ಜಿಲ್ಲೆಯ ಪ್ರಥಮ ಹೋಂ ಐಸೋಲೇಶನ್

ಶ್ರೀಪತಿ ಹೆಗಡೆ ಹಕ್ಲಾಡಿ ಕುಂದಾಪುರ

ಕೋವಿಡ್ -19 ಗಂಟಲ ದ್ರವ ಪರೀಕ್ಷೆಗೆ ಮೊದಲ ಬಾರಿ ಆಂಬುಲೆನ್ಸ್ ವ್ಯವಸ್ಥೆ ಮಾಡಿದ ಕುಂದಾಪುರದಲ್ಲಿ ಮತ್ತೊಂದು ವ್ಯವಸ್ಥೆ ಸಿದ್ಧವಾಗುತ್ತಿದ್ದು ಕರೊನಾ ಲಕ್ಷಣಗಳಿಲ್ಲದ ಸೋಂಕಿತರಿಗೆ ಹೋಂ ಐಸೊಲೇಶನ್ ವ್ಯವಸ್ಥೆ ಆರಂಭವಾಗಲಿದೆ.

ಸರ್ಕಾರ ಹೋಂ ಐಸೊಲೇಶನ್ ವ್ಯವಸ್ಥೆ ಜಾರಿಗೆ ತಂದಿದ್ದು, 75 ಹಾಸಿಗೆಯ ಕೋವಿಡ್-19 ಹೋಂ ಕೇರ್ ಸೆಂಟರ್ ಐಸೊಲೇಶನ್ ಸಿದ್ಧವಾಗಿದೆ. ಬಿಸಿಎಂ ಹಾಸ್ಟೆಲ್ ಕೋವಿಡ್ ಹೋಂ ಕೇರ್ ಸೆಂಟರ್ ಆಗಿ ಪರಿವರ್ತಿಸಲಾಗಿದೆ. ಜಿಲ್ಲಾಧಿಕಾರಿ ಜಿ.ಜಗದೀಶ್ ಮಾರ್ಗದರ್ಶನದಲ್ಲಿ ತಾಲೂಕು ಆರೋಗ್ಯಾಧಿಕಾರಿ ಡಾ.ನಾಗಭೂಷಣ್ ಉಡುಪ ಪರಿಕಲ್ಪನೆಯಲ್ಲಿ 75 ಸುಸಜ್ಜಿತ ಹಾಸಿಗೆಯುಳ್ಳ ಕೇಂದ್ರ ನಿರ್ಮಾಣಗೊಂಡಿದೆ. ಸೋಂಕಿತರನ್ನು ದಾಖಲಿಸಿಕೊಳ್ಳಲು ಬೆಳಗ್ಗೆ 9ರಿಂದ ಸಾಯಂಕಾಲ 5ರವರೆಗೆ ಅಧಿಕಾರಿಗಳು ಕೇಂದ್ರದಲ್ಲಿರಲಿದ್ದಾರೆ. ಮೂವರು ವೈದ್ಯರು ಹಾಗೂ ಮೂವರು ಸಿಬ್ಬಂದಿ ಹೋಂ ಕೇರ್ ಸೆಂಟರ್ ಉಸ್ತುವಾರಿ ನೋಡಿಕೊಳ್ಳಲಿದ್ದಾರೆ. ಊಟೋಪಚಾರ, ಕುಡಿಯುವ ನೀರಿನ ವ್ಯವಸ್ಥೆ ಸರ್ಕಾರವೇ ನೋಡಿಕೊಳ್ಳಲಿದೆ. ದಾಖಲಾಗುವ ಸೋಂಕಿತರ ದೈನಂದಿನ ಆರೋಗ್ಯ ತಪಾಸಣೆ ನಿಟ್ಟಿನಲ್ಲಿ ಥರ್ಮಲ್ ಸ್ಕಾೃನರ್, ಪಲ್ಸ್ ಆಕ್ಸಿಮೀಟರ್ ಇರುತ್ತದೆ. ಈ ಕೇಂದ್ರವನ್ನು ತಮ್ಮ ಮನೆಯೆಂಬಂತೆ ನೋಡಿಕೊಂಡು ಸ್ವಚ್ಛತೆಗೆ ಹೆಚ್ಚು ಒತ್ತು ನೀಡಬೇಕೆಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕರೊನಾ ಲಕ್ಷಣಗಳಿಲ್ಲದೆ ಪಾಸಿಟಿವ್ ವರದಿ ಬಂದ ಸೋಂಕಿತರಿಗೆ ಮನೆಯಲ್ಲೇ ಚಿಕಿತ್ಸೆ ನೀಡುವ ಸಲುವಾಗಿ ಸರ್ಕಾರ ಹೋಂ ಐಸೊಲೇಶನ್ ವ್ಯವಸ್ಥೆ ಕಲ್ಪಿಸಿದೆ.

ಸೋಂಕಿತರ ಓಡಾಟಕ್ಕೆ ಪ್ರತ್ಯೇಕ ವ್ಯವಸ್ಥೆ: ಹೋಂ ಕೇರ್ ಸೆಂಟರ್‌ನಲ್ಲಿ ರೆಡ್ ಜೋನ್ ಮತ್ತು ಗ್ರೀನ್ ಜೋನ್ ಇದ್ದು, ನೆಲಕ್ಕೆ ಅದೇ ಬಣ್ಣದಲ್ಲಿ ಮಾರ್ಕಿಂಗ್ ಮಾಡಲಾಗಿದೆ. ಗ್ರೀನ್ ಜೋನ್‌ನಲ್ಲಿ ಅಧಿಕಾರಿ, ಸಿಬ್ಬಂದಿ ಓಡಾಡಿದರೆ, ರೆಡ್ ಜೋನ್ ಭಾಗದಲ್ಲಿ ಸೋಂಕಿತರು ಓಡಾಡಬೇಕು. ಸ್ನಾನಕ್ಕೆ ಸೋಲಾರ್ ನೀರು, ಕುಡಿಯಲು ಶುದ್ಧ ಬಿಸಿ ನೀರಿನ ಘಟಕ ಇದೆ.