ದುರಸ್ತಿಗೆ ರೈತರ ಒತ್ತಾಯ: ಕಾಲುವೆ ಮೇಲಿನ ಮಾರ್ಗವಾಗಿ ಕಬ್ಬಿನ ಗಾಣಗಳಿಗೆ ರೈತರು ಎತ್ತಿನ ಬಂಡಿಗಳಲ್ಲಿ ತೆರಳುತ್ತಾರೆ. ತಾಲೂಕಿನ ಕೊಂಡನಾಯಕಹಳ್ಳಿ, ಅನಂತಶಯನಗುಡಿ, ಮಲಪನಗುಡಿ, ಬೆಣಕಾಪುರ ತಾಂಡಾ, ಕೊಂಡನಾಯಕಹಳ್ಳಿ ತಾಂಡಾದ ನೂರಾರು ರೈತರು ಸಂಚರಿಸುತ್ತಾರೆ. ಅನಾಹುತ ಸಂಭವಿಸುವ ಮುನ್ನ ತುಂಗಭದ್ರಾ ಮಂಡಳಿ ರಸ್ತೆಯನ್ನು ದುರಸ್ತಿ ಮಾಡಬೇಕು ಎಂಬುದು ರೈತರ ಒತ್ತಾಯವಾಗಿದೆ. ಕಾಲುವೆಯಲ್ಲಿ 200 ಮೀಟರ್ನಷ್ಟು ಮಣ್ಣಿನ ದಂಡೆ ಇದೆ. ಇದು ನೀರಿನ ರಭಸಕ್ಕೆ ಕುಸಿಯುತ್ತಿದೆ. ಹೀಗಾಗಿ ಸಿಮೆಂಟ್ ಗೋಡೆ ನಿರ್ಮಿಸಿದರೆ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬಹುದಾಗಿದೆ. ನಾಲ್ಕು ವರ್ಷದ ಹಿಂದೆ ಕಾಲುವೆ ನಿರ್ಮಾಣ ಕಾಮಗಾರಿ ಸಂದರ್ಭದಲ್ಲಿ ಲಾರಿ ಓಡಾಟಕ್ಕೆ ಅನುಕೂಲವಾಗಲೆಂದು ಸಿಮೆಂಟ್ ಮಾಡದೆ ಹಾಗೆಯೇ ಬಿಡಲಾಗಿತ್ತು. ಬಳಿಕ ಸಿಮೆಂಟ್ ಗೋಡೆ ನಿರ್ಮಿಸಲಿಲ್ಲ. ಇದರಿಂದ ಮಣ್ಣಿನ ಸವಕಳಿಯಾಗುತ್ತಿದೆ. ಕೂಡಲೇ ತುಂಗಭದ್ರಾ ಆಡಳಿತ ಮಂಡಳಿಯ ಅಧಿಕಾರಿಗಳು ಕ್ರಮಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.
