ಕುಂದಾಪುರ: ತಲ್ಲೂರು ಗ್ರಾಪಂ ಕಚೇರಿಯಿಂದ ಕೂಗಳತೆ ದೂರದಲ್ಲಿರುವ ತಲ್ಲೂರಿನ ಅಂಗನವಾಡಿ ಕೇಂದ್ರದ ಆವರಣದಲ್ಲೇ ಇಡೀ ಗ್ರಾಮದಿಂದ ಸಂಗ್ರಹಿಸಿದ ತ್ಯಾಜ್ಯ ರಾಶಿಯನ್ನು ತಂದು ಸುರಿಯುತ್ತಿದ್ದು, ಈ ಬಗ್ಗೆ ಹಲವಾರು ಬಾರಿ ಮಕ್ಕಳ ಪಾಲಕರು ವಿರೋಧ ವ್ಯಕ್ತಪಡಿಸಿದ್ದರೂ, ಯಾವುದೇ ಕ್ರಮಕೈಗೊಂಡಿಲ್ಲ.
ಕಸ ವಿಲೇವಾರಿಗೆ ಅಂಗನವಾಡಿ ಕೇಂದ್ರದ ಪಕ್ಕದಲ್ಲೇ ಒಂದು ಶೆಡ್ ರೀತಿ ನಿರ್ಮಿಸಿ ಅಲ್ಲಿಗೆ ತಂದು ತ್ಯಾಜ್ಯ ಸುರಿಯಲಾಗುತ್ತೆ. ಇದು ಪುಟ್ಟಮಕ್ಕಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತೆ ಎಂಬ ಆತಂಕವನ್ನು ಸಾರ್ವಜನಿಕರು ಹಾಗೂ ಪಾಲಕರು ಹೊರಹಾಕಿದ್ದಾರೆ.
1983ರಲ್ಲಿ ಆರಂಭಿಸಲಾದ ಈ ಅಂಗನವಾಡಿ ಕೇಂದ್ರದಲ್ಲಿ ಕಳೆದ ವರ್ಷ 36 ಮಕ್ಕಳಿದ್ದರು. ಆದರೆ ಈ ವರ್ಷ 18 ಮಕ್ಕಳಿದ್ದಾರೆ. ಇದು ಗ್ರಾಮದ ಕೇಂದ್ರ ಸ್ಥಾನದಲ್ಲಿರುವ ಅಂಗನವಾಡಿಯೂ ಹೌದು. ಶೆಡ್ ನಿರ್ಮಿಸಿದ ಜಾಗವೂ ಅಂಗನವಾಡಿ ಕೇಂದ್ರದ ಜಾಗವಾಗಿದ್ದು, ದಾಖಲೆಯಲ್ಲಿದೆ.
ಸಮಸ್ಯೆ ಬಗ್ಗೆ ತಲ್ಲೂರು ಗ್ರಾಮಸಭೆಯಲ್ಲಿ ಹಲವಾರು ಬಾರಿ ಪ್ರಸ್ತಾಪವಾಗಿದ್ದರೂ ಈವರೆಗೂ ಇದಕ್ಕೊಂದು ಶಾಶ್ವತ ಪರ್ಯಾಯ ವ್ಯವಸ್ಥೆ ಕಲ್ಪಿಸುವಲ್ಲಿ ಸ್ಥಳೀಯಾಡಳಿತ ವಿಫಲವಾಗಿದೆ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.
