ಆರ್.ಕೃಷ್ಣ ಮೈಸೂರು
‘ಲಕ್ಷ ವೃಕ್ಷೋತ್ಸವ’ ಸಂಕಲ್ಪ ತೊಟ್ಟಿದ್ದ ಎಚ್.ವಿ.ರಾಜೀವ್ ಸ್ನೇಹ ಬಳಗ, ಅದನ್ನು ಯಶಸ್ಸಿಯಾಗಿ ಪೂರೈಸುವ ಮೂಲಕ ಸಾಮಾಜಿಕ ಕಾರ್ಯದಲ್ಲಿ ತೊಡಗಿದೆ. ಹಸಿದವರಿಗೆ ಅನ್ನ ನೀಡುವಂತೆ ಪರಿಸರ ಉಳಿವಿಗೆ ತನ್ನದೇ ಅದ ವಿಶಿಷ್ಟ ಕೊಡುಗೆ ನೀಡುತ್ತಾ ಬಂದಿರುವ ಸ್ನೇಹ ಬಳಗ, ನಗರದಲ್ಲಿ ಒಂದು ಲಕ್ಷ ಸಸಿಗಳನ್ನು ನೆಟ್ಟು ಅವುಗಳನ್ನು ಪೋಷಣೆ ಕೂಡಾ ಮಾಡಿದ್ದಾರೆ.
ಮೈಸೂರು ರಾಜರ ಕಾಲದಿಂದಲೂ ಯೋಜನಾ ಬದ್ಧವಾಗಿ ಬೆಳೆದಿರುವ ನಗರ, ಇತ್ತೀಚಿನ ವರ್ಷದಲ್ಲಿ ನಗರ ಬೆಳೆದಂತೆ ಮರಗಳ ಹನನ ಹೆಚ್ಚಾಗಿ ತಾಪಮಾನ ಏರಿಕೆ ಕಂಡಿತ್ತು. ಹೀಗಾಗಿ ಐದು ವರ್ಷಗಳ ಹಿಂದೆ ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷರಾಗಿದ್ದ ಎಚ್.ವಿ.ರಾಜೀವ್ ನೇತೃತ್ವದಲ್ಲಿ ಬಳಗವು ಒಂದು ಲಕ್ಷ ಸಸಿಗಳನ್ನು ನೆಡುವ ಸಂಕಲ್ಪ ಮಾಡಿತು.
ಗಿಡ-ಮರಗಳನ್ನು ಬೆಳೆಸುವುದು ಅರಣ್ಯ ಇಲಾಖೆಗೆ ಮಾತ್ರ ಸಂಬಂಧಿಸಿದಲ್ಲ. ನಾವಿಂದು ಮರಗಳನ್ನು ಕಡಿಯುತ್ತಿರುವ ಪ್ರಮಾಣ ನೋಡಿದರೆ, ಮನೆಗೊಬ್ಬರಂತೆ ಒಂದೊಂದು ಗಿಡಗಳನ್ನು ನೆಟ್ಟು ಬೆಳೆಸಬೇಕಿದೆ. ಅಲ್ಲದೆ ಪ್ರತಿಯೊಬ್ಬರಲ್ಲಿಯೂ ಗಿಡ-ಮರಗಳನ್ನು ಬೆಳೆಸುವ ಮನೋಭಾವನೆ ಬರಬೇಕು. ಪ್ರಕೃತಿ ಇದ್ದರೆ ನಾವು, ಮನೆಗೊಂದು ಮರ ಸಾಲದು, ಒಬ್ಬರಿಗೊಂದು ಮರ ಎನ್ನುವ ಪರಿಕಲ್ಪನೆಯೊಂದಿಗೆ ಲಕ್ಷ ವೃಕ್ಷೋತ್ಸವ ಚಾಲನೆ ನೀಡಲಾಯಿತು.
ಜಾಗತಿಕ ತಾಪಮಾನದಲ್ಲಾಗುತ್ತಿರುವ ಬದಲಾವಣೆಯನ್ನು ಗಮನದಲ್ಲಿಟ್ಟುಕೊಂಡು ನಗರದ ವಾತಾವರಣಕ್ಕೆ ತಕ್ಕಂತೆ ಅರಳಿ, ಬೇವು, ಆಲ, ಮಹಾಘನಿ, ಬೇಲ, ಹೊಂಗೆ, ಕಾಡುಬೆಂಡೆ ಸೇರಿದಂತೆ ಹಲವು ಬಗೆಯ ಕಾಡು ಜಾತಿಯ ಗಿಡಗಳನ್ನು ಎದೆ ಎತ್ತರಕ್ಕೆ ಬೆಳೆಸುತ್ತಿದ್ದರು. ಅಲ್ಲದೇ ಸಾರ್ವಜನಿಕರಿಗೆ, ಸಂಘ, ಸಂಸ್ಥೆಗಳಿಗೆ ಉಚಿತವಾಗಿ ವಿತರಣೆ ಮಾಡುವ ಮೂಲಕ ಪ್ರಕೃತಿ ಉಳಿಸುವ ಕಾರ್ಯದಲ್ಲಿ ತೊಡಗಿಕೊಳ್ಳಲಾಗಿದೆ.
ಸಣ್ಣ ಸಸಿಗಳನ್ನು ನೀಡಿದರೆ ಅವುಗಳಲ್ಲಿ ಸಾಕಷ್ಟು ಸಸಿಗಳು ಬೆಳೆಯಲು ಸಾಧ್ಯವಾಗದೆ ಸತ್ತು ಹೋಗುವ ಸಾಧ್ಯತೆ ಇದೆ. ಹಾಗಾಗಿ ಒಂದರಿಂದ ಎರಡು ವರ್ಷಗಳ ವರೆಗೆ ಸಸಿಗಳನ್ನು ಪೋಷಿಸಿ ಸ್ವಲ್ಪ ಎತ್ತರಕ್ಕೆ ಬೆಳೆದ ಬಳಿಕ ಅವುಗಳನ್ನು ವಿತರಣೆ ಮಾಡಲಾಗುತ್ತಿದೆ. ಬೆಳೆದ ಗಿಡಗಳು ಸ್ವಾವಲಂಭಿಗಳಾಗಿ ಬೆಳೆಯುವ ಜತೆಗೆ ಎತ್ತರ ಇರುವುದರಿಂದ ಹಸು, ಕುರಿಗಳ ಬಾಯಿಗೆ ತುತ್ತಾಗದೆ ಬಹುತೇಕ ಗಿಡಗಳು ಬದುಕಿ ಬೆಳೆಯುತ್ತವೆ.
