ಬೆಳಗ್ಗೆ 5 ಗಂಟೆಗೆ ಪೌರಕಾರ್ಮಿಕರ ಹಾಜರಾತಿ ಪಡೆದು ಸ್ವಚ್ಛತೆ ಮೇಲುಸ್ತುವಾರಿ ನೋಡಿಕೊಳ್ಳುವುದರಿಂದ ಆರೋಗ್ಯ ನಿರೀಕ್ಷಕರ ಕೆಲಸ ಪ್ರಾರಂಭವಾಗುತ್ತದೆ. ಬೀದಿ ನಾಯಿ ನಿಯಂತ್ರಣ, ಅನಾಥ ಶವ ಸಂಸ್ಕಾರ, ಅಪಾಯಕಾರಿ ಮರ ತೆರವು, ಮಳೆಗಾಲದ ತುರ್ತು ಸಂದರ್ಭದಲ್ಲಿ ಸ್ಥಳಕ್ಕೆ ಭೇಟಿ, ಮನೆ-ಮನೆ ಕಸ ಸಂಗ್ರಹ ಉಸ್ತುವಾರಿ, ಸ್ವಚ್ಛತಾ ವಾಹನಗಳ ರಿಪೇರಿಗೆ ಕ್ರಮ, ಕೋಟ್ಪಾ ಅನುಷ್ಠಾನ, ಟ್ರೇಡ್ ಲೈಸೆನ್ಸ್, ಸಾರ್ವಜನಿಕ ದೂರಿಗೆ ಸ್ಪಂದನೆ, ಜನನ-ಮರಣ ನೋಂದಣಿ ಅಧಿಕಾರಿ, ಪ್ರಮಾಣ ಪತ್ರಗಳ ವಿತರಣೆ, ತಿದ್ದುಪಡಿ ಕ್ರಮ, ಸಾಮಾನ್ಯ ಜವಾಬ್ದಾರಿಗಳಾಗಿವೆ. ಕೋವಿಡ್ ಸಂದರ್ಭ ಮತ್ತೆ ಹೆಚ್ಚುವರಿ ಕೆಲಸಗಳು ಹೆಗಲೇರಿದ್ದು, ಇಂದಿರಾ ಕ್ಯಾಂಟೀನ್ ಮೇಲ್ವಿಚಾರಣೆ, ಕರೊನಾ ಸಾವು ಅಂಕಿ ಸಂಖ್ಯೆ ಸಂಗ್ರಹ, ಅಂತ್ಯಸಂಸ್ಕಾರಕ್ಕೆ ಕ್ರಮ, ಸರ್ಕಾರಿ ಕಚೇರಿಗಳಲ್ಲಿ ಕೋವಿಡ್ ಪಾಸಿಟಿವ್ ಕಂಡುಬಂದರೆ ಅಂಥ ಕಟ್ಟಡಗಳ ಸ್ಯಾನಿಟೈಸೇಶನ್ ಮುಂತಾದ ಕಾರ್ಯಗಳನ್ನು ಆರೋಗ್ಯ ನಿರೀಕ್ಷಕರು ನಿರ್ವಹಿಸಬೇಕು. ಪರಿಸರ ಅಭಿಯಂತರ ಅಧೀನದಲ್ಲಿ ಆರೋಗ್ಯ ನಿರೀಕ್ಷಕರ ಹುದ್ದೆಯಿದ್ದು, ಇಲ್ಲಿಯೂ ಕಾಪು- ಕಾರ್ಕಳ- ಉಡುಪಿಗೆ ಒಬ್ಬರೇ ಪ್ರಭಾರ ನೆಲೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.
