ಮಧ್ಯಾಹ್ನದ ವೇಳೆಗೆ 38 ರಿಂದ 40 ಡಿಗ್ರಿವರೆಗೂ ಬಿಸಿಲಿನ ತಾಪಮಾನ ಏರುವುದರಿಂದ ಮಧ್ಯಾಹ್ನವಂತೂ ನಗರದ ಹೃದಯ ಭಾಗವಾದ ಮೇನ್ ಬಜಾರ್, ಮದಕರಿ ವೃತ್ತ, ಕಾಲೇಜು ರಸ್ತ, ಡಾ.ಪುನಿತ್ ರಾಜಕುಮಾರ ವೃತ್ತ ಸೇರಿದಂತೆ ಜನದಟ್ಟಣೆ ಪ್ರದೇಶಗಳು ಸಹ ಜನರಿಲ್ಲದೆ ಭಣಗುಡುತ್ತಿವೆ. ಸುತ್ತಮುತ್ತಲಿನ ಗ್ರಾಮಗಳ ವ್ಯಾಪಾರ ವಹಿವಾಟುಗಳಿಗೆ ಕೇಂದ್ರ ಭಾಗವಾಗಿರುವ ಹೊಸಪೇಟೆ, ಕೂಡ್ಲಿಗಿ, ಹಗರಿಬೊಮ್ಮನಹಳ್ಲಿ, ಹರಪನಹಳ್ಳಿ, ಹೂವಿನಹಡಗಲಿ, ಕೊಟ್ಟೂರು, ಮರಿಯಮ್ಮನಹಳ್ಳಿ, ಕಮಲಾಪುರ ಪಟ್ಟಣಕ್ಕೆ ಗ್ರಾಮೀಣ ಭಾಗದ ಜನರು ಬರದೇ ವ್ಯಾಪಾರ ವಹಿವಾಟು ಇಳಿಕೆ ಕಂಡಿದೆ. ಕಿರಾಣಿ, ಜವಳಿ, ಬಟ್ಟೆ, ಬಂಗಾರದ ಅಂಗಡಿಗಳಲ್ಲಿ ವ್ಯಾಪಾರಸ್ಥರು ಗ್ರಾಹಕರ ಬರುವಿಕೆಗೆ ಕಾಯುವಂತಾಗಿದೆ. ಆದರೆ ಎಳನೀರು, ಜ್ಯೂಸ್, ತಂಪು ಪಾನೀಯ ವ್ಯಾಪಾರದಲ್ಲಿ ಮಾತ್ರ ಹೆಚ್ಚಳವಾಗಿದೆ. ಗ್ರಾಹಕರ ಸಂಖ್ಯೆಯೂ ಹೆಚ್ಚಿದ್ದು, ದರ ಕೂಡ ದುಪ್ಪಟ್ಟಾಗಿದೆ. ಒಂದು ಎಳನೀರಿನ ಬೆಲೆ 35 ರಿಂದ 50 ರೂಪಾಯಿ ವರೆಗೆ ಮಾರಾಟವಾಗುತ್ತಿದೆ. ಕಲ್ಲಂಗಡಿ ಬೆಲೆಯು ಒಂದು ಪ್ಲೇಟ್ಗೆ 20 ರೂಪಾಯಿ ಇದೆ, ಆದರೂ ತೆಗೆದುಕೊಳ್ಳುವರೇನೂ ಕಡಿಮೆಯಾಗಿಲ್ಲ. ಇನ್ನು ಮಜ್ಜಿಗೆ, ಷರಬತ್, ಕಬ್ಬಿನ ಹಾಲು, ಹಣ್ಣಿನ ರಸಗಳ ಬೆಲೆಯೂ ಕೂಡಾ 40 ರಿಂದ 70 ರೂಪಾಯಿಗೆ ಮಾರಾಟವಾಗುತ್ತಿವೆ.
