ಕಾರ್ಕಳದ ಹೊಸಬೆಳಕು ಆಶ್ರಮ ಲೋಕಾರ್ಪಣೆ 6ರಂದು

ಸಂಸ್ಥಾಪಕ ತನುಲಾ ತರುಣ್​ ಮಾಹಿತಿ -- ನಿವಾಸಿಗಳಿಂದಲೇ ಕಟ್ಟಡ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ
ನಿರ್ಗತಿಕರು, ನಿರಾಶ್ರಿತರು, ಅನಾರೋಗ್ಯಕ್ಕೀಡಾದ ನಿಸ್ಸಹಾಯಕರಿಗೆ ಉಚಿತ ಸೇವೆ ನೀಡಲೆಂದು 2014ರಲ್ಲಿ ಆರಂಭಗೊಂಡ ಹೊಸಬೆಳಕು ಆಶ್ರಮಕ್ಕೆ ಅನೇಕರ ಸಹಕಾರದಿಂದ ಸ್ವಂತ ಕಟ್ಟಡ ನಿರ್ಮಿಸಲಾಗಿದ್ದು, ಮೇ 6ರಂದು ಬೆಳಗ್ಗೆ 10 ಗಂಟೆಗೆ ಲೋಕಾರ್ಪಣೆಗೊಳ್ಳಲಿದೆ ಎಂದು ಹೊಸಬೆಳಕು ಸೇವಾ ಟ್ರಸ್ಟ್​ನ ಸಂಸ್ಥಾಪಕಿ ತನುಲಾ ತರುಣ್​ ಮಾಹಿತಿ ನೀಡಿದರು.

ಉಡುಪಿಯ ಪ್ರೆಸ್​ಕ್ಲಬ್​ನಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಕಟ್ಟಡ ಲೋಕಾರ್ಪಣೆಗೆ ಯಾವುದೇ ಗಣ್ಯರನ್ನೂ ಆಹ್ವಾನಿಸುತ್ತಿಲ್ಲ. ಆಶ್ರಮದಲ್ಲಿರುವ ನಿವಾಸಿಗರೇ ಕಟ್ಟಡ ಉದ್ಘಾಟಿಸಲಿದ್ದಾರೆ. ಅಂದು ಬೆಳಗ್ಗೆ 10 ಗಂಟೆಯಿಂದ ಸಂಜೆ 7ರ ವರೆಗೆ ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ತಿಳಿಸಿದರು.

180 ಜನರಿಗೆ ಆಶ್ರಯ

ಕಾರ್ಕಳ ತಾಲೂಕಿನ ಬೈಲೂರು ಸಮೀಪದ ಕೌಡೂರು ಗ್ರಾಮದ ಮಾಣಿಕುಮೇರಿ ಎಂಬಲ್ಲಿ ಹೊಸಬೆಳಕು ಆಶ್ರಮವಿದ್ದು, 1.14 ಎಕರೆ ಸ್ಥಳದಲ್ಲಿ 16 ಸಾವಿರ ಚದರ್​ ಅಡಿ ವಿಸ್ತೀರ್ಣದ ಕಟ್ಟಡ ನಿರ್ಮಿಸಲಾಗಿದೆ. ಸುಮಾರು 400 ಜನರಿಗೆ ವಸತಿ ನೀಡುವ ಸಾಮರ್ಥ್ಯ ಹೊಂದಿರುವ ಈ ಕಟ್ಟಡದಲ್ಲಿ ಪ್ರಸ್ತುತ 180 ಜನರು ಆಶ್ರಯ ಪಡೆದಿದ್ದಾರೆ ಎಂದರು.

ಎಂಡೋ ಸಲ್ಫಾನ್ ಪೀಡಿತರಿಗೂ ಅವಕಾಶ

ಟ್ರಸ್ಟ್​ನ ಇನ್ನೋರ್ವ ಸಂಸ್ಥಾಪಕ ವಿನಯಚಂದ್ರ ಸಾಸ್ತಾನ ಮಾತನಾಡಿ, ಆಶ್ರಮದ ವತಿಯಿಂದ ಮುಂದಿನ ದಿನಗಳಲ್ಲಿ ಅಂಗವಿಕಲರಿಗೆ, ಹಿರಿಯ ನಾಗರಿಕರಿಗೆ, ಭಾರತ ಸೇನೆಯಲ್ಲಿ, ಸಮಾಜ ಸೇವೆಯಲ್ಲಿ ಸಾಧನೆ ಮಾಡಿದವರಿಗೆ ಬೈಲೂರು, ಕಾರ್ಕಳ ಹಾಗೂ ಉಡುಪಿ ವ್ಯಾಪ್ತಿಯಲ್ಲಿ ಉಚಿತ ಆ್ಯಂಬುಲೆನ್ಸ್​ ಸೇವೆ ನೀಡಲಾಗುವುದು. ಅಲ್ಲದೆ, ಎಂಡೋ ಸಲ್ಫಾನ್​ ಪೀಡಿತ ಸುಮಾರು 200 ಜನರಿಗೆ ಆಶ್ರಮದಲ್ಲಿ ಸೇವೆ ಮಾಡಲು ಯೋಜಿಸಿದ್ದೇವೆ ಎಂದರು.

ಬದುಕಿಗೆ ಆಸರೆಯಾಗುವ ನಂಬಿಕೆಯ ತಾಣ