30 ವರ್ಷದ ಕನಸು ನನಸು: ಬಹುನಿರೀಕ್ಷಿತ ಹೆಜಮಾಡಿ ಬಂದರು ಸುಮಾರು 180 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಳ್ಳಲಿರುವ ಯೋಜನೆಗೆ ಮೀನುಗಾರರ 3 ದಶಕಗಳ ಬೇಡಿಕೆ ಈಡೇರಿದಂತಾಗಿದೆ. ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಯ ಗಡಿ ಪ್ರದೇಶವಾದ ಹೆಜಮಾಡಿ-ಮೂಲ್ಕಿ ಸಂಗಮ ಸ್ಥಳ ಶಾಂಭವಿ ಅಳಿವೆಯ ಉತ್ತರ ಭಾಗದಲ್ಲಿ ಕೇಂದ್ರ-ರಾಜ್ಯ ಸರ್ಕಾರಗಳ ಸಮಾನ ಅನುದಾನದಡಿ ಬಂದರು ನಿರ್ಮಾಣವಾಗಲಿದೆ. ಈಗಾಗಲೇ ಸರ್ಕಾರ 63 ಎಕರೆ ಜಾಗವನ್ನು ಬಂದರು ಯೋಜನೆಗಾಗಿ ಗುರುತಿಸಿದೆ. 10 ಎಕರೆ ಜಮೀನನ್ನು ಬಂದರು ಇಲಾಖೆಗೆ ಹಸ್ತಾಂತರಿಸಿ ಜಿಲ್ಲಾಧಿಕಾರಿ ಹಿಂದೆಯೇ ಆದೇಶಿಸಿದ್ದರು. ಜನವರಿ ಕೊನೆಗೆ ಉಳಿದಿರುವ 35.83 ಎಕ್ರೆ ಜಮೀನನ್ನು ಬಂದರು ನಿರ್ಮಾಣದ ಉದ್ದೇಶಕ್ಕಾಗಿ ಮೀನುಗಾರಿಕೆ ಇಲಾಖೆ ಹೆಸರಿನಲ್ಲಿ ಕಾಯ್ದಿರಿಸಿ ಕಂದಾಯ ಇಲಾಖೆ ಆದೇಶ ಹೊರಡಿಸಿತ್ತು. ಬಾಕಿ ಅಗತ್ಯವಿರುವ ಖಾಸಗಿಯವರ ಹೆಸರಲ್ಲಿರುವ ಜಮೀನು ಸ್ವಾಧೀನ ಪಡಿಸಿಕೊಳ್ಳಲು ಮೊತ್ತ ಕಾಯ್ದಿರಿಸಿ ಇದೀಗ ಯೋಜನೆಗೆ ಸಂಪುಟ ಅನುಮೋದನೆ ನೀಡಿದೆ. ಬಂದರಿನಲ್ಲಿ ವಾರ್ಷಿಕ 26, 224 ಮೆಟ್ರಿಕ್ ಟನ್ ಮೀನು ನಿರ್ವಹಣೆ, 156 ಯಾಂತ್ರೀಕೃತ, 467 ಮೋಟಾರಿಕೃತ ನಾಡದೋಣಿ ಹಾಗೂ 500 ಸಾಂಪ್ರದಾಯಿಕ ಬೋಟ್ಗಳು ಸೇರಿ 1,123 ದೋಣಿಗಳಿಗೆ ವ್ಯವಹರಿಸಲು ಅವಕಾಶವಿದೆ.
