ಹೊಸಕೋಟೆ ಸರ್ಕಾರಿ ಶಾಲೆ ಮಕ್ಕಳಿಗೆ ವಿಮಾನಯಾನ ಭಾಗ್ಯ

25 ವಿದ್ಯಾರ್ಥಿಗಳಿಗೆ ಅವಕಾಶ | ವಿವಿಧ ಸ್ಥಳಗಳಿಗೆ ಭೇಟಿ

ಕೊರಟಗೆರೆ: ಸರ್ಕಾರಿ ಶಾಲೆ ಎಂದರೆ ಮೂಗು ಮುರಿಯುವ ಜನರೇ ಹೆಚ್ಚು. ಆದರೆ, ತಾಲೂಕಿನ ಹೊಸಕೋಟೆ ಸರ್ಕಾರಿ ಶಾಲೆಯೊಂದು ಮಕ್ಕಳಿಗೆ ವಿಮಾನದಲ್ಲಿ ಪ್ರವಾಸ ಕರೆದೊಯ್ಯುವ ಮೂಲಕ ಎಲ್ಲರ ಗಮನ ಸೆಳೆದಿದೆ.

ತಾಲೂಕಿನ ಮಧುಗಿರಿ ಶೈಕ್ಷಣಿಕ ಜಿಲ್ಲೆಯ ಹೊಸಕೋಟೆಯ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಸಕ್ರಿಯ ಚಟುವಟಿಕೆಗಳ ಮೂಲಕ ಮಾದರಿಯಾಗಿದ್ದು, ಅಂತೆಯೇ ಸೋಮವಾರ (ಡಿ.16) ಶಾಲೆಯ ಮಕ್ಕಳಿಗೆ ಪ್ರವಾಸ ಭಾಗ್ಯ ಕಲ್ಪಿಸಲಾಗಿದೆ. ಶಾಲೆಯಲ್ಲಿ ಒಟ್ಟು ನಾಲ್ಕು ಜನ ಕ್ರಿಯಾಶೀಲ ಶಿಕ್ಷಕರಿದ್ದು, ಶಾಲೆಯ ಪ್ರಗತಿಗೆ ಶ್ರಮಿಸುತ್ತಿದ್ದಾರೆ. ಶಾಲೆಯಲ್ಲಿ 1ರಿಂದ 7ನೇ ತರಗತಿವರೆಗೆ ಒಟ್ಟು 84 ಮಕ್ಕಳಿದ್ದಾರೆ. ಈಗ 6 ಮತ್ತು 7ನೇ ತರಗತಿಯ 25 ಮಕ್ಕಳಿಗೆ ವಿಮಾನ ಪ್ರವಾಸ ಭಾಗ್ಯ ಕಲ್ಪಿಸಲಾಗಿದೆ.

ಹೊಸಕೋಟೆ ಶಾಲೆ ವಿದ್ಯಾರ್ಥಿಗಳ ಪ್ರತಿಭೆ ಜತೆಗೆ ಶಿಕ್ಷಕರ ತ್ಯಾಗ ಇತರ ಶಾಲೆಗಳಿಗೆ ಮಾದರಿಯಾಗಿದೆ.

ಪ್ರವಾಸ ಹೋಗುವ ಸ್ಥಳ: ಮಕ್ಕಳಿಗೆ ಹೊಸ ಅನುಭವ ಕೊಡುವ ಉದ್ದೇಶದೊಂದಿಗೆ -2024-&25ನೇ ಸಾಲಿನ ಶೈಕ್ಷಣಿಕ ಪ್ರವಾಸ ಆಯೋಜಿಸಿದ್ದು, ವಿಮಾನದ ಮೂಲಕ ಮಂಗಳೂರಿಗೆ ತೆರಳಿ ಅಲ್ಲಿಂದ ರೈಲಿನಲ್ಲಿ ಬೆಂಗಳೂರಿಗೆ ಬರಲಿದ್ದಾರೆ. ಮಂಗಳೂರಿನ ಪಿಲಿಕುಳ ಮೃಗಾಲಯ, ಲೈಟ್​ ಹೌಸ್​, ವಿಜ್ಞಾನಕೇಂದ್ರ, ಹೆರಿಟೇಜ್​ ವಿಲೇಜ್​ ಮತ್ತು ಬೆಂಗಳೂರಿನ ವಿಧಾನಸೌಧ ಮುಂತಾದ ಸ್ಥಳಗಳನ್ನು ವೀಕ್ಷಣೆ ಮಾಡುವ ವಿಶೇಷ ಯೋಜನೆ ರೂಪಿಸಲಾಗಿದೆ.

ಗೃಹಸಚಿವರಿಂದ ನೆರವಿನ ಭರವಸೆ: ಗೃಹ ಸಚಿವ ಮತ್ತು ಶಾಸಕ ಡಾ.ಜಿ.ಪರಮೇಶ್ವರ ಶನಿವಾರ ಮಕ್ಕಳ ವಿಮಾನ ಪ್ರವಾಸದ ಬಗ್ಗೆ ಮಾಹಿತಿ ಪಡೆದು ಉತ್ತಮವಾಗಿ ಮಕ್ಕಳು ಪ್ರವಾಸ ಮಾಡಿ ಬರಲಿ, ಮಕ್ಕಳ ಭವಿಷ್ಯ ಉಜ್ವಲವಾಗಲಿ ಎಂದು ಶುಭಕೋರಿ ಮಕ್ಕಳ ಮತ್ತು ಶಿಕ್ಷಕರ ಸುರಕ್ಷತೆಗೆ ಮೊದಲ ಆದ್ಯತೆ ನೀಡಿ ಎಂದು ತಿಳಿಸಿದ್ದು, ಮಕ್ಕಳ ಶೈಕ್ಷಣಿಕ ಅನುಭವ ಹೆಚ್ಚಿಸಲು ಆರ್ಥಿಕ ಸಹಕಾರ ನೀಡುವ ಭರವಸೆ ನೀಡಿದ್ದಾರೆ. ಜತೆಗೆ ಶಾಲೆಗೆ ಭೇಟಿ ನೀಡುವುದಾಗಿ ತಿಳಿಸಿದ್ದಾರೆ.

ನಿರಂತರ ಚಟುವಟಿಕೆಯ ಶಾಲೆ: ಈ ಶಾಲೆಯ ಮಕ್ಕಳು -2023 ಜನವರಿಯಲ್ಲಿ ಪ್ರಸ್ತುತಪಡಿಸಿದ "ದಾನ ಶೂರ ವೀರ ಕರ್ಣ' ಎಂಬ ನಾಟಕ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಮನೆ ಮಾತಾಗಿತ್ತು. ಶಾಲೆ ಗುಣಮಟ್ಟದ ಶಿಕ್ಷಣದ ಜತೆಗೆ ಭವಿಷ್ಯದ ನಿರೀೆಯಲ್ಲೂ ಪ್ರಗತಿ ಸಾಧಿಸಿದೆ. 2023-&24ನೇ ಸಾಲಿನಲ್ಲಿ ಬೇಸಿಗೆ ರಜೆಯಲ್ಲಿ ಹಮ್ಮಿಕೊಂಡಿದ್ದ ಸ್ಪೋಕನ್​ ಇಂಗ್ಲಿಷ್​ ಮತ್ತು ಕಂಪ್ಯೂಟರ್​ ತರಗತಿ ಮಕ್ಕಳಲ್ಲಿ ತಾಂತ್ರಿಕತೆ ಮತ್ತು ಭಾಷಾ ಕೌಶಲ ಅಭಿವೃದ್ಧಿಗೊಳಿಸಿತು. 3ರಿಂದ 7ನೇ ತರಗತಿಯ ವಿದ್ಯಾರ್ಥಿಗಳು ಈಗ ಸುಲಭವಾಗಿ ಎಂಎಸ್​ ವರ್ಡ್​, ಎಂಎಸ್​ ಪೇಯಿಂಟ್​, ಕನ್ನಡ ಮತ್ತು ಇಂಗ್ಲಿಷ್​ ಟೈಪಿಂಗ್​ ಕಲಿಯಲು ಪ್ರಮುಖ ಶಕ್ತಿಯಾದವರು ಮುಖ್ಯಶಿಕ್ಷಕ ಕಾಂತಪ್ಪ, ದೇವರಾಜ್​, ಹರೀಶ್​ ಕುಮಾರ್​ ಮತ್ತು ಮಂಜುಳಾ ಸೇರಿ ಈ ಶಾಲೆಯ ಶಿಕ್ಷಕ ವೃಂದ.