ಹೋಬಳಿಯು ಕೃಷಿ ಪ್ರಧಾನವಾದ ಪ್ರದೇಶವಾಗಿರುವುದರಿಂದ ಮಳೆಯನ್ನೇ ನೆಚ್ಚಿಕೊಂಡು ರೈತರು ವ್ಯವಸಾಯ ಮಾಡುವುದು ದಿನದಿಂದ ದಿನಕ್ಕೆ ದುಸ್ತರವಾಗುತ್ತಿದೆ. ಇಂತಹ ಸಂಕಟದ ಸ್ಥಿತಿಯಲ್ಲೂ ಸಿದ್ದೇಶ್, ಕಡಿಮೆ ನೀರನ್ನು ಬೇಡುವ ತರಕಾರಿಗಳನ್ನು ಪರ್ಯಾಯ ಕೃಷಿ ಮಾದರಿಯಲ್ಲಿ ಬೆಳೆಯುತ್ತಿದ್ದಾರೆ. ಎರಡು ಎಕರೆ ಪ್ರದೇಶದಲ್ಲಿ ಹತ್ತಿಬೀಜ ಬಿತ್ತನೆ ಮಾಡಿದರೆ ಇಳುವರಿಗೆ ಒಂದು ವರ್ಷ ಕಾಯಬೇಕು. ಅಲ್ಲಿಯವರೆಗೆ ಯಾವ ಆದಾಯವೂ ಇರುವುದಿಲ್ಲ. ತರಕಾರಿಗಳೂ ಎರಡರಿಂದ ಮೂರು ತಿಂಗಳಿನ ಸಮಯವನ್ನು ಬೇಡುತ್ತವೆ. ಹಾಗಾಗಿ ಹೊಲದ ಬದಿಯಲ್ಲಿ ಚೆಂಡು ಹೂ, ಸೇವಂತಿಗೆ ಗಿಡಗಳನ್ನು ಬೆಳೆಸಿ ಪೋಷಿಸಿದ್ದಾರೆ. ಆಗಾಗ್ಗೆ ಇದನ್ನು ಕೊಯ್ದು, ಹಾರ, ಮಾಲಿಕೆಯ ರೀತಿ ಕಟ್ಟಿ ಮಾರಾಟ ಮಾಡುತ್ತಾರೆ. ಒಬ್ಬ ಮಗ ವಿದ್ಯಾಭ್ಯಾಸದಲ್ಲಿ ತೊಡಗಿರುವುದರಿಂದ ಕೃಷಿ ಕಾಯಕಕ್ಕೆ ಪತ್ನಿ ಪುಷ್ಪಾವತಿ ಜತೆಯಾಗಿ ಸಹಕರಿಸುತ್ತಾರೆ.
