ಹಗರಿಬೊಮ್ಮನಹಳ್ಳಿ ದಶಮಾಪುರ ಗ್ರಾಮದ ಶಾಂತಾ (25) ಗಂಡ ಮಹೇಶ್ ಮೃತಪಟ್ಟ ಬಾಣಂತಿ. ಚೊಚ್ಚಲ ಹೆರಿಗೆ ಹಿನ್ನೆಲೆ ಕೂಡ್ಲಿಗಿ ತಾಲೂಕಿನ ಮೊರಬ ಗ್ರಾಮದ ತಾಯಿ ಮನೆಗೆ ಶಾಂತಾ ಮೊದಲ ಹೆರಿಗೆಗೆ ಬಂದಿದ್ದರು. ಇವರ ತಾಯಿ ರತ್ನಮ್ಮ ಆಶಾ ಕಾರ್ಯಕರ್ತೆಯಾಗಿದ್ದು, ಕೂಡ್ಲಿಗಿ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು, ನಗರದ ಸರ್ಕಾರಿ ಆಸ್ಪತ್ರೆಗೆ ಬಂದಿದ್ದರು. ಏ.20ರಂದು ಬೆಳಗ್ಗೆ 9.30ರ ಹೊತ್ತಿಗೆ ವೈದ್ಯೆ ಡಾ. ಸಿಂಧು ಸಿಜೇರಿಯನ್ ಹೆರಿಗೆ ಮಾಡಿಸಿದ್ದರು. ಬಳಿಕ ವೈದ್ಯೆ ಸಿಂಧು ಹಾಗೂ ಸ್ಟಾಫ್ ನರ್ಸ್ ರಾಘವೇಂದ್ರ ತಪಾಸಣೆ ನಡೆಸಿಲ್ಲ ಎಂಬ ಆರೋಪ ಕೇಳಿ ಬಂದಿದೆ. ಸ್ವತಃ ಆಶಾ ಕಾರ್ಯಕರ್ತೆಯಾದ ರತ್ನಮ್ಮ ತಪಾಸಣೆ ನಡೆಸಲು ಗೊಗರೆದರೂ ನಿರ್ಲಕ್ಷ್ಯವಹಿಸಲಾಗಿದೆ. ಹೆರಿಗೆಯಾಗಿ ನಾಲ್ಕು ದಿನಗಳು ಕಳೆದರೂ ಸರಿಯಾಗಿ ಚಿಕಿತ್ಸೆ ನೀಡಿಲ್ಲ. ಹಾಗಾಗಿ ತನ್ನ ಪುತ್ರಿ ಶಾಂತಾ ಮೃತಪಟ್ಟಿದ್ದಾರೆ ಎಂದು ರತ್ನಮ್ಮ ಆಸ್ಪತ್ರೆ ಎದುರು ರೋದಿಸಿದರು. ನಾವು ಆಶಾ ಕಾರ್ಯಕರ್ತೆಯಾಗಿ ಹಲವು ಹೆರಿಗೆಗಳನ್ನು ಮಾಡಿಸಿರುವೆ. ಆದರೆ, ಈ ರೀತಿ ವೈದ್ಯರು ಹಾಗು ಸ್ಟಾಫ್ ನರ್ಸ್ ನಿರ್ಲಕ್ಷ್ಯ ವಹಿಸಿದ್ದಾರೆ. ಕನಿಷ್ಠ ಬಿಪಿ ಕೂಡ ಚೆಕ್ ಮಾಡಲಿಲ್ಲ, ಕಾಲ ಕಾಲಕ್ಕೆ ಬಿಪಿ ಚೆಕ್ ಮಾಡಿದರೂ ನನ್ನ ಮಗಳು ಉಳಿದುಕೊಳ್ಳುತ್ತಿದ್ದಳು ಎಂದರು.
