2023ರ ವಿಧಾನಸಭಾ ಚುನಾವಣೆ ಲಿತಾಂಶ ಪ್ರಕಟವಾಗುವವರೆಗೂ ಮೌನವಾಗಿದ್ದ ಕೆಇಆರ್ಸಿ ರಾಜ್ಯದ ಭವಿಷ್ಯ ನಿರ್ಧರಿಸುವ ಮತ ಎಣಿಕೆಯ ಹಿಂದಿನ ದಿನವೇ ವಿದ್ಯುತ್ ಬಳಕೆಗೆ ವಿಧಿಸುವ ದರವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಲು ಒಪ್ಪಿಗೆ ಸೂಚಿಸಿತ್ತು. ಹೀಗಾಗಿ ಏ.1ರಿಂದಲೇ ಈ ಹೊಸ ದರ ಪೂರ್ವಾನ್ವಯವಾಗಲಿದೆ ಎಂದು ಆಯೋಗದ ಆದೇಶದಲ್ಲಿ ತಿಳಿಸಲಾಗಿದೆ. ಸರ್ಕಾರದ ಅವಧಿ ಮುಗಿದು, ಹೊಸ ಸರ್ಕಾರ ರಚನೆಯಾಗುವ ಸಂಕ್ರಮಣ ಕಾಲದಲ್ಲಿ ದರ ಏರಿಕೆ ಬಿಸಿ ವಿದ್ಯುತ್ ಬಳಕೆದಾರರಿಗೆ ತುಸು ಜೋರಾಗಿಯೇ ತಟ್ಟಿದೆ. ಹೀಗಾಗಿ ನಿತ್ಯವೂ ಹೆಸ್ಕಾಂ ಕಚೇರಿಗೆ ಬಿಲ್ ಹಿಡಿದುಕೊಂಡು ಬರುತ್ತಿರುವ ಗ್ರಾಹಕರು ‘ನಮ್ಮದು ಇಷ್ಟಾಗುವುದಿಲ್ಲ. ಇಷ್ಟೊಂದು ಬಿಲ್ ಯಾಕೆ ಕೊಟ್ಟಿದ್ದೀರಿ? ಎಂದು ಹೆಸ್ಕಾಂ ನೌಕರರು, ಮೀಟರ್ ರೀಡರ್ಗಳೊಂದಿಗೆ ವಾಗ್ವಾದ ನಡೆಸುತ್ತಿದ್ದಾರೆ.
