ಮೆಣಸಿನಕಾಯಿ ವಹಿವಾಟಿನಲ್ಲಿ ಭಾರಿ ಇಳಿಕೆ

ಬ್ಯಾಡಗಿ: ದೇಶದಲ್ಲಿ ಮೆಣಸಿನಕಾಯಿ ವ್ಯಾಪಾರಕ್ಕೆ ಪ್ರಸಿದ್ಧಿ ಪಡೆದ ಬ್ಯಾಡಗಿ ಮಾರುಕಟ್ಟೆಯಲ್ಲಿ 2024-25ನೇ ಸಾಲಿನಲ್ಲಿ ವಹಿವಾಟು ಇಳಿಮುಖಗೊಂಡಿದ್ದು, ಮಾರುಕಟ್ಟೆ ಶುಲ್ಕ ಸಂಗ್ರಹದಲ್ಲೂ ಭಾರಿ ಕುಸಿತವಾಗಿದೆ.

2022-23ರಲ್ಲಿ ಮಾರುಕಟ್ಟೆ 2287 ಕೋಟಿ ರೂ. ವಹಿವಾಟು ನಡೆಸಿದ್ದು, ಎಪಿಎಂಸಿಗೆ 13.72 ಕೋಟಿ ರೂ. ಶುಲ್ಕ ಸಂಗ್ರಹವಾಗಿತ್ತು. 2023-24ರಲ್ಲಿ 3187 ಕೋಟಿ ರೂ. ವಹಿವಾಟು ನಡೆಸಿ, 19.12 ಕೋಟಿ ರೂ. ಸೆಸ್ ಸಂಗ್ರಹವಾಗಿದೆ. ಹಿಂದಿನ ಎಲ್ಲ ವರ್ಷಗಳಿಗೆ ಹೋಲಿಕೆ ಮಾಡಿದಲ್ಲಿ ವಹಿವಾಟು ದಾಖಲೆ ತಲುಪಿತ್ತು. ಆದರೆ, 2024-25ರಲ್ಲಿ ಬರೀ 2067 ಕೋಟಿ ರೂ. ವಹಿವಾಟು ನಡೆಸಿದ್ದು, ಕಳೆದ ವರ್ಷಕ್ಕಿಂತ ಸಾವಿರ ಕೋಟಿ ರೂ. ಇಳಿಕೆಯಾಗಿದೆ.

ಮೆಣಸಿನಕಾಯಿ ಬೆಳೆ ಹೆಚ್ಚಳ: ಕಳೆದ ಹತ್ತು ವರ್ಷಗಳ ಹಿಂದಿಗಿಂತ ಸದ್ಯ ಮಾರುಕಟ್ಟೆಯ ವಹಿವಾಟು ದ್ವಿಗುಣವಾಗಿದೆ. ರಾಜ್ಯದ ಬಳ್ಳಾರಿ, ರಾಯಚೂರು, ಗದಗ, ಅಂತೂರು, ಬೆಂತೂರು, ಚಿತ್ರದುರ್ಗ, ಆಂಧ್ರಪ್ರದೇಶಕ್ಕೆ ಹೊಂದಿಕೊಂಡ ಗ್ರಾಮಗಳಿಂದ ಮೆಣಸಿನಕಾಯಿ ಬೆಳೆ ಮಾರಾಟಕ್ಕೆ ತರಲಾಗುತ್ತಿದೆ. ಹಿಂದಿನ ವರ್ಷ ಮೆಣಸಿನಕಾಯಿ ಬೆಲೆ ಕ್ವಿಂಟಾಲ್​ಗೆ 40 ರಿಂದ 50 ಸಾವಿರ ರೂ.ವರೆಗೆ ಇತ್ತು. ಹೀಗಾಗಿ, ಮೆಣಸಿನಕಾಯಿಯನ್ನು ನೀರಾವರಿಯಲ್ಲೂ ಬೆಳೆಯಲು ಶುರು ಮಾಡಿದ್ದಾರೆ. ಪರಿಣಾಮ ಮಾರುಕಟ್ಟೆಗೆ ಪ್ರಸಕ್ತ ಸಾಲಿನಲ್ಲಿ ವಿಪರೀತ ಮೆಣಸಿನಕಾಯಿ ಟೆಂಡರ್​ಗೆ ಬಂದಿದೆ. ಬೆಳೆಯು ಹೆಚ್ಚು ಆವಕವಾಗುತ್ತಿರುವುದರಿಂದ ಬೆಲೆಯಲ್ಲಿ ವ್ಯತ್ಯಾಸ ಕಾಣಿಸಿಕೊಂಡಿದೆ.

ಮಾರುಕಟ್ಟೆ ಶುಲ್ಕ ಸಂಗ್ರಹ ಇಳಿಕೆ: ಮಾರುಕಟ್ಟೆಯಲ್ಲಿ ಮೆಣಸಿನಕಾಯಿ ಬೆಲೆ ಹಾಗೂ ವಹಿವಾಟು ಆಧರಿಸಿ ಶುಲ್ಕ ಸಂಗ್ರಹವಾಗುತ್ತದೆ. ಮೆಣಸಿನಕಾಯಿ ಬೆಲೆ ಇಳಿಮುಖವಾದ ಪರಿಣಾಮ ಮಾರುಕಟ್ಟೆಯ ಶುಲ್ಕ ಸಂಗ್ರಹಕ್ಕೂ ಹೊಡೆತ ಬಿದ್ದಿದೆ. 2024-25ರಲ್ಲಿ 28 ಕೋಟಿ ರೂ. ಶುಲ್ಕ ಸಂಗ್ರಹ ಗುರಿ ನಿಗದಿಪಡಿಸಲಾಗಿತ್ತು. ಆದರೆ, ಕೇವಲ 12.40 ಕೋಟಿ ರೂ. ಸಂಗ್ರಹವಾಗಿದೆ. ಗುರಿಯ ಶೇ. 46ರಷ್ಟು ಸಂಗ್ರಹವಾಗಿದ್ದು, ಶೇ. 50 ಗುರಿ ದಾಟದಿರುವುದರಿಂದ ಮಾರುಕಟ್ಟೆ ಸಮಿತಿ ಆದಾಯಕ್ಕೆ ದೊಡ್ಡ ನಷ್ಟವಾಗಿದೆ.

ದಶಕದ ಮೆಣಸಿನಕಾಯಿ ವಹಿವಾಟು ವಿವರ

• ವರ್ಷ                 ಕ್ವಿಂಟಾಲ್             ಶುಲ್ಕ ಸಂಗ್ರಹ (ಕೋಟಿರೂ.)
• 2015-16        8,61,916                 9.31
• 2016-17        9,80,960               12.90
• 2017-18        11,93,053              15.60
• 2018-19       10,41,073              13.79
• 2019-20       13,95,931              15.14
• 2020-21       8,42,230               18.92
• 2021-22       11,22,802              12.07
• 2022-23       9,90,002              13.72
• 2023-24       17,00,090            19.12
• 2024-25       18,03,854            12.40