ಸದಾ ಬಾಗಿಲು ಮುಚ್ಚಿರುವ ಆರೋಗ್ಯ ಕೇಂದ್ರ

ಇಂಡಿ: ಜನರ ಆರೋಗ್ಯ ಕಾಪಾಡುವ ಉದ್ದೇಶದಿಂದು ಸರ್ಕಾರ ಅನೇಕ ಯೋಜನೆಗಳನ್ನು ರೂಪಿಸುತ್ತಿದೆ. ಆದರೆ ಸರ್ಕಾರದ ಯೋಜನೆಯ ಲಾಭ ಸಾರ್ವಜನಿಕರಿಗೆ ಸಮರ್ಪಕವಾಗಿ ತಲುಪುತ್ತಿಲ್ಲ ಎಂಬುದುಕ್ಕೆ ಇಲ್ಲೊಂದು ತಾಜಾ ಉದಾರಣೆ ಇದೆ.

ತಾಲೂಕಿನ ಬಬಲಾದ ಗ್ರಾಮದ ಎ.ಎನ್​.ಎಂ.(ಆರೋಗ್ಯ ಮತ್ತು ೇಮ ಕೇಂದ್ರ)ಕ್ಕೆ ಸದಾ ಬೀಗ ಹಾಕಿರುತ್ತದೆ. ಸಾರ್ವಜನಿಕರು ಪ್ರತಿದಿನ ಬಂದು ವಾಪಸ್​ ಹೋಗುತ್ತಿದ್ದಾರೆ.

ಬಬಲಾದ ಹಾಗೂ ಹಳಗುಣಕಿ ಗ್ರಾಮಗಳ ಜನರಿಗೆ ಅನುಕೂಲವಾಗಲಿ ಎಂಬ ಸದ್ದುದೇಶದಿಂದ ಸರ್ಕಾರ ಬಬಲಾದ ಗ್ರಾಮದಲ್ಲಿ ಆಯುಷ್ಮಾನ್​ ಆರೋಗ್ಯ ಮಂದಿರ ಸುಸಜ್ಜಿತ ಕಟ್ಟಡ ಕಟ್ಟಿದ್ದು, ಅಲ್ಲಿ ಸಿಬ್ಬಂದಿ ಸರಿಯಾಗಿ ಕಾರ್ಯ ನಿರ್ವಹಿಸದ ಕಾರಣ ಸಾರ್ವಜನಿಕರಿಗೆ ಉಪಯೋಗಕ್ಕೆ ಬಾರದಂತಾಗಿದೆ. ಆರೋಗ್ಯ ತಪಾಸಣೆಗಾಗಿ ಇಂಡಿ ಹಾಗೂ ವಿಜಯಪುರಕ್ಕೆ ಹೋಗಬೇಕಾದ ಪರಿಸ್ಥಿತಿ ಬಂದಿದೆ.

ಸಿಬ್ಬಂದಿಗೆ ಕರೆ ಮಾಡಿದರೆ ಮಿಟಿಂಗ್​ ಇದೆ, ಬೇರೆ ಕಡೆ ಇದ್ದೇವೆ, ನಾಳೆ ಬರುತ್ತೇವೆ ಎಂಬ ಸಬೂಬು ಹೇಳುತ್ತಾರೆ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.

ಸಿಬ್ಬಂದಿ ಬರದೇ ಇರುವುದರಿಂದ ಅಲ್ಲಿನ ಜನರಿಗೆ ತೊಂದರೆಯಾಗುತ್ತಿದೆ. ಸಂಬಂಧಪಟ್ಟ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.