ಜಿಲ್ಲೆಯಲ್ಲಿ ಜು.20ರ ವರೆಗೂ ಮಳೆ ಕೊರತೆಯಿಂದಾಗಿ ಬಿತ್ತನೆಗೆ ಭೂಮಿ ಹದಗೊಂಡಿರದ ಕಾರಣ ಬಹುತೇಕರು ಬಿತ್ತನೆಯಿಂದ ಹಿಂದೆ ಸರಿದಿದ್ದರು. ಆದರೆ, ಇದೀಗ ಮಳೆ ಧಾರಾಕಾರವಾಗಿ ಸುರಿದಿದ್ದರಿಂದ ಭೂಮಿ ತೇವಗೊಂಡಿದೆ. ಆದರೆ, ಬಿತ್ತನೆಗೆ ಹದಗೊಳ್ಳಬೇಕಾದರೇ, ಮಳೆ ಬಿಡುವು ಕೊಟ್ಟರೂ ಎರಡು ದಿನ ಕಾಯಬೇಕಿದೆ. ಹೀಗಾಗಿ ಜಿಲ್ಲೆಯ ಇನ್ನಿತರ ತಾಲೂಕುಗಳಲ್ಲಿ ‘ಪುಷ್ಯದಲ್ಲಿ ನೆಟ್ಟ ಗಿಡ ಪುಟಗೋಸಿ ಆದೀತು’ ಎಂಬ ಗಾಧೆಯಂತೆಯೇ ಹೆಚ್ಚಿನ ರೈತರು ಲಾಭದ ಫಸಲಿನ ಬದಲಿಗೆ ಜಾನುವಾರುಗಳಿಗೆ ಮೇವು ಬೇಳೆಯುವ ಬೆಳೆಗಳ ಮೋರೆ ಹೋಗುತ್ತಿದ್ದಾರೆ.
ಇನ್ನು ಧಾರಾಕಾರ ಮಳೆಯಿಂದಾಗಿ ಜಿಲ್ಲೆಯ ಕೆಳಹಂತದ 15 ಸೇತುವೆಗಳು ಮುಳುಗಡೆಯಾಗಿದ್ದು, ಜಿಲ್ಲೆಯ ಎಲ್ಲ ನದಿಗಳು ಮೈದುಂಬಿ ಹರಿಯುತ್ತಿವೆ, ಸಂಚಾರ ನಿರ್ಬಂಧಿಸಲಾಗಿದೆ. ಅಲ್ಲದೇ, ಮುನ್ನೆಚ್ಚರಿಕೆಯಿಂದಾಗಿ ಗೋಕಾಕ್ ಫಾಲ್ಸ್ ವೀಕ್ಷಣೆಗೆ ನಿರ್ಬಂಧವಿಧಿಸಲಾಗಿದೆ. ಮಳೆ ನಿರಂತರವಾಗಿ ಸುರಿಯುತ್ತಿರುವುದರಿಂದ ಹಳೆಯ ಮನೆ ಗೋಡೆಗಳು ಕುಸಿದು ಬೀಳುತ್ತಿದ್ದು, ಖಾನಾಪುರ ತಾಲೂಕಿನ ಭೂರುಣಕಿ ಗ್ರಾಮದಲ್ಲಿ ಗೋಪಾಲ ತಾರೋಡ್ಕರ್ ಹಾಗೂ ಗೌಸ್ಅಹ್ಮದ್ ಹೆರೇಕರ್ ಅವರ ಮನೆಗಳು ಕುಸಿದು ಬಿದ್ದಿವೆ. ಬೆಳಗಾವಿ ತಾಲೂಕಿನಲ್ಲೂ ಮಳೆ ಆರ್ಭಟಿಸುತ್ತಿದ್ದರಿಂದ ಬಳ್ಳಾರಿ ನಾಲಾ ತುಂಬಿ ಹರಿಯುತ್ತಿದ್ದು, ನೂರಾರು ಹೆಕ್ಟೇರ್ ಪ್ರದೇಶ ಜಲಾವೃತಗೊಂಡಿದೆ. ಭಾನುವಾರ ಮತ್ತೊಂದು ದೇವಾಲಯಕ್ಕೆ ನೀರು ನುಗ್ಗಿದ್ದು, ನಿಪ್ಪಾಣಿ ತಾಲೂಕಿನ ಕಾರದಗಾ ಗ್ರಾಮದ ಬಂಗಾಲಿ ಬಾಬಾ ದೇವಸ್ಥಾನ ದೂದಗಂಗಾ ನದಿ ನೀರು ಧಿಗ್ಬಂದನ ಹಾಕಿದೆ.
