ಬೆಳಂದೂರಿನಲ್ಲಿ ಅತ್ಯಧಿಕ ಮಳೆ: ಮಂಗಳವಾರ ಬೆಳಗ್ಗಿನಿಂದ ಸಾಯಂಕಾಲದ ವರೆಗಿನ ಮಳೆ ಮಾಹಿತಿಯಂತೆ ಪುತ್ತೂರಿನ ಬೆಳಂದೂರಿನಲ್ಲಿ ಅತ್ಯಧಿಕ 82.5 ಮಿ.ಮೀ. ಮಳೆ ಸುರಿದಿದೆ. ಕಾಣಿಯೂರು 78, ಸುಳ್ಯದ ಉಬರಡ್ಕ ಮಿತ್ತಡ್ಕದಲ್ಲಿ 68 ಮಿ.ಮೀ. ಮಳೆಯಾಗಿದೆ. ಕಾರ್ಕಳದ ಅಜೆಕಾರು, ಕೆರ್ವಾಶೆ, ಬೈಂದೂರಿನ ಶಿರೂರು, ಹೆಬ್ರಿ ತಾಲೂಕಿನ ಚಾರ, ಹೆಬ್ರಿ, ಕಬ್ಬಿನಾಲೆ, ಮುದ್ರಾಡಿ ಮೊದಲಾದ ಗ್ರಾಮಗಳಲ್ಲಿ 115 ಮಿ.ಮೀ.ಗೂ ಅಧಿಕ ಮಳೆಯಾಗಿದೆ ಎಂದು ರಾಜ್ಯ ನೈಸರ್ಗಿಕ ವಿಕೊಪ ಉಸ್ತುವಾರಿ ಕೇಂದ್ರ ತಿಳಿಸಿದೆ. ಮಂಗಳವಾರ ಬೆಳಗ್ಗೆ ಅಂತ್ಯಗೊಂಡ ಹಿಂದಿನ 24 ಗಂಟೆಯಲ್ಲಿ ಬಂಟ್ವಾಳ 16.4, ಬೆಳ್ತಂಗಡಿ 28.2, ಮಂಗಳೂರು 19.5, ಪುತ್ತೂರು 21.1, ಸುಳ್ಯ 27.5 ಮಿ.ಮೀ. ಸಹಿತ ದ.ಕ ಜಿಲ್ಲೆಯಲ್ಲಿ ಸರಾಸರಿ 22 ಮಿ.ಮೀ. ಮಳೆಯಾಗಿದೆ.
