ಲಸಿಕೆ ಕಡ್ಡಾಯವಾಗಿ ಹಾಕಿಸಿ: ಜಿಲ್ಲೆಯಲ್ಲಿ ಈಗಾಗಲೇ ಅನೇಕ ಸುತ್ತಿನಲ್ಲಿ ರಾಸುಗಳಿಗೆ ಕಾಲುಬಾಯಿ ಜ್ವರದ ಲಸಿಕೆ ಹಾಕಲಾಗಿದೆ, ಈಗಲೂ 6ನೇ ಸುತ್ತಿನ ಕಾಲುಬಾಯಿ ಲಸಿಕಾ ಆಂದೋಲನ ನಡೆಯುತ್ತಿದ್ದು, ರೈತರು ತಪ್ಪದೆ ರಾಸುಗಳಿಗೆ ಲಸಿಕೆ ಹಾಕಿಸಬೇಕು ಎಂದು ದೇವನಹಳ್ಳಿ ಪಶು ವೈದ್ಯಾಧಿಕಾರಿ ಡಾ.ಅನಿಲ್ಕುಮಾರ್ ಹೇಳಿದರು. ಆಕಳುಗಳಿಗೆ ಜನಿಸುವ ಗಂಡು ಕರುವಿನ ಮೇಲೆ ಮಾಲೀಕರ ನಿರ್ಲಕ್ಷ್ಯ, ತಾತ್ಸಾರ ಮನೋಭಾವನೆ ತಪ್ಪಿಸುವ ಸಲುವಾಗಿ ಸರ್ಕಾರ ಜಾರಿಗೆ ತಂದಿರುವ ಹೆಣ್ಣು ಕರು ಖಾತರಿ ಯೋಜನೆ ಹೈನುಗಾರರಿಗೆ ವರದಾನವಾಗಿದೆ. ನಳಿಕೆಯನ್ನು ನೀಡಿದ ಹಸು ಕೃತಕವಾಗಿ ಗರ್ಭ ಧರಿಸುವ ಜತೆಗೆ ಶೇ.90 ಖಚಿತವಾಗಿ ಹೆಣ್ಣು ಕರುವಿಗೆ ಜನ್ಮ ನೀಡುತ್ತದೆ. ಹಲವಾರು ಪ್ರಯೋಗಗಳ ಮೂಲಕ ವಿರ್ಯದ ನಳಿಕೆ ಸಿದ್ಧಪಡಿಸಲಾಗಿದ್ದು, ನಳಿಕೆ ಮೂಲಕ ಗರ್ಭ ಧರಿಸುವ ಹಸುಗಳು ಹೆಣ್ಣು ಕರುವಿಗೆ ಜನ್ಮ ನೀಡಿರುವ ಸಾಕಷ್ಟು ನಿದರ್ಶನಗಳಿವೆ. ಹೀಗಾಗಿ ಎಲ್ಲ ಜಿಲ್ಲೆಗಳಿಗೆ ಅಭಿವೃದ್ಧಿಪಡಿಸಲಾದ ವಿರ್ಯ ನಳಿಕೆಗಳು ಪೂರೈಕೆಯಾಗಿವೆ ಎಂದರು. ಮಿಶ್ರತಳಿ ಕರುಗಳನ್ನು ಪ್ರೋತ್ಸಾಹಿಸುವ ಸಲುವಾಗಿ ಮಿಶ್ರತಳಿ ಹೆಣ್ಣು ಕರುಗಳ ಪ್ರದರ್ಶನ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ, ಇದು ಹೈನುಗಾರರಿಗೆ ಆರ್ಥಿಕವಾಗಿ ನೆರವಾಗಲಿದೆ ಎಂದರು.
