ಉಡುಪಿಯಲ್ಲಿ ಭಾರಿ ಮಳೆ, ಜನಜೀವನ ಅಸ್ತವ್ಯಸ್ತ...

ನದಿಯಂತಾದ ಉಡುಪಿ-ಮಣಿಪಾಲ ಹೆದ್ದಾರಿ

ಚರಂಡಿ ಬ್ಲಾಕ್​, ರಸ್ತೆಯಲ್ಲಿ ನೀರು, ಟ್ರಾಫಿಕ್​ ಜಾಮ್

ವಿಜಯವಾಣಿ ಸುದ್ದಿಜಾಲ ಉಡುಪಿ

ಹವಾಮಾನ ಇಲಾಖೆಯ ಮುನ್ಸೂಚನೆಯಂತೆಯೇ ರಾಜ್ಯದ ಕರಾವಳಿ ಜಿಲ್ಲೆಗಳಲ್ಲಿ ಭಾರಿ ಮಳೆಯಾಗುತ್ತಿದ್ದು, ಜನಜೀವನ ಅಸ್ತವ್ಯಸ್ತಗೊಂಡಿದೆ. ಮೇ20ರಿಂದ 24ರ ವರೆಗೆ ಭಾರಿ ಗಾಳಿಯೊಂದಿಗೆ ಗುಡುಗು-ಸಿಡಿಲು ಸಹಿತವಾಗಿ ಮಳೆಯಾಗಲಿದ್ದು, ಆರೆಂಜ್​ ಹಾಗೂ ರೆಡ್​ ಅರ್ಲಟ್​ ಘೋಷಿಸಲಾಗಿತ್ತು.

ಮೇ 19ರ ರಾತ್ರಿ (ಸೋಮವಾರ)ಯಿಂದಲೇ ಮಳೆ ಆರಂಭಗೊಂಡಿದ್ದು, ಮಾರನೇ ದಿನ ಮಂಗಳವಾರ ದಿನವಿಡೀ ಮಳೆ ಸುರಿಯಿತು. ಬೆಳಗ್ಗೆ 7 ಗಂಟೆಯಿಂದ 8ರ ವರಗೆ ಮಂದಗತಿಯಲ್ಲಿ ಸುರಿಯುತ್ತಿದ್ದ ಮಳೆ, ಬಳಿಕ ಒಂದೇಸಮನೆ ಭಾರಿ ಪ್ರಮಾಣದಲ್ಲಿ ಸುರಿಯಿತು. ದಟ್ಟ ಮೋಡವೂ ಆವರಿಸಿದ್ದರಿಂದ ಬೆಳಗ್ಗೆ 8:30ರ ಸಮಯದಲ್ಲಿ ಸಂಜೆ 6:30ರ ಬಳಿಕದ ವಾತಾವರಣದಂತೆ ಕಂಡುಬಂತು.

ನದಿಯಂತಾದ ಹೆದ್ದಾರಿ

ಭಾರಿ ಮಳೆಯಿಂದಾಗಿ ವಾಹನ ಸಂಚಾರಕ್ಕೂ ತೊಡಕುಂಟಾಯಿತು. ಉಡುಪಿ-ಮಣಿಪಾಲ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬೆಳಗ್ಗೆ 8:30ರಿಂದ 10:30ರ ವರಗೆಗೆ ಲಕ್ಷ್ಮೀಂದ್ರ ನಗರದಿಂದ ಮುಂದೆ ಟ್ರಾಫಿಕ್​ ಜಾಮ್​ ಉಂಟಾಯಿತು. ಮಣಿಪಾಲ ಸಿಂಡಿಕೇಟ್​ ಸರ್ಕಲ್​ನಿಂದ ಲಕ್ಷ್ಮೀಂದ್ರ ನಗರದ ವರೆಗೆ ರಸ್ತೆ ಇಳಿಜಾರಿನಿಂದ ಕೂಡಿದ್ದು, ಪಕ್ಕದ ಚರಂಡಿ ಬ್ಲಾಕ್​ ಆಗಿದ್ದರಿಂದ ಮಳೆ ನೀರು ನದಿಯಂತೆ ಹರಿಯುತ್ತಿತ್ತು. ಲಾರಿ, ಬಸ್​ನಂತಹ ಬೃಹತ್​ ವಾಹನಗಳಿಗೂ ಸಂಚರಿಸಲಾಗದಷ್ಟು ನೀರು ರಸ್ತೆಯಲ್ಲಿ ಹರಿಯುತ್ತಿತ್ತು. ಕಿಲೋ ಮೀಟರ್​ಗಟ್ಟಲೆ ವಾಹನಗಳ ಸಾಲು ನಿಂತಿತ್ತು.

ಬೈಕ್​ ಸವಾರರ ಪರದಾಟ

ಉದ್ಯೋಗದ ನಿಮಿತ್ತ ನಿತ್ಯವೂ ಬೆಳಗ್ಗೆ ಈ ಮಾರ್ಗದ ಮೂಲಕವೇ ಬೈಕ್​ ಮೂಲಕ ತೆರಳುವ ಮಹಿಳಾ-ಪುರುಷ ನೌಕರರು ಪರದಾಡಿದರು. ರಸ್ತೆಯಲ್ಲಿ ಮುಂದೆ ಭಾರಿ ಪ್ರಮಾಣದಲ್ಲಿ ನೀರು ಹರಿಯುತ್ತಿರುವುದನ್ನು ಅರಿಯದೆ ಬೈಕ್​ ಚಲಾಯಿಸಿಕೊಂಡು ಬಂದು ನೀರಿನ ಸೆಳೆತಕ್ಕೆ ಸಿಲುಕಿದರು. ಅನೇಕರ ಬೈಕ್​ ನೀರಿನಲ್ಲಿ ಕೊಚ್ಚಿ ಹೋಗಿ ಲಾರಿ, ಕಾರುಗಳಿಗೆ ಡಿಕ್ಕಿಯಾಗಿ ನಿಂತಿತು.

ಮನೆಗಳಿಗೆ ನುಗ್ಗಿದ ನೀರು

ಜಿಲ್ಲೆಯ ಮಳೆ ವಿವರ

ಕಾರ್ಕಳ- 72.06 ಮಿ.ಮೀ., ಕುಂದಾಪುರ- 6.06 ಮಿ.ಮೀ., ಉಡುಪಿ- 60.05 ಮಿ.ಮೀ., ಬೈಂದೂರು- 9.07 ಮಿ.ಮೀ., ಬ್ರಹ್ಮಾವರ- 18.06 ಮಿ.ಮೀ., ಕಾಪು-  76.03 ಮಿ.ಮೀ., ಹೆಬ್ರಿ- 21.06 ಮಿ.ಮೀ. ಮಳೆಯಾಗಿದೆ. ಸೋಮವಾರ ರಾತ್ರಿಯಿಂದ ಮಂಗಳವಾರದ ಬೆಳಗ್ಗೆಯವರೆಗೆ ಜಿಲ್ಲೆಯಲ್ಲಿ 32.09 ಮಿ.ಮೀ. ಮಳೆಯಾಗಿದೆ.