ವಿರೂಪಾಕ್ಷಯ್ಯ ಗುದ್ನಯ್ಯನವರಮಠ ಹುಬ್ಬಳ್ಳಿ
ಹುಬ್ಬಳ್ಳಿಯ ಗೋಕುಲ ರಸ್ತೆಯಲ್ಲಿರುವ ಪ್ರಾದೇಶಿಕ ವಿಧಿ ವಿಜ್ಞಾನ ಪ್ರಯೋಗಾಲಯ (ಆರ್ಎಫ್ಎಸ್ಎಲ್) ಆರಂಭವಾಗಿದ್ದು ಅನುಕೂಲವಾಗಿದೆ. 2024ರ ಜನವರಿಯಿಂದ ಈವರೆಗೆ ಒಂದೂವರೆ ವರ್ಷದಲ್ಲಿ 3,655 ಪ್ರಕರಣಗಳು ವಿಶ್ಲೇಷಣೆಗೆ ದಾಖಲಾಗಿವೆ. ಈ ಪೈಕಿ 3,622 ಪ್ರಕರಣಗಳನ್ನು ವಿಶ್ಲೇಷಣೆ ಮಾಡಿ ತನಿಖಾಧಿಕಾರಿಗಳಿಗೆ ವರದಿ ನೀಡಿದ್ದಾರೆ. ತಕ್ಷಣಕ್ಕೆ ವರದಿ ಸಿಗುತ್ತಿರುವುದರಿಂದ ಪ್ರಕರಣ ವಿಲೇಗೆ ಅನುಕೂಲವಾಗಿದೆ.
ಪ್ರಯೋಗಾಲಯಕ್ಕೆ ಬಂದ ಪೈಕಿ ಡಿಎನ್ಎ ಕುರಿತ ಪ್ರಕರಣಗಳು ಹೆಚ್ಚು ದಾಖಲಾಗಿದ್ದು, ಮಹಿಳೆ ಮತ್ತು ಮಕ್ಕಳು, ಪೋಕ್ಸೋಗೆ ಸಂಬಂಧಿಸಿದಂತೆ ಡಿಎನ್ಎ ವಿಭಾಗಕ್ಕೆ 2,120 ಪ್ರಕರಣ, ಆಡಿಯೋ-ವಿಡಿಯೋ ಫೊರೆನ್ಸಿಕ್ಗೆ 616, ಕಂಪ್ಯೂಟರ್ ಫೊರೆನ್ಸಿಕ್ 39, ಮೊಬೈಲ್ 555, ಭೌತಶಾಸ್ತ್ರ ವಿಭಾಗಕ್ಕೆ 155, ನಾಕೋಟಿಕ್ಸ್ ವಿಭಾಗದಲ್ಲಿ 170 ಕೇಸ್ಗಳು ದಾಖಲಾಗಿದ್ದು, ಅಂದಾಜು 10 ಸಾವಿರ ವಿವಿಧ ಬಗೆಯ ಮಾದರಿ ವಿಶ್ಲೇಷಣೆಗೆ ಒಳಪಡಿಸಲಾಗಿದೆ.
ಹುಬ್ಬಳ್ಳಿಯಲ್ಲಿ ಆರ್ಎಫ್ಎಸ್ಎಲ್ ಸ್ಥಾಪಿಸಿದ್ದರಿಂದ ಈ ಭಾಗದ ವಿಶ್ಲೇಷಣೆ ವರದಿಗೆಂದು ತನಿಖಾಧಿಕಾರಿಗಳು ಬೆಂಗಳೂರಿಗೆ ಹೋಗುವುದು ತಪ್ಪಿದೆ. ಇದರಿಂದ ತನಿಖಾಧಿಕಾರಿಗಳ ಸಮಯ, ಇಲಾಖೆಯ ಹಣ ಉಳಿತಾಯವಾಗಿದೆ. ಬೇಗ ವರದಿ ದೊರೆಯುವುದರಿಂದ ಸಂಬಂಧಿಸಿದವರಿಗೆ ತ್ವರಿತವಾಗಿ ನ್ಯಾಯ ದೊರಕಿಸಲು ಸಾಧ್ಯವಾಗಿದೆ ಎನ್ನುತ್ತಾರೆ ಹುಬ್ಬಳ್ಳಿ ಆರ್ಎಫ್ಎಸ್ಎಲ್ ಅಧಿಕಾರಿಗಳು.
17 ಜಿಲ್ಲೆಗಳ ವ್ಯಾಪ್ತಿ: ಹುಬ್ಬಳ್ಳಿ ಆರ್ಎಫ್ಎಸ್ಎಲ್ 17 ಜಿಲ್ಲಾ ಕೇಂದ್ರ, ಮೂರು ಕಮಿಷನರೇಟ್ ವ್ಯಾಪ್ತಿ ಹೊಂದಿದೆ. ಧಾರವಾಡ, ಗದಗ, ಹಾವೇರಿ, ಉತ್ತರ ಕನ್ನಡ, ಬೆಳಗಾವಿ, ಬಾಗಲಕೋಟೆ, ವಿಜಯಪುರ, ಬಳ್ಳಾರಿ, ದಾವಣಗೆರೆ, ಕೊಪ್ಪಳ, ಚಿತ್ರದುರ್ಗ, ಶಿವಮೊಗ್ಗ, ರಾಯಚೂರು, ಯಾದಗಿರಿ, ಬೀದರ್, ಕಲಬುರಗಿ, ವಿಜಯನಗರ ಹಾಗೂ ಹುಬ್ಬಳ್ಳಿ- ಧಾರವಾಡ, ಕಲಬುರಗಿ, ಬೆಳಗಾವಿ ಕಮಿಷನರೇಟ್ ವ್ಯಾಪ್ತಿ ಒಳಗೊಂಡಿದೆ. ಆರು ವಿಭಾಗ ಕಾರ್ಯ ನಿರ್ವಹಣೆ: ಆರ್ಎಫ್ಎಸ್ಎಲ್ನಲ್ಲಿ ಡಿಎನ್ಎ ವಿಭಾಗ, ಭೌತಶಾಸ್ತ್ರ, ಮೊಬೈಲ್ ಫೋನ್ ಫೊರೆನ್ಸಿಕ್, ಕಂಪ್ಯೂಟರ್ ಫೊರೆನ್ಸಿಕ್, ಆಡಿಯೋ ಮತ್ತು ವಿಡಿಯೋ ಫೊರೆನ್ಸಿಕ್, ನಾಕೋಟಿಕ್ಸ್ ಸೇರಿದಂತೆ ಆರು ವಿಭಾಗಗಳಿವೆೆ. ಡಿಎನ್ಎ ವಿಶ್ಲೇಷಣೆಯು ಲೈಂಗಿಕ ಅಪರಾಧಗಳು, ಮಾನವ ಗುರುತಿಸುವಿಕೆ, ಪಿತೃತ್ವ-ಹೆರಿಗೆ ವಿವಾದಗಳು ಮತ್ತು ಮಕ್ಕಳ ವಿನಿಮಯಕ್ಕೆ ಸಂಬಂಧಿಸಿರುತ್ತವೆ. ಡಿಜಿಟಲ್ ಫೊರೆನ್ಸಿಕ್ ಲೈಂಗಿಕ ಅಪರಾಧಗಳು, ಚಿತ್ರಗಳ ಮಾರ್ಫಿಂಗ್, ಆಡಿಯೋ, ವಿಡಿಯೋ ದೃಢೀಕರಣ ಮತ್ತು ಐಟಿ ಕಾಯ್ದೆಗೆ ಸಂಬಂಧಿಸಿರುತ್ತವೆ. ಭೌತಶಾಸ್ತ್ರ ವಿಭಾಗದಲ್ಲಿ ರಸ್ತೆ ಅಪಘಾತಗಳು, ಹಿಟ್ ಆಂಡ್ ರನ್ ಪ್ರಕರಣ, ವಾಹನಗಳಲ್ಲಿ ಟ್ಯಾಂಪರಿಂಗ್, ಗುರುತು ಮತ್ತು ಹೋಲಿಕೆ, ದೃಢೀಕರಣದ ಪ್ರಕರಣ, ಕಾಪಿ ರೈಟ್ಗೆ ಸಂಬಂಧಿಸಿದಂತೆ ವಿವಿಧ ವಸ್ತುಗಳ ನೈಜತೆ ಮತ್ತು ಭೌತಿಕ ಹೊಂದಾಣಿಕೆ ವಿಶ್ಲೇಷಣೆ ಮಾಡಲಾಗುತ್ತದೆ.
ಎನ್ಎಬಿಎಲ್ ಮಾನ್ಯತೆ: ಹುಬ್ಬಳ್ಳಿ ಆರ್ಎಫ್ಎಸ್ಎಲ್ಗೆ 2024ರ ಮೇನಲ್ಲಿ ಎನ್ಎಬಿಎಲ್ (ನ್ಯಾಷನಲ್ ಅಕ್ರೆಡಿಟೇಷನ್ ಬೋರ್ಡ್ ಫಾರ್ ಟೆಸ್ಟಿಂಗ್ ಆಂಡ್ ಕ್ಯಾಲಿಬರೇಷನ್ ಲ್ಯಾಬೋರೆಟರೀಸ್) ಮಾನ್ಯತೆ ದೊರೆತಿದೆ. ಈ ವರ್ಷ ಬಿಎಸ್ಸಿ, ಎಂಎಸ್ಸಿ ಪದವಿ ಪಡೆದ 19 ವಿದ್ಯಾರ್ಥಿಗಳಿಗೆ 1 ತಿಂಗಳ ಇಂಟರ್ನ್ಶಿಪ್ ತರಬೇತಿ ನೀಡಲಾಗಿದೆ.
57 ಕಡೆ ತೆರಳಿದ ಮೊಬೈಲ್ ಫೊರೆನ್ಸಿಕ್ : ಇಲ್ಲಿ ಸಂಚಾರ ವಿಧಿ ವಿಜ್ಞಾನ ಪ್ರಯೋಗಾಲಯ (ಮೊಬೈಲ್ ಫೊರೆನ್ಸಿಕ್ ಸೈನ್ಸ್ ಲ್ಯಾಬ್) ವಾಹನವಿದೆ. ತನಿಖಾಧಿಕಾರಿಗಳ ಕೋರಿಕೆ ಮೇರೆಗೆ ಒಂದೂವರೆ ವರ್ಷದಲ್ಲಿ 57 ಘಟನಾ ಸ್ಥಳಕ್ಕೆ ತೆರಳಿ ಅಲ್ಲಿ ದೊರೆತ ಭೌತಿಕ ಕುರುಹುಗಳನ್ನು ಸಂಗ್ರಹಿಸಿ, ವಿಶ್ಲೇಷಣೆಗೆ ಒಳಪಡಿಸಿ, ತನಿಖಾಧಿಕಾರಿಗಳಿಗೆ ವರದಿ ನೀಡಲಾಗಿದೆ.
