ಲಾರಿ ಅಪಘಾತದಲ್ಲಿ 10 ಜನ ವ್ಯಾಪಾರಸ್ಥರು ಮೃತಪಟ್ಟಿರುವ ಘಟನೆಯು ಅಪಘಾತ ತಡೆಯುವ ಅನಿವಾರ್ಯತೆಯ ಜತೆಯಲ್ಲಿ ಹಲವು ಆಯಾಮಗಳ ಚಿಂತನೆ ಹುಟ್ಟು ಹಾಕಿದೆ. ಸರಕು ಸಾಗಾಟಕ್ಕೆಂದು ಇರುವ ವಾಹನಗಳಲ್ಲಿ ಪ್ರಯಾಣಿಕರನ್ನು ಸಾಗಿಸುವ ಕಾರ್ಯ ನಿರಂತರವಾಗಿ ನಡೆಯುತ್ತಿದೆ. ಅದು ಈ ಅಪಘಾತದ ಮೂಲಕ ಬೆಳಕಿಗೆ ಬಂದಿದೆ. ಪ್ರತಿ ವಾರ ಹಣ್ಣು, ತರಕಾರಿ ತುಂಬಿಕೊಂಡು ಹಾವೇರಿಯಿಂದ ಕರಾವಳಿ ಭಾಗಕ್ಕೆ 200ಕ್ಕೂ ಹೆಚ್ಚು ಕಿ.ಮೀ. ದೂರ ಲಾರಿಯಲ್ಲೇ ಬರುವ ವ್ಯಾಪಾರಿಗಳು, ಸಂತೆಯ ವ್ಯಾಪಾರ ಮುಗಿಸಿ, ಅದರಲ್ಲೇ ಮರಳುತ್ತಿದ್ದರಂತೆ!. ಸರಕು ಸಾಗಣೆ ವಾಹನದಲ್ಲಿ ಪ್ರಯಾಣಿಸುವುದು ನಿಯಮ ಬಾಹಿರ ಎಂಬ ಅರಿವಿದ್ದರೂ, ವ್ಯಾಪಾರಿಗಳು ಅದರಲ್ಲೇ ಪ್ರಯಾಣಿಸುತ್ತಿದ್ದರು. ಪ್ರತ್ಯೇಕ ವಾಹನದಲ್ಲಿ ಹೋಗಿ ವ್ಯಾಪಾರ ಮಾಡುವಷ್ಟು ಲಾಭ ಈ ಉದ್ಯಮದಲ್ಲಿರಲಿಲ್ಲ. ಆದರೂ ಬದುಕಿನ ಬಂಡಿ ಸಾಗಿಸಲು ಈ ಅನಿವಾರ್ಯತೆಗೆ ಒಳಗಾಗಿ ಈಗ ಬದುಕನ್ನೇ ಮುಗಿಸಿದ್ದಾರೆ. ಸರಕು ಸಾಗಣೆಯ ವಾಹನಗಳನ್ನು ಕಟ್ಟುನಿಟ್ಟಾಗಿ ಪರಿಶೀಲಿಸಿ, ಪ್ರಯಾಣಿಕರನ್ನು ಸಾಗಿಸದಂತೆ ತಡೆಯುವ ನಿಟ್ಟಿನಲ್ಲಿ ಅಧಿಕಾರಿಗಳು ಗಂಭೀರ ಚಿಂತನೆ ನಡೆಸಿದ್ದಾರೆ.
