ಹೃದಯ ಮೇಲೆ ಒತ್ತಡ ಸಲ್ಲ

ದೇವದುರ್ಗ: ನನಗಾಗಿ ನೂರು ಹೆಜ್ಜೆ ನಡೆ ನಿನಗಾಗಿ ಮಿಡಿಯುತ್ತೇನೆ ಎನ್ನುವುದು ಹೃದಯದ ಮಾತು. ಪ್ರತಿಯೊಬ್ಬರೂ ಹೃದಯವನ್ನು ಪರಿಶುದ್ಧವಾಗಿ ಇರಿಸಿಕೊಂಡರೆ ರೋಗಗಳಿಂದ ದೂರವಿರಬಹುದು ಎಂದು ತಾಲೂಕು ಆರೋಗ್ಯ ಅಧಿಕಾರಿ ಡಾ.ಬನದೇಶ್ವರ ಹೇಳಿದರು.

ಪಟ್ಟಣದ ಸಾರ್ವಜನಿಕ ಆಸ್ಪತ್ರೆ ಆವರಣದಲ್ಲಿ ಜಿಲ್ಲಾಡಳಿತ, ಜಿಪಂ ಹಾಗೂ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯಿಂದ ಆಯೋಜಿಸಿದ್ದ ವಿಶ್ವ ಹೃದಯ ರೋಗ ದಿನಾಚರಣೆಯಲ್ಲಿ ಭಾನುವಾರ ಮಾತನಾಡಿದರು.

ಹೃದಯ ಮೇಲೆ ಒತ್ತಡವಾದರೆ ಅಧಿಕ ರಕ್ತದೊತ್ತಡ, ಪಾರ್ಶವಾಯು, ಉಸಿರಾಟದ ತೊಂದರೆ, ಹೃದಯ ಸಂಬಂಧಿತ ಹಾಗೂ ನರರೋಗ ಸಂಬಂಧಿತ ಅಲರ್ಜಿ, ಮಲಬದ್ಧತೆ, ಚಟುವಟಿಕೆ ಇಲ್ಲದ ಜೀವನದಂತೆ ನಾನಾ ರೋಗಗಳು ಬರುವ ಸಾಧ್ಯತೆಯಿದೆ.

ಹೃದಯ ಸಂಬಂಧಿತ ರೋಗ ದೂರಮಾಡಲು ತಂಬಾಕು, ಗುಟ್ಕಾ, ಮದ್ಯಪಾನ ತ್ಯಜಿಸಬೇಕು. ನಿತ್ಯ ವ್ಯಾಯಾಮ ರೂಢಿಸಿಕೊಳ್ಳಬೇಕು. ಜಡ್ಡು ಗಟ್ಟಿದ ಆಹಾರ ಬಿಟ್ಟು, ಮಿತ ಆಹಾರ ಸೇವನೆ, ತರಕಾರಿ, ಸೊಪ್ಪು, ಪಲ್ಯೆ ಸೇವನೆ, ದೇಹದ ತೂಕು ಕಡಿಮೆ ಮಾಡುವುದು, ಯೋಗ, ಧ್ಯಾನ, ಸೈಕ್ಲಿಂಗ್ ಸೇರಿ ಇತರೆ ಚಟುವಟಿಕೆಗಳನ್ನು ಅಳವಡಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು. ಹೃದಯ ಆರೋಗ್ಯ ಜಾಗೃತಿಗಾಗಿ ಆಸ್ಪತ್ರೆಯಿಂದ ಕೋರ್ಟ್ ಆವರಣದವರೆಗೆ ಸೈಕಲ್ ಜಾಥಾ ಮಾಡಲಾಯಿತು.