ಹೊಸದುರ್ಗ(ಚಿತ್ರದುರ್ಗ): ತಾಲೂಕಿನ ಕಂಚೀಪುರದ ಶ್ರೀ ಕಂಚೀವರದರಾಜ ಸ್ವಾಮಿ ದೇವಾಲಯದಲ್ಲಿ ಕಾಡಿನಿಂದ ಹಿಡಿದುತಂದಿದ್ದ ಮೊಲಕ್ಕೆ ಪೂಜೆ ಸಲ್ಲಿಸಿ, ಅದರ ಕಿವಿಗೆ ಚಿನ್ನದ ಓಲೆ ತೊಡಿಸಿ ಮರಳಿ ಕಾಡಿಗೆ ಬಿಡುವ ಮೂಲಕ ಉತ್ತರಾಯಣ ಪುಣ್ಯಕಾಲವನ್ನು ಸ್ವಾಗತಿಸಲಾಯಿತು. ಸಂಪ್ರದಾಯದಂತೆ ಗುರುವಾರ ಬೆಳಗ್ಗೆ ಕಾಡಿಗೆ ತೆರಳಿದ್ದ ಗ್ರಾಮಸ್ಥರು ಸಂಜೆವರೆಗೂ ಹುಡುಕಿದರೂ ಮೊಲ ಸಿಕ್ಕಿಲ್ಲ. ಶುಕ್ರವಾರ ಕಂಚೀವರದರಾಜಸ್ವಾಮಿಗೆ ಪೂಜೆ ಸಲ್ಲಿಸಿ ಕಾಡಿಗೆ ತೆರಳಿ ಮೊಲ ಹಿಡಿದು ತರುವಲ್ಲಿ ಯಶಸ್ವಿಯಾದರು. ಸಂಜೆ ದೇಗುಲದಿಂದ ಕಂಚಿವರದರಾಜ ಸ್ವಾಮಿ ಹಾಗೂ ಮೊಲವಿರುವ ಬುಟ್ಟಿಯನ್ನು ಮೆರವಣಿಗೆ ಮೂಲಕ ಊರ ಬಾಗಿಲಿಗೆ ಕರೆತಂದು ಪೂಜೆ ಸಲ್ಲಿಸಿ, ಅದರ ಕಿವಿಗೆ ಚಿನ್ನದ ಓಲೆ ತೊಡಿಸಿ ಕಾಡಿಗೆ ಮರಳಿ ಬಿಡಲಾಯಿತು. ವಿಶೇಷ ಆಚರಣೆ ವೀಕ್ಷಿಸಲು ಸಹಸ್ರಾರು ಸಂಖ್ಯೆಯಲ್ಲಿ ಭಕ್ತರು ಜಮಾಯಿಸಿದ್ದರು.
