ದೀಪಾವಳಿ ಕಳೆದರೂ ಮಳೆ ಕಡಿಮೆಯಾಗದಿರುವುದುರಿಂದ ಭತ್ತದ ಕಟಾವು ಸರಿಯಾಗಿ ನಡೆಯುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ಕಟಾವಿಗೆಂದು ಬಂದಿದ್ದ ಯಂತ್ರಗಳು ಕರಾವಳಿ ಭಾಗಗಳಿಂದ ವಾಪಸ್ ಊರುಗಳಿಗೆ ಹಿಂದಿರುಗಿದ್ದು, ಭಾರಿ ಪ್ರಮಾಣದಲ್ಲಿ ಬೆಳೆ ನಷ್ಟವಾಗಿದೆ.
ಬಹುತೇಕ ಕಡೆ ಕಟಾವಿಗೆ ಸಿದ್ಧವಾಗಿದ್ದ ಪೈರು ಭಾರಿ ಮಳೆಯಿಂದ ಭೂಮಿ ಪಾಲಾಗಿದೆ. ಬಯಲು ಪ್ರದೇಶದ ಗದ್ದೆಗಳಲ್ಲಿ ನೀರಿನ ಮಟ್ಟ ಇನ್ನೂ ಇಳಿದಿಲ್ಲದಿರುವುದರಿಂದ ಕಟಾವಿಗೆ ಸಮಸ್ಯೆಯಾಗಿದೆ. ರೈತರಂತೂ ಕಟಾವಿಗಾಗಿ ಹತ್ತು ದಿನಗಳು ಕಾದರೂ ಯಾವುದೇ ಪ್ರಯೋಜನವಾಗಿಲ್ಲ. ಈ ಕಾರಣದಿಂದ ಹಲವೆಡೆ ಲಂಗರು ಹಾಕಿದ್ದ ಕಟಾವು ಯಂತ್ರಗಳು ನಷ್ಟಕ್ಕೊಳಗಾಗಿ ಮರಳಿ ತಮ್ಮ ಊರಿಗೆ ಹಿಂದಿರುಗಿವೆ. ಇನ್ನು ಹಲವೆಡೆ ನಾಟಿ ಕಾರ್ಯ ತಡವಾಗಿರುವ ಕಾರಣದಿಂದ ಪೈರುಗಳು ಬೆಳೆದಿಲ್ಲ. ಈ ಕಾರಣದಿಂದ ಹೆಚ್ಚುವರಿ ಒಂದು ವಾರ ಕಾಯಬೇಕಿದ್ದು, ಅಲ್ಲಿಯ ತನಕ ಯಂತ್ರಗಳು ಕಾಯಬೇಕಿದೆ. ಕಳೆದ ಕೆಲವು ವರ್ಷಗಳಿಗೆ ಹೋಲಿಸಿದರೆ ಭತ್ತ ನಾಟಿಯಲ್ಲಿ ಈ ಬಾರಿಯೇ ರೈತರು ಅತಿ ಹೆಚ್ಚು ನಷ್ಟಕ್ಕೊಳಗಾಗಿದ್ದಾರೆ. ಹಲವೆಡೆ ಫಸಲು ಸಂಪೂರ್ಣ ಭೂಮಿ ಪಾಲಾಗಿದ್ದು, ರೈತಾಪಿ ವರ್ಗಕ್ಕೆ ನಿರಾಸೆ ಉಂಟುಮಾಡಿದೆ.
