ತಂಪೆರೆದ ಮಳೆರಾಯ

ವಿಜಯವಾಣಿ ಸುದ್ದಿಜಾಲ ಧಾರವಾಡ

ನಗರದಲ್ಲಿ ಮಂಗಳವಾರ ಸಂಜೆ ಸುರಿದ ಧಾರಕಾರ ಮಳೆ ಬಿಸಿಲಿನ ಬೇಗೆ ತಣಿಸಿದ್ದು ಒಂದೆಡೆಯಾದರೆ, ರಸ್ತೆಗಳೆಲ್ಲ ಕರೆಗಳಂತಾಗಿ ವಾಹನ ಸವಾರರು ಪರದಾಡುವಂತಾಗಿತ್ತು.

2-3 ದಿನಗಳ ಕಾಲ ಸಂಜೆ ಮೋಡ ಕವಿದ ವಾತಾವರಣ ಉಂಟಾಗಿದ್ದರೂ ಮಳೆ ಆಗಿರಲಿಲ್ಲ. ಮಂಗಳವಾರ ಸಂಜೆ 5 ಗಂಟೆ ಹೊತ್ತಿಗೆ ಗುಡುಗು-ಸಿಡಿಲಿನೊಂದಿಗೆ ಆರಂಭವಾದ ಮಳೆ ಸುಮಾರು 2 ಗಂಟೆ ಕಾಲ ಧಾರಾಕಾರವಾಗಿ ಸುರಿದ ಪರಿಣಾಮ ವಾತಾವರಣ ತಂಪಾಗಿದೆ. ಬಿಸಿಲಿನ ತಾಪದಿಂದ ಕಂಗೆಟ್ಟಿದ್ದ ಜನರು, ಸುರಿಯುತ್ತಿದ್ದ ಮಳೆಯಲ್ಲೇ ತಿರುಗಾಡುತ್ತಿದ್ದ ದೃಶ್ಯ ಸಾಮಾನ್ಯವಾಗಿತ್ತು.

ಸಂಜೆಯಿಂದಲೇ ಮೋಡ ಕವಿದ ವಾತಾವರಣವಿತ್ತು. ಬಳಿಕ 5 ಗಂಟೆ ಹೊತ್ತಿಗೆ ಆರಂಭವಾದ ಮಳೆಯಿಂದ ಬೈಕ್​ ಸವಾರರು ಮಳೆಯಲ್ಲಿ ನೆನೆಯುತ್ತಲೇ ಸಂಚರಿಸುತ್ತಿದ್ದರು. ಎನ್​ಟಿಟಿಎಫ್​ ಬಳಿ ಜಲಾವೃತಗೊಂಡ ಬಿಆರ್​ಟಿಎಸ್​ ರಸ್ತೆಯಲ್ಲಿ ಸಂಚರಿಸುತ್ತಿದ್ದ ವಾಹನಗಳು ಬಂದಾಗಿ ಸವಾರರು ಪರದಾಡಿದರು. ಕಾರು, ಬೈಕ್​ಗಳು ಅರ್ಧ ರಸ್ತೆ ದಾಟುತ್ತಿದ್ದಂತೆ ತಾಂತ್ರಿಕ ದೋಷ ಕಂಡು ಬಂದು ಸ್ಥಗಿತವಾಗಿದ್ದವು.

ಸಂಚಾರ ವ್ಯತ್ಯಯ: ಸಂಜೆ ಸುರಿದ ಮಳೆಯಿಂದ ಎನ್​ಟಿಟಿಎಫ್​, ಟೋಲನಾಕಾ, ಕೆಎಂಎಫ್, ಹು-ಧಾ ಬೈಪಾಸ್​ ಸೇರಿ ಇತರ ಕಡೆಗಳಲ್ಲಿನ ಪ್ರಮುಖ ರಸ್ತೆಗಳು ಸಂಪೂರ್ಣ ಜಲಾವೃತಗೊಂಡು ವಾಹನ ಸಂಚಾರದಲ್ಲಿ ಕೆಲ ಗಂಟೆಗಳ ಕಾಲ ವ್ಯತ್ಯಯ ಉಂಟಾಗಿತ್ತು. ಚರಂಡಿ ವ್ಯವಸ್ಥೆ ಸರಿಯಾಗಿ ಇಲ್ಲದ ಕಾರಣ ಹು-ಧಾ ಪ್ರಮುಖ ರಸ್ತೆಗಳೇ ಕೆರೆಗಳಂತಾಗಿದ್ದವು. ಹೀಗಾಗಿ ರಸ್ತೆ ಕಾಣದೆ ವಾಹನ ಸವಾರರು ಸಂಚರಿಸಲು ಪರದಾಡುವಂತಾಗಿತ್ತು. ಕೆಲ ಹೊತ್ತಿನ ಬಳಿಕ ಸಂಚಾರ ಠಾಣೆ ಪೊಲೀಸ್​ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ವಾಹನ ಸವಾರರಿಗೆ ಮಾರ್ಗದರ್ಶನ ಮಾಡುವ ಮೂಲಕ ಸಂಚಾರ ಸುಗಮಗೊಳಿಸಿದರು.