ಬಿರುಸಿನ ಮಳೆಗೆ ಕಾಸರಗೋಡಲ್ಲಿ ವ್ಯಾಪಕ ಹಾನಿ : ನೆರೆಯಲ್ಲಿ ಸಿಲುಕಿದವರ ಸ್ಥಳಾಂತರ

ಕಾಸರಗೋಡು: ಬಿರುಸಿನ ಮಳೆಗೆ ಕಾಸರಗೋಡು ಜಿಲ್ಲೆಯಲ್ಲಿ ವ್ಯಾಪಕ ಹಾನಿಯುಂಟಾಗಿದೆ.

ಕೇಳುಗುಡ್ಡೆ ನಿವಾಸಿ ಸಿ.ಕೆ.ಮಹಮ್ಮದ್ ಎಂಬುವರ ಮನೆ ಆವರಣ ಗೋಡೆ ಕುಸಿದು ಬಿದ್ದು ಹಾನಿಗೀಡಾಗಿದೆ. ಮಧೂರು ದೇವಾಲಯದ ರಾಜಗೋಪುರ ಎದುರಿನ ರಸ್ತೆಯಲ್ಲಿ ಭಾರಿ ಪ್ರಮಾಣದಲ್ಲಿ ನೀರು ಹರಿಯುತ್ತಿದ್ದು, ಸಣ್ಣ ವಾಹನಗಳ ಸಂಚಾರಕ್ಕೆ ತಡೆಯುಂಟಾಗಿದೆ. ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿ ನಡೆಯುತ್ತಿರುವ ಚೆರ್ಕಳ ಸನಿಹ ತಡೆಗೋಡೆ ಕುಸಿದು ರಸ್ತೆಗೆ ಹಾನಿಯುಂಟಾಗಿದೆ. ಜೆಸಿಬಿ ಬಳಸಿ ರಸ್ತೆಗೆ ಬಿದ್ದ ಮಣ್ಣು ತೆರವುಗೊಳಿಸುವ ಕಾರ್ಯ ಮುಂದುವರಿದಿದೆ.

ಮಧೂರು ಮಧುವಾಹಿನಿ ಹೊಳೆ ತುಂಬಿ ಹರಿಯುತ್ತಿರುವ ಹಿನ್ನೆಲೆಯಲ್ಲಿ ಪಟ್ಲ ಬಯಲು ಪ್ರದೇಶದ ಹಲವಾರು ಮನೆಗಳಿಗೆ ನೆರೆ ನೀರು ನುಗ್ಗಿದೆ. ತಗ್ಗು ಪ್ರದೇಶದಲ್ಲಿರುವ ಜನತೆಯನ್ನು ರಕ್ಷಣಾ ದಳ ಸಿಬ್ಬಂದಿ ಸುರಕ್ಷಿತ ಜಾಗಕ್ಕೆ ಸ್ಥಳಾಂತರಿಸಿದರು. ಕಾಸರಗೋಡು ನಗರ, ಕೇಳುಗುಡ್ಡೆ, ಕೊರುವೈಲ್ ದೇವಸ್ಥಾನ ರಸ್ತೆ ಸೇರಿದಂತೆ ನಾನಾ ಕಡೆ ರಸ್ತೆಯಲ್ಲಿ ನೀರು ತುಂಬಿಕೊಂಡು ವಾಹನ ಸಂಚಾರಕ್ಕೆ ಅಡಚಣೆಯುಂಟಾಯಿತು.

https://www.vijayavani.net/dinesh-gundu-rao-tour

https://www.vijayavani.net/udr-2