ ತೆರಳುವೆ. ಈ ಸಂಬಂಧ ಯಾವುದೇ ಆದೇಶ ಮೇಲಧಿಕಾರಿಗಳಿಂದ ಬಂದಿಲ್ಲ. ಆದ್ದರಿಂದ, ನಾನು ಎಲ್ಲಿಗೂ ಹೋಗಲ್ಲ. ನನ್ನ ವಾಹನವನ್ನು ವರ್ಗಾವಣೆಗೊಂಡಿರುವ ತಹಸೀಲ್ದಾರ್​ ವೆಂಕಟೇಶಪ್ಪ ದುರ್ಬಳಕೆ ಮಾಡಿಕೊಂಡಿದ್ದಾರೆ. ಈ ಬಗ್ಗೆ ಪೊಲೀಸ್​ ಠಾಣೆಯಲ್ಲಿ ಕಳ್ಳತನ ಪ್ರಕರಣದ ದೂರು ನೀಡುವೆ ಎಂದು ತಹಸೀಲ್ದಾರ್​ ಸುಜಾತಾ ಪತ್ರಕರ್ತರ ಪ್ರಶ್ನೆಗೆ ಉತ್ತರಿಸಿದರು. ಅಂತೆಯೇ, ಪಟ್ಟಣ ಠಾಣೆಯಲ್ಲಿ ತಹಸೀಲ್ದಾರ್​ ವೆಂಕಟೇಶಪ್ಪ ಹಾಗೂ ಡ್ರೈವರ್​ ನಾಗೇಶ್​ ವಿರುದ್ಧ ದೂರು ದಾಖಲಾಗಿದೆ.