ಕಲೆ, ಸ್ತಬ್ಧಚಿತ್ರಗಳ ಚೆಲುವು: ವಿವಿಧ ಜಿಲ್ಲೆಗಳ ವೈವಿಧ್ಯತೆ ತುಂಬಿದ, ವಿವಿಧ ಇಲಾಖೆಗಳ 52 ಸ್ತಬ್ಧಚಿತ್ರಗಳ ರಮಣೀಯತೆ ಮೇಳೈಸಿತ್ತು. ಕಲೆ, ವಾಸ್ತುಶಿಲ್ಪ, ಪ್ರವಾಸೋದ್ಯಮ, ಜಾನಪದ, ಸಮಾನತೆ, ಭಾತೃತ್ವ, ಸಂವಿಧಾನದ ಮಹತ್ವ, ಕರ್ನಾಟಕ ಏಕೀಕರಣ ಸಂಭ್ರಮ ಸ್ತಬ್ಧಚಿತ್ರಗಳು ಆಕರ್ಷಿಸಿದವು. ವಿವಿಧ ಜಾನಪದ ಕಲಾ ತಂಡಗಳು ಮೆರವಣಿಗೆ ಸುಂದರತೆ ತಂದುಕೊಟ್ಟವು. ಮಳೆಯ ನಡುವೆಯೂ ಕಲಾ ತಂಡಗಳು ಚುರುಕಿನ ಪ್ರದರ್ಶನ ನೀಡಿ ಕನ್ನಡ ನಾಡಿನ ಕಲೆ, ಸಂಸ್ಕೃತಿ ಅನಾವರಣಗೊಳಿಸಿದವು. ಕೇರಳ, ತಮಿಳುನಾಡು, ಹರಿಯಾಣ ಸಾಂಪ್ರದಾಯಿಕ ನೃತ್ಯ ಈ ಬಾರಿ ವಿಶೇಷ. ಮೆರವಣಿಗೆ ಸಾಗುವ ಅರಮನೆಯಿಂದ ಹಿಡಿದು ಬನ್ನಿಮಂಟಪದವರೆಗಿನ ಸುಮಾರು 5 ಕಿ.ಮೀ. ಉದ್ದದ ರಸ್ತೆಯ ಇಕ್ಕೆಲಗಳಲ್ಲಿ -ಸ್ಥಳೀಯರು, ರಾಜ್ಯ-ಹೊರ ರಾಜ್ಯದವರು, ವಿದೇಶಿಯರು, ಮಹಿಳೆಯರು, ಮಕ್ಕಳು ಸೇರಿ ಲಕ್ಷಾಂತರ ಜನರು ಸಾಕ್ಷಿಯಾದರು.
