ಚಿಕಿತ್ಸೆಯ ವಿವರ: ಕೆಲ ವರ್ಷಗಳಿಂದ ಹೃದಯ ಸಮಸ್ಯೆ ಹೊಂದಿದ್ದ ಯುವಕ 2012ರಲ್ಲಿ ಮೊದಲ ಬಾರಿಗೆ ಜಯದೇವ ಆಸ್ಪತ್ರೆಯಲ್ಲಿ ಚಿಕಿತ್ಸೆಗಾಗಿ ಬಂದಿದ್ದರು. ಆತನ ಹೃದಯದ ಬಲಭಾಗದಲ್ಲಿ ಸೋಂಕು ಇರುವುದು ಪರೀಕ್ಷೆಯಿಂದ ಕಂಡು ಬಂದಿತ್ತು. ಹೃದಯ ಕವಾಟ ಸಂಪೂರ್ಣ ನಾಶವಾಗಿತ್ತು. ಆಗ ಸೋಂಕಿಗೆ ಚಿಕಿತ್ಸೆ ನೀಡಿ ಬಳಿಕ ತೆರೆದ ಹೃದಯ ಶಸ್ತ್ರಚಕಿತ್ಸೆಗೆ ಒಳಪಡಿಸಿ ಕವಾಟ ಸರಿಪಡಿಸಲಾಗಿತ್ತು. ಒಂದು ವರ್ಷದ ನಂತರ ಅದೇ ಕವಾಟದ ಸೋರಿಕೆಯಿಂದ ಮತ್ತೆ ಆಸ್ಪತ್ರೆಗೆ ಆಗಮಿಸಿದ್ದ ಯುವಕನಿಗೆ, 2017ರಲ್ಲಿ ಮೃತ ದೇಹದ ಹೃದಯದಿಂದ ತೆರೆಯಲಾಗಿದ್ದ ಗ್ರಾಪ್ಟ್ ಅನ್ನು ಬಳಸಿ 2ನೇ ಬಾರಿಗೆ ತೆರೆದ ಹೃದಯ ಶಸ್ತ್ರಚಿಕಿತ್ಸೆ ಮಾಡಲಾಗಿತ್ತು. ಎರಡು ವರ್ಷಗಳ ನಂತರ ಹೃದಯ ಬಡಿತದ ಸಮಸ್ಯೆಯಿಂದಾಗಿ ಮತ್ತೆ ಆಸ್ಪತ್ರೆಗೆ ಆತ ದಾಖಲಾಗಿದ್ದ. 2020ರಲ್ಲಿ ರೇಡಿಯೋ ಫ್ರೀಕ್ವೆನ್ಸಿ ಅಬ್ಲೇಷನ್ ಮೂಲಕ ಹೃದಯ ಬಡಿತ ಸಮಸ್ಯೆಗೆ ಚಿಕಿತ್ಸೆ ನೀಡಲಾಗಿತ್ತು. ಇಷ್ಟಾದರೂ ಸರಿಪಡಿಸಲಾದ ಕವಾಟದಿಂದ ಮತ್ತೆ ಸೋರಿಕೆ ಕಂಡುಬಂದಿತ್ತು.
